Ibrani 1

1

2

3

4

5

6

7

8

9

10

11

12

13

¹Kena akmenare Alla Ilepa rebai boka kai iteki ntuana menaru baue nabiaru. Rebai sesi Ilepa kaise Ilepae aturane, rebai sesi Ilepa loko Italuke, rebai sesi Iono tanda herane kai cara mamakete lekwe.

²Po pamuli meije rebe lau mo nusare koho nere Ilepa kai ite baue Eni Nanare. Alla Itolae nusare kai pusue taneiaru baue Eni Nanae mere. Kai Alla Iteu peneka be pusue taneiaru Eni Nanae mere Enie.

³Eni Nanae mere pine Iaseluke be Alla Eni kbasare ela titinai. Eni atate sakesa kai Alla ruaIje neka. Ile lekwe pine Iraka nusare kai pusue yelu mei nusa meije kena Eni lepate rebe esi kbasare ktili titinaije, leke atia yake. Kena Iampune iteki dosaru peneka, pine Irue kena otoi maka kbasa ndete surgare, sapleuke Alla Maka Kbasa elake titinaije Eni makwanale.

⁴Alla Eni Nanae mere Isupu kbasa elake titinai, lesi bei malekate, kai Alla Iono Eni nane mere esupu holmate titinai, lesi bei Iono malekate eni nane.

⁵Alla Ibeteke loko malekate mo po Ibeteke loko Eni Nanare be, “Ale Auku Anae. Bei petu meije Aure Amamu.” Kai Ibeteke lekwe be, “Au meije AmaI, kai Auku Anae kenaI.”

⁶Kai kena Alla Iulake Eni Nanae menare Ilomei nusa meije, Iombe, “Auku malekata, suke pusumi tatu loko Auku Anae meije.”

⁷Kai kena malekataru, Alla Ibeteke be, “Au ulake malekataru esi tapa Au saka balate ehbuere kai saka auwe klitine.”

⁸Po Alla Ibeteke loko Eni Nanae mere be, “Ale Alla, Apleta saka Kamale rame eti pela. Apleta kena nkenale kai Alemake mo.

⁹Asuka rebe nkenale titinai, kai lalemu tiake rebe tiare. Bei mere hoko Amu Alla Ibitike Ale kai Iono Asupu holmate bei tamata, kai lalesi ndina le Alere elesi bei Amu ebearu.”

¹⁰Alla Ibeteke loko Eni Nanare lekwe be, “Ale Tuhane, kena menaije Atolae nusare, kai Ale ruaMu tolae lanite.

¹¹Pusue meru namake atialu kai umalabai saka pakiane, po Ale, Ara me rame.

¹²Nusare kai pusue rebe mei nusare namake Alouke saka lapune rebe malabai peneka, kai Aselie kena makete. Po Ale, Aleli kwale mo, kai Amu nasite pusu moneka.”

¹³Alla Ibeteke loko malekate mo po Ibeteke loko Eni Nanare be, “Arue sapleuke Auku makwanale, eti Au ono Amu musuaru esi tatu lokoMu.”

¹⁴Ele mere hoko esi tinaije malekataru saisa? Malekataru Alla Eni roa rebe esi layani Allare, kai esi supu ulake bei Alla kena tapa tamata rebe esi supu hlamate.