1Cani' Diosen' be'lene' da' x̱ozxta'ocho ca' diža' len beṉe' gwseḻe' goso'e xtižen'. Zan las gosoe' da' beṉe' ca' xtižen' na' nža'te ca goso'en to toe'.
2Perw ṉa'a ba zoa žin ža yeyož yežlion' na' Diosen' ba be'lene' chio' diža' dan' gwseḻe' Xi'iṉen' bedezejni'ide' chio'. Na' Xi'iṉ Dios nan' bene' yaba na' yežlio nga len yogo' bichle da' de nga na' gate'teze. Na' bengaquen' con can' gwnalaže' Diosen'. Na' gwžin ža gac ḻo na' Xi'iṉ Diosen' yogo' beṉac̱h, beyix̱e', na' bica'chle da' bene'.
3Na' Xi'iṉ Diosen' chlo'e catec beṉe' zaca' nac Diosen', ḻe cayaṉe' nac yic̱hjlaždao' X̱e' Diosen' nac yic̱hjlažda'ogüen'. Na' Xi'iṉ Diosen' chone' cont yaban', yežlion' na' da' ca' chle'echo ḻe'e yaban' na' yežlion' chesonen žin, ḻe nape' yeḻa' guac cont chac con can' že'. Ḻen' bzanḻaže' cuine' gote' cont bexi beyach chio' len xtoḻa'chon'. Na' beyož bene' ca' beyepe' yaban' zjaychi'e cuit X̱e' Diosen' ben' nac beṉe' zaca' juisyw na' chnabi'e txen len ḻe'.
4Naque' beṉe' zaca'chgua ca angl ben' cheson žin c̱he Diosen', na' Diosen' bene' cont ḻeca ba chacxenche' ca angl ca'.
5Diosen' biṉa' ye'e ṉe to angl ca dan' gože' Xi'iṉen', gože'ne': Len' naco' Xi'iṉa'; ṉa'aža ba blo'a zoaczo'. Na' biṉa' güe'e diža' c̱he note'teze angl can' bi'e diža' c̱he Xi'iṉen', gwne': Neda' gona' cont gacbia' naca' X̱e', na' gona' cont gacbia' naque' Xi'iṉa'.
6Na' da' nac Xi'iṉ Diosen' ḻa'zelagüe beṉe' zaca', da'nan' cate' Diosen' gwseḻe'ne' yežlio nga gwne': Yogo'ḻoḻ angl c̱hia' cheyaḻa' yesonxene' ḻe'.
7Na' c̱he angl ca' gwne': Chona' cont angl c̱hia' ca' beṉe' chesone' žin c̱hia' chesaque' ca be' dan' chec̱hj na' chesaque' ca yi' beḻ.
8Perw c̱he Xi'iṉen' be'e diža', gwne': Len' naco' Dios na' ṉabi'o toḻi tocaṉe. Na' ḻeca güen chnabi'o, chono' con da' zej to ḻicha.
9Chebedo' da' zej to ḻicha na' chgue'edo' da' malen'. Da'nan' neda' Dios ben' chonxeno' ba bena' cont zoacho' mbalazech ca note'teze beṉe'.
10Na' da' yoble gozna Diosen' c̱he Xi'iṉen': X̱ana' Dios, beno' yežlion' ža gwlaste, na' yogo' da' chle'echo ḻe'e yaban' ḻecze le' benon'.
11Na' gwžin ža cate' te c̱he yogo' dan' chle'echo ḻe'e yaban' na' ḻo yežlion', perw le' bi te c̱hio'; soaczo' toḻi tocaṉe. Na' gwša'a ḻe'e yaban' na' yežlion' ca to beṉe' chša' xe' cate' ba beyoen na' chaze' yeton. Na' ḻe'e yaban' na' yežlion', gono' len ḻen can' chon to beṉe' cate' chotob xe'. Perw le', tozecze can' gaco' toḻi tocaṉe, gwbat žin ža te c̱hio'.
13Diosen' biṉa' ye'e ṉe to angl ca dan' gože' Xi'iṉen', gože'ne': Gwche'edo' cuita' nga ṉabia'cho txen, na' gona' cont yogo' no chesegue'e le' yosozex̱jw yic̱hje' yosozenague' c̱hio'.
14Na' ca nac angl ca', yogue' zjanaque' beṉe' cheson xšin Diosen', na' chseḻe' ḻegaque' chesaclene' chio' ba gwleje' šjayzoacho len ḻe'.
