1Id sangad-om nangang-angsan ya nateketeken ay ila nan inangnen Apo Dios ay nenkali isnan ikik-it tako ay naichalan isnan mamadtona.
2Ngem isnan naycha'y cha omochi ay akhew, tinot-oyan Apo Dios chatako isnan Anakna. Siya si Jesus ay nangipakhab-ana isnan lofong ya pinilina ay manawid isnan am-iam-in.
3Si Jesus nan langlang nan katangtangachan Apo Dios. Siya nan ostoosto ay ilan nan kinadchios Apo Dios. Eegnana nan lofong ya nan chaya isnan makabfalin ay kalina. Ya kakwasan nan nanalosana isnan fasol nan takho, inmey tinmokcho is kakannawan nan Makabfalin ay Dios id tongcho.
4Tay siya chi nay et adchawi ay entongcho si Jesus mo nan angheles. Siya akhes ay nan inpangachan Apo Dios ken siya et machad-ayaw mo nan ngachan nan angheles.
5Tay ay ke wad-ay anghel is nangnangwaniyan Apo Dios en, “Sik-a nan Anakko. Idwani, ipaammok ay sak-en nan Amam.” Paymo, “At sak-en nan Amana, ya siya nan Anakko.”
6Nan akhes kinwanina maipoon isnan kapapatekhan ay Anakna issan nangibfaalana ken siya isnan lofong et siya na: “Am-in kayo ay anghelesko, chayawenyo siya.”
7Ya nan kinwanina maipoon isnan anghelesna et, “Ifaak nan anghelesko ay kag chakhem, paymo kag enfidfichang ay apey.”
8Ngem isnan Anakna, kananan, “Sik-a ay Dios, maid pengpeng nan en-ap-apowam! Nalenteg akhes nan angnem ay en-apo.
9Laylaychem nan kinalenteg, sam et kholaen nan ngaag. Tay siya chi, sak-en ay Diosmo et linanaak sik-a isnan wadwad-ay ay mangipalal-ayad ken sik-a mo nan iib-am.”
10Kinwanina kayet isnan Anakna, “Sik-a, Apo, nan nangaeb isnan lofong issan laplapona, ya sik-a kannay nan nangaeb isnan wad-ay id tongcho.
11Am-in chana, et mapakawas cha, ngem sik-a et wad-ay ka is eng-engkhana. Kag cha am-in facho ay lommokhak.
12At lonlonem chana ay kag isnan kakhay, ya masokatan cha ay kag isnan facho. Ngem sik-a ad-i ka enfab-aliw, ya maid pengpeng nan tawenmo.”
13Maid akhes anghel ay nangwaniyan Apo Dios, “Itokchom is kakannawanko engkhana'y khab-ek nan fosom ay enkhatkhatinam.”
14Sino kay nan angheles? Ad-i ngen chaicha nan ad-i maila ay mensilsilfi ken Apo Dios? Chaicha nan fab-aalena ay mamadfachang ken chatako ay manawid isnan kaisalakan.
