Hebreos 1

1

2

3

4

5

6

7

8

9

10

11

12

13

¹Tiamp gulalqui, Dios guninény de to xpɨngul gulalnɨ zienzi güelt ne de iralote mod pur de profet ni gunii xtiidxny,

²per anre aguninény dunnɨ pur Lliinny. Dios banchuuny irate de ni nuu lo guɨchliu ne llayabaa pur Lliinny. Ax irate absáanny laznaa Lliinny,

³laany ni nány bcháa nasaa xte Dios, laany ni nány zectiziac ni ná Dios. Ax laany zunény irate de ni nuu cun xtiidxny pur guelrnabee ni napny. Chi bialo gudeedny irate ni ná par teedny par yan pur de xtuldnɨ, ax guriny llayabaa lad naldí xte Xtadny Dios ni nap irate guelrnabee.

⁴Ziy xquel ax laany mazru sacny lo de ánglɨ xte Dios pur ni laaniy Lliinpac Dios.

⁵Te pur Dios quɨt guuti dxi niaipny nic tuby de ánglɨ: Liú noo llingaana, ne desde anre isienia dec liúy Lliinia. Ne nicza tuby de ánglɨ quɨt raipti Dios: Nare gaca Xtadu, chiy liú gacu lliinia.

⁶Per chi bxiaald Dios Lliinny lo guɨchliu, Lliinny ni nap guelrnabee zectiziac laany, ax guniiny: Irate de ánglɨ xtena, gulto Lliinia.

⁷Chiy chi gunii Dios pur de ánglɨ, laany guniiny: Nare runa de ánglɨ xtena zec bi, ne runzacadeb zec bal.

⁸Per pur Lliinny ax guniiny: Liú noo Dios. Guelrnabee xtenu a ná par chazy, ne iduibtiampte acanabiiu zec ni riáld.

⁹Liú rdxalaazu ni ná güen chiy rdxichníu ni ná mal. Pur ningui, Dios ni ná xtiozu bsiáldny liú mazru guelrzaclaaz que iraru de ni zuguaníu.

¹⁰Ziyza guniiny: Dad, desde gulo Liú banchuu guɨchliu ne yabaa cun irate de ni nuu lo guɨchliu ne llayabaa.

¹¹Iratedeni zuu dxi nitlodeni, per liú anabániu par chazy. Iradeni ziullydeni zec tuby lady;

¹²Sieetiudeni zec ni rsieety bniety xabni, ne schuudeni zec ni rchu bniety xabni. Per liú quɨt chúuti dxi ichu zec ni noo, ne iduibtiampte anapu guelnabány.

¹³Dios quɨt guuti dxi niaipny nic tuby de ánglɨ xtenny: Guri lad naldí xtena axtquɨ gúna gan inabiiu lo de ni rdxichné liú.

¹⁴Te pur irate de ánglɨ ná spírit ni cayun sirvɨ lo Dios, ax rxiaaldny laadeny par gacnédeny de bniety ni gap guelnabány par chazy nez lo Dios.