Kibulu 1

1

2

3

4

5

6

7

8

9

10

11

12

13

¹Sua kel akate, Sunbin-Got e deiw mongom tulun kuw geleweko, akalem bontem dim bakamin kunum im dim e nukalem aatim aliwol ilo dak kel kukuyemeko, bokoyemse kale.

²Bokoyemse kate, kameem fefe ding kabalak e, e akalem Min em bontem dim kel alik alik nulo kilele weng bokoyemse te. Min beem teing dim e, Sunbin-Got e kawin alik alik kale talfut ke dukusomi, alik alik angom eisneng be “Kukalem teing dim elo em fan atew dukemoki te!”, dangeko, dukuse kale.

³Min be Alew em ailbin filik falak so, auk so kitil so, alik alik be ok takak atew falak angsomelei, beem deiw e Sunbin-Got em bin e nulo kilele kukuyemkabe te. Akalem weng kitil nam beso alik alik mesesem eisneng angom be dawkitilmoko, kolewkabe te. Num sili sili nam beem yan wa be banim kolewse ding dim bakate, Min be iti katiw elo uneko, emisik auk so Kamok Fian Sunbin-Got em yuk teing kitil nam dim ka kel teineko, angum dukube te.

⁴Keko beli, Sunbin-Got e Min elo wiin atin kuw fian so kelewse kasike, em wiin be yemdakamin finik alik alik biim wiin kalak da koyemei, i em afak kuw biliw te.

⁵Nimtew angom? Sunbin-Got e bokolomele: “Ku nakalem Min kute te! Kame akate, ne kom kalew kebi te!”, dangse kate, e kaneko weng be dabalakamin finik mak elo bokolewinba kese kasike. Beemdiw, e bokolomele: “Ne kunum beem alew nete te. E nakalem min kebe te!”, angse kate, e kaneko weng be dabalakamin finik mak elo bakati bokolinba kekabe te.

⁶Bokolinba kekabe kate, sow em akalem emisik aul kawin dim kale kel iti dabalaloke ding dim beem dulum elote e bokolomele: “Sunbin-Got em yemdakamin finik alik alik i em wiin daoko, dawsulemoliwka!”, angse kale.

⁷Angeko, akalem yemdakamin finik im dulum elote e bokolomele: “Yemdakamin finik i inim atew keyemsomi, akalem weng afak biliw finik ilo ais kainin mamin so atew keyemsi te.”, angse kale.

⁸Angse kate, Min em dulum elote Sunbin-Got e bokolomele: “Sunbin-Got kutaka! Ku Kamok Fian keko, diwkuw diwkuw auk so belew te. Kebomi, Kamok Fian em auk so tokfol beso kunum waneng alik alik ilo kilele kiol kuw diwyemeko, yetemkabelew te.

⁹Ku kiol kuw kukuw ibolow so kelewsomi, sakalaw keko, weng bo bo kukuw elo kaim alel kelewkabelew te. Kasike, Sunbin-Got kutaka! Kom Sunbin-Got e kom kak dim kel oliw ais dem ok so abokemeko, wiin fian dukemse te. Dukemei, kom kalfong e fian kuw keko, mali im kalfong be atin kuw bakilewkabe te.”, angse kale.

¹⁰Angeko, weng makso bokolewomele: “Kamok Fian kutaka! Mesesem mesesem eisneng angom beem talfut kese ding dim kabalak e, ku kawin kale dawkitilmoselew te. Dawkitilmosomi, kukalem teing beso abiil koom be katiw kel duku kolewselew te.

¹¹Kawin so abiil so be banimokoliw kate, ku diwkuw diwkuw bokolew te. Feinka! Kawin so abiil so be ilim emdiw tulum kesomi,

¹²im kitil e banimkabe kasike, ku ilo asolow ilim emdiw munmun kelewbelew te. Kate, kukalem ete diwkuw diwkuw kaneko kuw bokolew te. Kom kayow ding a, itol ding a, nam banime te. Diwkuw diwkuw bokolew te.”, dangse kale.

¹³Feinka! Sunbin-Got e bokolomele: “Ku nem yuk teing auk so dim ka kel teineko, ding fenbolewka! Ding feneko, ne kom maka bi yenkiw keyemeko, kom yan bin dil ka kel dukuyemeko, kom afak kel da koyemoki te.”, dangse kale. Kate, e kaneko weng be dabalakamin finik mak elo bokolewinba kese te. Weng be akalem Min bete kuw bokolewse te.

¹⁴Feinka! Yemdakamin finik i Sunbin-Got em weng afak kuw ke alakabiliw kasike, e ilo “Yu nakalem kunum waneng ilo dokoyemina!”, yangeko, ilo fein ibolow so kunum waneng ilo yetebomin beem dulum elote yemdakabe te.