WAEBLANIA 1

1

2

3

4

5

6

7

8

9

10

11

12

13

¹Umwaka Mulungu kalonga na wahenga zetu mianza bwando na mnzila bwando kubitila wahokozi,

²ila muna gamazua gano ga kimambukizo kalonga na tweye kubitila Mwanage ayo ulumwengu ulumbigwe kubitila heyo, na yasaguligwe kuvihala vinhu vose.

³Heyo iyo mng'alo wa yenzi ya Mulungu na kalinga kabisa na vija viyali, yovitenda vinhu vose vigendelele kukala kubitila mbuli zake zili na mhiko. Viyamambukize kuvisegeza vilozo, kakala hanhu ha hishima kumkono wa ukulume wa Mulungu Mkulu.

⁴Mwana wa Mulungu kawa mkulu ng'hani kubanza wasenga wose wa Mulungu wa kuulanga, kamba vidili twaga Mulungu diyamgwelele vidili kulu ng'hani kubanza matwaga gao.

⁵Kwavija Mulungu hamulongele msenga wake yoyose wa kuulanga, “Gweye iyo Mwanangu, lelo nigaluka Tataako.” Ama Mulungu hamulongele msenga wake yoyose wa kuulanga kamba, “Nie nowa Tataake, na heyo kowa Mwanangu.”

⁶Ila viyamgalile chaudele wake muulumwengu, kalonga, “Wasenga zangu wose wa kuulanga wamtambikile heyo.”

⁷Ila mmbuli ya wasenga zake wa kuulanga, Mulungu kalonga, “Mulungu kowatuma wasenga zake wa kuulanga kamba beho, na kamba moto ukwaka.”

⁸Ila mmbuli ya Mwana, Mulungu kalonga, “Undewa wako, gweye Mulungu, wokala milongo yose! Kowatawala wanhu zako bila uzenzeleganye.

⁹Gweye konogelwa na ganogile na kugehila gehile. Avo Mulungu, Mulungu wako, kakusagula gweye uwe uchana ya wayago, mkukubaka mavuta gogala ndeng'ha.”

¹⁰Na vivija kalonga, “Haichanduso, gweye Mndewa, kuilumba isi, na kuulumba ulanga na makono gako mwenyego.

¹¹Vino vobanangika, ila gweye kosigala. Volala kamba vivalo.

¹²Kovikunza kamba koti, na vogaluka kamba vivalo. Ila gweye kowa vivo mazua gose, na ugima wako wowa bule nziga.”

¹³Mulungu hamulongele msenga wake yoyose wa kuulanga mbuli zino, “Kala kumkono wangu wa ukulume mbaka vondaniweke wadumuka zako wawe kamba kigoda cha kwikila magulu gako.”

¹⁴Avo wasenga wa Mulungu wa kuulanga iwo walihi? Hewo iwo loho womsang'hanikila Mulungu na watumigwa na heyo kuwataza awo wondawabokele ukombola.