Hibru 1

1

2

3

4

5

6

7

8

9

10

11

12

13

¹Emua arau, God ghe aaippooaa tee kateva kateva tale propete atoa tale oroi ase salana, me ghe gheleilala va la ghauliaa inangarina ta tuvuita atoa.

²Me isaa oia tale airuuruu tale nau, God ghe aippooaa teeitala ta Natuna. Ta ngetana God ghe gheleila kosa ateva, me ia God ghe suiela va aue eghaa voto akapaaili.

³Eaapasunga naanamungaane ateva God, me ia nim nonginaaili Tamane. Me tale inangarina ateva sarasarakanaaili ia, esuusuei voto akapaaili tale kosa ateva tani toka. Nau ghe ruula uunguaa tani ghelei salana atikirighi tani ghelei eraarangisanaila tale kaluira ssavoto, ghe toka siola epona liu, tale pai muenna ativilau ta lo ateva sarakanaaili ia me iaaili epona, eaaimatoonga va matuutuliena ia.

⁴Me ia God ghe anamunamunganeiela ta ensolo atoa, nim nongina ararina ateae God ghe taue lao sio etana namungaili ia ta ensolo atoa.

⁵Poli God karika ghe ue ta teva ta kapuna ensolo atoa va, “Io natughi io, ghaine nge tamami ieghila.” Me tee, karika God ghe uela ta teva ensolo va, “Aue tamana etaghi, me ia aue natughu ia.”

⁶Ta nau God ghe maeaa sio natuna mua ateva tale kosa ateva, ghe uela va, “Ila akapa kapuna ensolo atoa God la tani kkaueinia.”

⁷Me tani auliaa ensolo atoa, God ghe uela va, “Egheelei kapuna ensolo atoa va ila kuukuu ila me kapuna tau ngai nongonongo anna atoa la kura ramerame.”

⁸Me tani auliaa Natuna ateva, ghe uela va, “God, aitokatokam ateva aue etoka liu. Uaaitoiaa kapum taumattu ngatoa tale nighulughuluena.

⁹Uaailousiaa saa voto ghulughuluena, me usessa tee voto sesa, liuna avalua o me God, kapum Goto ateva ghe suitoongainiola, me ghe ghelei emasimasieiliiola, me masimasiaam elaulau mene katoa kapum.”

¹⁰Ghe mene uela va, “Vau palepale, io ughe gheleila kosa ateva tale aitiutiu, me ughe gheleila epona liu ta nimam.

¹¹Aue la kapa, me io aue utoka. Aue la poka nongina koloso aiaasae.

¹²Aue ughoula nongina koloso aiaasae pokane, la aaikolikoliaa tani ghaa velu pokane aiaasae me tani asae ouna, me io karika aue uaikolikoliaa, me maamauluaam, karika airuuruu etana.”

¹³Me God karika ghe ue ta teva ta ensolo atoa va, “Toka siola tale pai muenna ativilau, lomosina ta aghatoka sio lo atoa la sessa teeio euu me uatingina saoaa kkem etaira.”

¹⁴Me ensolo atoa saa ila? Ila spiriti ila la uungu ta God me esungisungila tani sausi lo atoa aue la ghaa niasaangi.