Ipru 1

1

2

3

4

5

6

7

8

9

10

11

12

13

¹Unt kor nga, tʉn nga anda kouwʉmʉn Jura wamp morung ui ei kʉn, ui ou ndupa, Got ndi, ik mat painui wu mbʉ nga keta ila nimba ekit nduⱡnga pʉtʉng.

²Wote akup, ui pora nimba enim ila, Got ndi, elim nga kangʉm ei nga keta ila, ik nimba tʉn ngonum. Wote, ui pora nim kʉn, kangʉm ei ndi, mel mbʉ pora, elim rʉp itangga nimba tʉpa mundrum. Wote, kangʉm ei ndi, muⱡ mʉi raⱡ mim itim.

³Got nga uⱡ eng nui mbʉ pora, kangʉm kʉn tepa rʉⱡang purum. Uⱡ ei ndi, kangʉm ei, Got nga uⱡ eng nui mbʉ pora, elim kangʉm morum ei mel, tʉn tʉpa ora ndonʉm. Elim nga ik ei, ronduⱡ minal petʉm ei ndi, mel mbʉ pora, etpa ronduⱡ mundrum. Wote, tʉn wamp mbʉ nga uⱡ kit wak rui uⱡ ei, etpa pora ndupa, elim muⱡ kona Got wu ronduⱡ pi, ei nga ki mbo orunga, wu nuim mumuk oⱡa orunga ei morum.

⁴Got ndi, kangʉm mbi ou kai ti ngurum. Uⱡ ei ndi, anggelo mbʉ nga mbi mbʉ ropa mana ndupa, elim oⱡa orunga Wu Nuim ei morum.

⁵Unt Got ndi, Jisas kundpa, nimba mel, “Nim na nga Kangʉm ei, akup na nim nga Tipanʉm ei,” nitim. Aldpa Got ndi, nimba mel, “Na nim nga Tipam ei mor, nim na nga kangʉm ei muⱡi,” nitim. Ik ei, Got ndi, anggelo ti, kundpa ni nʉndʉtʉm mon.

⁶Wote Got ndi, elim nga kangʉm kumina tenda ei, mʉi kona ila ngumba mana ndupa, nimba mel, “Got nga Anggelo mormin mbʉ ndi pora, wu ei nga mint mbi paka rundeing,” nitim.

⁷Wote Got ndi, elim nga anggelo mbʉ kundpa, nimba mel, “Kona kʉpkʉ mel nimba, wote elim nga kongun kindmant wamp mbʉ kundpa, ndip anmbil mel kapⱡa,” nitim.

⁸Wote Got ndi, kangʉm kundpa, nimba mel, “Nuim Got Wu Nuim Mumuk ei, rʉk rʉk molkʉn mint pukʉn! Nim nga wamp tʉpa mumuk rui uⱡ ei kʉn, uⱡ kʉn kai mbʉ kʉn, nokundkʉn moⱡʉn mint pin,” nitim.

⁹Wote Got ndi, kangʉm kundpa, nimba mel, “Nim uⱡ kun kai mbʉ numan ngukʉn, uⱡ kit mbʉ numan ngui nganggʉrʉn. Ei nga, Got ei, nim nga Got ei ndi, wamp wei mbʉ kelpa, nim mbi ropa tʉpa ambuⱡpa pʉl kopung ei, nim kʉn oi ndurum,” nitim.

¹⁰Aldpa Got ndi, kangʉm kundpa, nimba mel, “Wu Nuim ye! Unt kuimp tepa nim ndi, mʉi mim itin. Wote, nim nga ki raⱡ ndi, muⱡ ei itin.

¹¹Muⱡ mʉi raⱡ pora ninggil, wote nim rʉk rʉk molkʉn mint pin, muⱡ mbal na, ti ping norum ni mel, muⱡ mʉi raⱡ ping nomba.

¹²Nim ndi, kʉnʉng mat na ti, ambulk mʉkʉp rorʉn uⱡ ni mel, muⱡ mʉi raⱡ ambulkʉn mʉkʉp ruin. Wal pʉki unt nga na kat, mundʉk kelik, kont kat yant tʉk etmin. Uⱡ ni mel, nim ndi, muⱡ mʉi raⱡ i ku itin. Wote, nim rʉk rʉk molkʉn mint pin. Nim nga ui ti pora ni nanʉmba, mon,” nitim.

¹³Unt Got ndi, kangʉm kundpa, nimba mel, “Nim tʉp na nga ki mbo orunga mundamba kʉn, nim nga el rui wamp mbʉ, nim nga kʉmp puⱡ ila muⱡeing,” nitim. Wote Got ndi, elim nga anggelo tenda ti, ik ei mel kundpa, ni nʉndʉtʉm mon.

¹⁴Anggelo mbʉ namba mel? Muⱡnga ei ndi, anggelo mbʉ nga, Got elim kindmant kongun endʉtmʉn. Got ndi, wamp mat etpa rukʉr tʉtʉm wamp mbʉ, tʉk rapʉndʉk etmin.