HEBREOS 1

1

2

3

4

5

6

7

8

9

10

11

12

13

¹Wiñɨgam Dios ijɨ́yáy wat́cɨy jém tanja̱tuŋwe̱wetam. Varios forma ijɨ́yáy. Chiit́a̱ jɨ̱xi jém wiñɨcpɨc aŋmat́cɨɨwiñ iga iŋmadayyajiñ jém Dios ipɨxiñt́am.

²Pero sɨɨp yɨ́p ocmɨpɨc tiempo Dios icutsat iMa̱nɨc iga taŋmadáyiñ. Yɨ́pt́im Dios iMa̱nɨc cupiŋta̱ iga imɨɨcha̱p it́u̱mpɨy jém Dios imɨɨchi. Jeet́im iMa̱nɨc iwaganayo̱xa̱ Dios cuando mu iwatyaj it́u̱mpɨy cosa jém it́wɨɨp yɨ́p naxyucmɨ y jém it́wɨɨp sɨŋyucmɨ.

³Agui pɨ̱mi wɨ̱tsocpa jém Dios iMa̱nɨc juutst́im jém tanJa̱tuŋ Dios. Jext́im ipɨ̱mi. Jeet́im mismo icuwiñ juuts jém tanJa̱tuŋ Dios. Yɨ́pt́im Dios iMa̱nɨc iniit́ icɨɨjo̱m it́u̱mpɨy jém Dios iwa̱t́i iga iwatpa cuenta con Dios iŋma̱t́i jém iniit́wɨɨp ipɨ̱mi. Jesɨc cuando yaj tacujicháyáy jém tantáŋca, nɨc co̱ñi sɨŋyucmɨ jém tanJa̱tuŋ Dios itrono iŋwɨ̱cɨɨmɨ.

⁴Accámta̱ jém Dios iMa̱nɨc juuts tu̱m más mɨjpɨc aŋjagooyi que jém sɨŋyucmɨpɨc pɨxiñt́am. Ipɨctsoŋne jeet́im iJa̱tuŋpɨc iñɨ̱yi y jém iJa̱tuŋ ipɨ̱mi, jeeyucmɨ más wɨa̱p que jém sɨŋyucmɨpɨc pɨxiñt́am.

⁵Porque Dios d́a nunca iñɨ́máy ni tu̱m sɨŋyucmɨpɨc pɨ̱xiñ: Mich mamMa̱nɨc. Yɨ́p ja̱ma mamma̱nɨga̱p. D́at́im iñɨ́máy Dios tu̱m sɨŋyucmɨpɨc pɨ̱xiñ: Mich anJa̱tuŋ, ɨch mamma̱nɨc.

⁶Pero cuando Dios inimiñ yɨ́p naxyucmɨ jém Wiñt́ipɨc iMa̱nɨc, nɨmpa Dios: Wɨ̱ iga it́u̱mpɨy jém sɨŋyucmɨpɨc pɨxiñt́am ijɨ̱syajiñ jém Dios iMa̱nɨc.

⁷Dios iŋmatpa de jém sɨŋyucmɨpɨc pɨxiñt́am cuando nɨm: Dios icse̱tpa jém sɨŋyucmɨpɨc pɨxiñt́am juuts sa̱wa. Icse̱tpa jém icuyo̱xayajpaap juuts tu̱m juctɨ tsa̱m pɨ̱mi yótpa.

⁸Pero Dios iŋmatpa de jém iMa̱nɨc cuando nɨm: Mich miDios. Mich miŋjagooyi. D́a nunca miputpa iga miŋjagooyi. Iññuumaŋjacpa jém pɨxiñt́am.

⁹Tsa̱m iñt́oypa jém wɨbɨc jɨ̱xi. Tsa̱m iñjóyixpa jém malopɨc jɨ̱xi. Jeeyucmɨ micupiŋ Dios, mich iñDios, más micmaymáya̱p que it́u̱mpɨy jém iŋwaganasɨɨyajpaap.

¹⁰Nɨmt́im Dios: Mich miO̱mi. Mich iŋwat yɨ́p mundo cuando moj i̱t́i it́u̱mpɨy cosa. Iŋwatt́im jém sɨŋ con iŋcɨ.

¹¹Cuyajpa jém sɨŋ y jém nas, pero mich d́a nunca micuyajpa. Michɨ́ypa para siempre. Wɨd́áya̱p jém sɨŋ y jém nas juuts tu̱m yoot́i.

¹²Impacspa jém sɨŋ y jém nas juuts tu̱m puctu̱cu. Iŋcucacpa juuts yoot́i. Pero mich d́a nunca micucacpa. Ni d́a nunca micuyajpa.

¹³Dios d́a nunca iñɨ́máy ni tu̱m sɨŋyucmɨpɨc pɨ̱xiñ juuts iñɨ́máy jém iMa̱nɨc: Co̱ñɨ yɨɨm anaŋwɨ̱mɨ hasta que manaccoñwɨ́ypa jém íñenemigoyaj.

¹⁴Jém sɨŋyucmɨpɨc pɨxiñt́am tu̱m a̱nama. Icuyo̱xayajpa Dios. Jeeyaj cutsatyajta̱ iga iyo̱xpátyajiñ jém pɨxiñt́am jém ipɨctsoŋyajpáppɨc jém wɨbɨc aŋma̱t́i iga cɨacputyajta̱p.