ኢብራዌ 10

1

2

3

4

5

6

7

8

9

10

11

12

13

¹ሙሴ ሂጌይ ያናው ዴዒያ ሎዖባታስ ኩያፔ ኣቲን ባ ሁዔን ዋና ጊዴና። ሄሳ ጊሾ፥ ላይꬃን ላይꬃን ፓጬይ ባይና ያርሼቲያ ያርሾይ ጎይናናው ሺቂያ ኣሳ ፖሎ ኦꬃናው ዳንዳዔና።

²ሂጌይ ኤንታ ፖሎ ኦꬃናው ዳንዳዒዳባ ጊዲያኮ ኤንቲ ያርሾ ያርሼይሳ ኣጋናሺን። ቃሲ ጎይናናው ሺቂያ ኣሳይ ባንታ ናጋራፔ ጌያና፤ ኤንታ ካሃይካ ኤንታና ባላ ጊዲ ሞቴና።

³ሺን ሄ ያርሾቲ ላይꬃን ላይꬃን ናጋራ ቆፊሶሶና።

⁴ኣይስ ጊኮ፥ ኮርማ ሱꬂኔ ዴሻ ሱꬂ ናጋራ ዲጋናው ዳንዳዔና።

⁵ሄሳ ጊሾ፥ ኪሪስቶሲ ሃ ኣላሚያ ዪዳ ዎዴ ሃይሳዳ ያጊስ፡ «ኔኒ ያርሾኔ ኢሞ ኮያባካ፤ ሺን ታው ኣሾ ጊጊሳዳሳ።

⁶ኔኒ ፁጌቲያ ያርሾኒኔ ናጋራ ያርሹዋን ኡፋይታባካ።

⁷ሄ ዎዴ ‹ታ ጊሾ ማፃፋን ፃፌቲዳይሳዳ፥ ጎዳው፥ ታኒ ኔ ሼኒያ ኦꬃናው ያስ› ያጋስ» ያጊስ።

⁸ያርሾይ ያርሼታና ሜላ ሂጌይ ኪቲያባ ጊዲኮካ፥ ኪሪስቶሲ ኮይሮ፥ «ኔኒ ያርሾኔ ኢሞ፥ ፁጌቲያ ያርሾኔ ናጋራ ያርሾ ኮያባካ፤ ኤንታን ኡፋይታባካ» ያጊስ።

⁹ካሊዲካ ኢ፥ «ጎዳው፥ ሄኮ ታኒ ኔ ሼኒያ ኦꬃናው ያስ» ያጊስ። ሄሳ ጊሾ፥ ኪሪስቶሲ ናምዓንꬁዋ ኤሳናው ኮይሮይሳ ሻሪስ።

¹⁰ዬሱስ ኪሪስቶሲ ፆሳ ሼኒያ ኦꬂዲ፥ ዛሬꬆና ኦጌን ኢሲ ቶሆ ባ ኣሹዋ ያርሺዳ ጊሾ ኑኒ ጌዪዳ።

¹¹ካሂኔ ኡባይ፥ ናጋራ ዲጋናው ዳንዳዖና ሄ ያርሾታ ጋላስ ጋላስ ያርሺሼ ኤቂዲ ባ ኦሱዋ ኦꬄስ።

¹²ሺን ኪሪስቶሲ ኡባ ዎዴስ ጊዲያ ኢሲ ናጋራ ያርሹዋ ያርሺዲ፥ ፆሳፌ ኡሻቻ ባጋን ኡቲስ።

¹³ሄ ዎዲያፔ ዶሚዲ ኢያ ሞርኬቲ ኢያ ቶሆይ ዬꬊያባ ኦꬃና ጋካናው ናጌስ።

¹⁴ኢ ዛሬꬆና ኦጌን ኢሲ ቶሆ ባና ያርሺዳ ያርሹዋን ጌሻታ ሜሪናው ፖሎ ኦꬂስ።

¹⁵ቃሲ ጌሻ ኣያናይ ኑስ ሃይሳ ማርካቴስ። ኮይሮ ሃይሳዳ ያጊስ፡

¹⁶«ሄ ጋላሳታፔ ጉዬ፥ ታኒ ኤንታራ ጫቂያ ጫቆይ ሃይሳ፡ ታኒ ታ ሂጊያ ኤንታ ቆፋን ዎꬃና፤ ኤንታ ዎዛናን ፃፋና» ያጌስ።

¹⁷ካሊዲካ፥ «ታኒ ኤንታ ናጋራኔ ኤንታ ኢታ ኦሱዋ ዛራ ቆፒኬ» ያጌስ።

¹⁸ሂዛ፥ ናጋሪ ኣቶ ጌቴቲዳፔ ጉዬ ናጋራስ ያርሼቲያ ያርሾ ኮሼና።

¹⁹ሂዛ፥ ታ ኢሻቶ፥ ኑኒ ዬሱሳ ሱꬃ ባጋራ ኡባፌ ጌሻ ቤሳ ጌላናው ኑስ ሚኖቴꬂ ዴዔስ።

²⁰ኑ ጌላናይ ኪሪስቶሲ ባ ማጋራጁዋ፥ ሄሲካ ባ ኣሹዋ ባጋራ ኑስ ዶዪዳ ኦራꬂኔ ዴዖ ጊዲዳ ኦጊያና።

²¹ኑስ ፆሳ ኬꬃ ቦላ ሹሜቲዳ ጊታ ካሂኔ ሃላቃይ ዴዔስ።

²²ኑኒ ኢታ ካሃፔ ጌያናው ኑ ዎዛና ዉርፄቲዲ፥ ኑ ኣሳቴꬃ ፂሎ ሃꬃን ሜጬቲዲ፥ ሱሬ ዎዛናኒኔ ፖሎ ኣማኖን ፆሳኮ ሺቆስ።

²³ኑስ ኡፋይሳ ቃላ ኢሚዳ ፆሳይ ኣማንቲዳይሳ ጊዲያ ጊሾ ኑ ማርካቲያ ኡፋይሳ ኡሻቺ ሃዲርሲ ጎና ሚንꬂዲ ኦይኮስ።

²⁴ኢሶይ ኢሱዋ ሲቆሲኔ ሎዖ ኦሶስ ዋቲ ዴንꬄꬃኔኮ ኣኔ ቆፖስ።

²⁵ኢሶቲ ኢሶቲ ሜዜ ኦꬂዲ ሺቄይሳ ኣጊዳይሳዳ ኑኒ ኢሲፌ ሺቄይሳ ኣጎኮ። ሺን ጎዳ ጋላሳይ ማታቲዳይሳ ሂንቴ ቤዒያ ጊሾ ሄሳ ካሴይሳፌ ኣꬂዲ ኦꬂቴ።

²⁶ኑኒ ቱማ ኤራቴꬃ ኤኪዳፔ ጉዬ ኤሪሼ ናጋራ ኦꬂኮ፥ ሂዛፔ ኑ ናጋራ ጊሾ ያርሼታና ያርሾይ ባዋ።

²⁷ሺን ሂዛ ኣቲዳይ ያሺያ ፒርዳኔ ፆሳ ሞርኬታ ፁጋናው ጊጊዳ ዎልቃማ ታማ።

²⁸ሙሴ ሂጊያ ኪቴቶና ኢፂዳ ኦኒካ ናምዑ ዎይኮ ሄꬑ ኣሲ ኢያ ቦላ ማርካቲኮ ቃꬌይ ባይናሺን ሃይቄስ።

²⁹ያቲን፥ ፆሳ ናዓ ካꬊዳ ኡራይ፥ ባና ጌሺዳ ፆሳ ጫቆ ሱꬃ ቱናባዳ ቆፒዳ ኡራይ፥ ቃሲ ኣꬎ ኬሃቴꬃ ኣያና ጫዪዳ ኡራይ፥ ኣይ ሜላ ኢታ ፒርዳ ኤካናው ቤሲያኮ ኣኔ ቆፒቴ።

³⁰ሂዛ፥ «ሃሎ ኬሶይ ታባ፥ ታ ኩሼ ዛራና» ጊዳይሳ ኑ ኤሮስ። ቃሲካ፥ «ጎዳይ ባ ኣሳ ፒርዳና» ያጊስ።

³¹ዴዖ ፆሳ ኩሼን ኩንዴꬂ ዳሮ ያሼስ።

³²ሂንቴው ፆሳ ፖዖይ ፖዒዳፔ ጉዬ ሂንቴ ዳሮ ዋዬን፥ ጊታ ባፄን ጌንጪዳ ቤኒ ዎዲያ ቆፒቴ።

³³ኢሲ ኢሲ ቶሆ ሂንቴ ኣሳ ሲንꬃን ጫዬቲዴታ፤ ጎዴቲዴታ፤ ኢሲ ኢሲ ቶሆ ሄሳ ሜላ ዋዬይ ጋኪዳ ኣሳራ ኢሲፌ ዋዪዴታ።

³⁴ቃሾን ዴዒያ ኣሳስካ ቃꬌቲዴታ። ሂንቴው ሎዖኔ ꬋዮና ሻሎይ ሳሎን ዴዔይሳ ሂንቴ ኤሪዳ ጊሾ ሂንቴ ሻሎይ ቦንቄቲያ ዎዴ ኡፋይሳን ዳንዳዒዴታ።

³⁵ሄሳ ጊሾ፥ ጊታ ዎይቶይ ዴዒያ ሂንቴ ሚኖቴꬃ ዬጎፊቴ።

³⁶ፆሳ ሼኒያ ፖሊዲ፥ ኢ ሂንቴው ኢማና ጊዳ ኡፋይሳ ኤካና ጋካናው ጌንጫናው ኮሼስ።

³⁷ሂዛ፥ ጌሻ ማፃፋን፥ «ኢ፥ ያና ጊዳይሲ ያና፤ ጋምዔና።

³⁸ሺን ታ ፂሎይ፥ ታናን ኣማኔቲዲ ዳና፤ ኦኒካ ጉዬ ሲሚኮ ታና ኡፋይሴና» ያጌስ።

³⁹ኑኒ ኣማኔቲዲ ኣቲያ ኣሳ ባጋፌ ኣቲን ጉዬ ሲሚዲ ꬋያ ኣሳ ባጋ ጊዶኮ።