Hebreo 1

1

2

3

4

5

6

7

8

9

10

11

12

13

¹Ed nabaon, namin ado ay waday inpaammon Diyos sin aap-o tako babaen sin nankalkaliana ay mamadto. Nankinalasi abe di inyat na ay nangipaammo.

²Ngem sin nay maod-odi ay agew pay, din nakikaliana en datako et din Anak na. Din nay Anak na di nangipaparsuaana sin am-in ay wada ya sisya di pinili na ay manawid sin am-in.

³Maiila abe en sisya din am-in ay kinasiged ya kinangaton Diyos, tan sisya din kostokosto ay kaipailaan di kinadiyos en Diyos. Sisya abe di mangol-olnos ya manmanngel sin am-in ay wada, et din kali na anggoy di os-osalena tan manakabalin. Idi nakdeng di inamag na ta malinisan din basbasol di ipogaw, nantaoli ed langit et tinmokdo sin makannawan Diyos.

⁴Isonga nanbalin ay nangatngato mo din aanghel. Siya abe din inpangadan Diyos en sisya et madaydayaw mo din ngadan di aanghel.

⁵Tan maga polos di anghel si nangibagaan Diyos en, “Sik-a din Anak ko. Ed wani ipailak ay sak-en si Amam.” Adi aben inbagan Diyos maipanggep si olay sino ay anghel, “Sin-ama kami.”

⁶Et sin nangibaaan Diyos sin besag ay Anak na sinan daga, kanana, “Dakayo ay aanghel ko, dayawen yo am-in sisya.”

⁷Siya na di kanan Diyos maipanggep sin aanghel, “Din aanghel ko et ibabbaak daida ay kaman dagem ya apoy.”

⁸Ngem din kanana pay sin Anak na et, “Sik-a ay Diyos, manturay ka ay eng-enggana. Nalinteg abe di iyat mo ay manturay.

⁹Laylaydem din siged ya kalkaliget mo din lawa. Isonga sak-en ay Diyos mo et peteg di dayaw ya ragsak ay indawat ko en sik-a mo din iib-am.”

¹⁰Kanana abe, “Sin damodamo, sik-a ay Apo di namarsua sin daga ya am-in abe ay wada ed daya.

¹¹Awni et mamaga da am-in, ngem sik-a pay et wada kas eng-enggana. Kaman dan bado ay domaan ya masokatan, tan awni et sokatam daida. Ngem mo sik-a pay, komakaman ka, tan magay pap-eng di biyag mo.”

¹³Maga abe di olay esay anghel ay nangibagaan Diyos sin inbaga na sin Anak na ay kanana, “Tomokdo ka sin makannawan ko ta dowanak ipagatin en sik-a am-in di kaibaw mo.”

¹⁴Sino ngarud di kasasaad di aanghel? Daida met din adi kaila ay mansilsilbi en Diyos, et ibabbaa nas daida ay en mamadang sin kaipoipogaw ay maisalakan.