Hebelejën 1

1

2

3

4

5

6

7

8

9

10

11

12

13

¹˻Wë dee sëmbë, u kë taki wanlö soni da unu aki.˼ A bi dë sö a fesi taa Masa Gadu bi ta manda dee tjabukama fëën u de musu ta fan ku dee fesiten sëmbë fuu. Nöö sömëni pasi de bi ta fan ku de a peipei fasi.

²Ma nöö a di lasiti ten aki, nöö hën a manda di fëën seei Mii ko fan ku u awaa. ˻Wë nöö di Mii u Gadu u ta taki aki, a abi kaakiti e.˼ Biga di ten di Masa Gadu bi mbei mundu, nöö hën wë da di Sëmbë di a bi buta mbei hii dee soni tuu dëën. Nöö fa a sai dë, Gadu buta taa a o dëën hii soni faa abi de nëën maun.

³Fa joo si di Mii u Gadu dë, dee sëmbë, nöö i musu sabi taa Gadu seei wë i si dë kaa e. Biga hii fa Masa Gadu dë, ku hii waiti di a abi, nöö sö nöö di Mii fëën naandë dë tu. Nöö di fan fëën di a ta fan abi kaakiti e, ta hoi hii soni u mundu tuu a de kamian be de an ta waka fanjanfanjan. Hën wë bi dëdë di dëdë wasi dee hogi du fuu puu a u liba da u tefa a kaba, nöö hën a go sindo fëën a di möön kaba hei kamian a di letimaun së u Gadu a liba ala.

⁴Nöö fa u ta fan aki, dee sëmbë, nöö nëën i sa si taa Masa Jesosi hei möön dee basia u Masa Gadu Köndë gaanfa. Wë biga di në di a kisi taa a dë di Mii u Gadu, nöö hën ta lei limbolimbo taa a hebi möön de tuu.

⁵Wë biga na un juu ten Gadu bi kai wan u dee basia fëën köndë, miii fëën? Nönö, an bi kai de sö e. Ma di Mii fëën di u ta taki aki, hën nöö a kai sö. Biga a bi taki a di Buku fëën taa: Tide mi tja i ko buta a lanti fesi e, be de si i taa ju da mi mii, mi da i tata. Nöö hën a toona taki möön taa: Awaa de o ko sabi taa mi da i tata, nöö ju da mi mii.

⁶Nöö te Gadu o ta tja di Mii fëën ko a goonliba, nöö a di juu ten dë nöö a taa: Be hii dee basia u mi dee dë a mi köndë tuu ta lesipeki ën fu di hei di a abi. Sö Gadu taki u di Mii fëën e.

⁷Ma di soni di a buta u de sikifi u dee basia fëën köndë, an hebi sö e. ˻Futuboi u Gadu nöö de dë.˼ Biga di Buku sikifi taa: Dee basia Gadu abi, a ta buta de fu de musu sa waka kuma ventu. A mbei de futuboi fëën, kuma faja töngö sö nango ta ko kumafa a kë. Sö Gadu taki u dee basia.

⁸Ma te a o taki soni u di Mii fëën, ˻nöö an ta mbei sipootu e. Gadu seei a kai ën. Biga˼ a taa: Di Könu bangi fii i sindo nëën dë, Gadu, ja o kumutu nëën möönsö. Joo dë Könu u nöömö. Nöö di tii fii ta dë wan leti tii seei.

⁹Wë biga fa i sai dë, nöö leti libi hën i lobi. Ma hogilibi ja sa si a wojo seei. Nöö fëën mbei Masa Gadu, di Gadu fii, hopo i. A buta i hei möön hii dee otowan fii i ku de ta nama tuu. Nöö fa a hopo i dë, nöö ku gaan piizii, ku wai, a buta i a di hei dë. Sö Gadu taki fëën mii.

¹⁰Nöö söseei a wan oto kamian u di Buku ˻a kai ën “Masa” di˼ a taa: Masa, i wë seti di goonsei u di goonliba. Dee soni dee dë a mundu ala, nöö i wë mbei de buta sö e: ˻dee teeja, libawojo, sonu, dee soni dë tuu,˼ i wë tëmbë de sö.

¹¹Ma hii fa i si de sai dë seei, de tuu seei o kaba a sösö nöömö wan daka. Ma i, joo tan u nöömö. Fa i si de sai u de dë, de tuu o ko gaandi kuma koosu.

¹²Joo doba de kumafa de ta doba awoo koosu tja go buta a wan kamian fii toona tei otowan. Sö de o tooka e. Ma i, fa i sai dë, ja o tooka möönsö. Joo dë fu nöömö. Sö wë Gadu taki da di Mii fëën e, dee sëmbë.

¹³Ma na wan daka seei a taki sö da wan u dee basia fëën e. Söseei tu na wan ten a kai wan u de wan daka taa: Ko sindo a mi letimaun së aki be mi mbei dee felantima fii saka a i basu kuma wan bangi di i ta buta futu.

¹⁴Ma nöö dee basia fëën, de dë futuboi nöö na akaa fasi. Wa ta si de ku wojo ma Gadu ta manda de u de musu ta wooko da u dee sëmbë fëën, dee a buta fuu feni hii di heepi fëën di a abi u heepi u.