1Ya wejkawitl in toTajtzin Dios okintlapowij miek buelta in ya wejkawitl toweyitajwan por medio de yen profetajtin. Iwan tlatlamantle nik okintlapowij. Okemantia okintlapowiaya por medio de se temiktle, iwan okemantia okinmititiaya itlaj tlamantle kej yeskia okiteemikiaj, iwan noijki okintlapowiaya ika oksekin tlamantle.
2Pero axan itech yinmej ya iyakatlanka tonaltin, Dios techtlapowia por medio de iKone, katlej okimaktilij nochi tlamantle tlan onkaj iwan por yen iKone okichij in ilwikak iwan tlaltikpak.
3Yon iKone yen imawisotlanex in Dios, iwan iKone techititia kenamij in Dios. Yon iKone kinawatia nochi tlamantle tlan onkaj itech ilwikak iwan ipan tlaltikpak para ma mochiwa ijkón ken Yej kijta ika itlajtol, porke itlajtol kipia poder. Yej omikke iwan otechpajpakke de totlajtlakol, iwan satepan omotlalij ik iyekma in toTajtzin Dios ompa ilwikak kan tlanawatia.
4IKone in toTajtzin Dios okachi weyikistok (weyititok) iwan amo ken angelestin, iwan okiresibiroj se weyi tekiwajkayotl katlej toTajtzin Dios okimakak.
5Porke toTajtzin Dios mach semi okilwij akaj ángel: Tej tinoKone. Axan Nej nimoPapan. Nion mach okilwij akaj ángel: Nej nietos iPapan, iwan yej yetos noKone.
6Iwan noijki, nijkuak in toTajtzin Dios okualtitlanke iKone yankuiotl ixko yin tlaltikpak, okijtoj: Nochtin iangelwan Dios ma kiweyikixtikan.
7Pero de yen angelestin, kijta: Kintoktia in angelestin ma yekan ken ejekatl, iwan itekipanojkawan kintoktia ma yekan ken itliyo in tlitl.
8Pero de yen iKone, kijta: Tejwatzin Dios, titlanawatis iktlanke (ik tlami). Tejwatzin titlanawatia sa tekitl kuale iwan ipan melajka, porke nochtin tikinchiwilia ijkón ken moneki.
9Mitzpaktia nochi tlan kuale iwan mach mitzpaktia tlan amo kuale. Por yonik in Dios, katlej moDios, omitzmakak okachi miek pakilistle iwan amo ken mokompañeroswan.
10Iwan noijki kijta: Tejwatzin Señor, nijkuak mach ya itlaj oyeka, otikchij in tlaltikpak, iwan ika moma otikchij in ilwikak.
11Nochi tlan otikchij se tonale tlamis, pero tejwatzin, tietos iktlanke (ik tlami). Nochi tlamantle tlan onkaj tlajtlamis ken nijkuak tlajtlami se tzotzole.
12Tikkuekuelpachos kej se tzotzole, iwan tikpatlas ken nijkuak se motzotzolpatla. Pero tejwatzin mach keman timopatla, iwan monemilis mach keman tlamis.
13Dios mach keman okilwij nion se ángel: Ximotlali ik noyekma, asta ijkuak Nej nimitztlalis titlayekanke de yejwan katlej mitzkokoliaj.
14Nochtin angelestin yejwan san espíritus katlej kitekipanoaj in toTajtzin Dios, iwan Dios kintitlani para ma kinpalewikan katlej Yej yokinpejpenke para kinmakixtis de intlajtlakol.
