Hibru 1

1

2

3

4

5

6

7

8

9

10

11

12

13

¹'Ua na mai 'i nao, God fata fuana kobora kia ki ana kada 'oro ma ana ru 'e'ete ki ana profet ki.

²Boroi ma ana maedangi 'isi ne ki, nia fata na fua kulu ana na Wele nia. Ma ana Wele nia ne, God ka saungainia ru ki tafau, ma nia laugo ne God ka fili nia fua ka too ana ru ki tafau.

³Na Wele God nia ka fatainia madakwalae God 'initoa, ma keroa bobola go. Ma sulia laugo na nikilalae ana fatalana Wele God ne, nia dau fangasia ru ki tafau fuana nao si sui. Ma 'i buri'ana nia lafua na abulo ta'alae kia ki, nia ka fi oli 'uria 'i langi, ma ka to ana kula ni 'initoa ana bali 'o'olo ana God ne nia 'initoa ka tasa.

⁴God fa'initoa na Wele nia ka tasa liufi na 'ainsel ki, dia laugo na sataeru ne nia kwatea fuana Wele nia 'initoa ka liufia na sataeru ne nia kwatea fuada na 'ainsel ki.

⁵Sulia God be fata 'uri fuana Wele nia, “'Oe na Wele nau, ma 'i ta'ena nau na ne Maa 'oe.” Boroi ma 'ua na mai God nao si fata go 'urinai fuana ta 'ainsel. Ma tau 'ua na mai, God ka fata laugo 'uri sulia na Wele nia, “Nau kai Maa nia, ma nia kai Wele nau.” Boroi ma God nao si fata go 'urinai sulia ta 'ainsel.

⁶Ma ana kada ne karangi fuana God ka kwatea mai na Wele 'initoa nia 'uria na molagali, nia ka fata 'uri, “Na 'ainsel nau ki tafau kera ka fosia.”

⁷Boroi ma sulia 'ainsel ki, God ka fata 'uri, “Na 'ainsel nau ki ne kera rao fuaku, nau ku kwate ma kera ka dia na sasaule ki ma na ere ki.”

⁸Ma sulia na Wele nia, God ka fata 'uri, “'Oe ne God, ma na 'Initoe 'oe nia kai toto firi. Ma 'oe gwaungai fafida na wane 'oe ki ana 'o'oloe.

⁹'Oe eele fainia ru ne 'o'olo ki, ma 'oe sisikona ana ru ta'a ki. Ma sulia ru nai, nau God 'oe, nau ku fili 'oe, ma nau ku kwatea laugo na eelelae baita fuamu ana fabaitalae liufia ne nau ku kwatea fuana wane kwaimani 'oe ki.”

¹⁰Ma God ka fata laugo 'uri fuana Wele nia, “'Aofia 'ae, ana safalilana mai, 'oe saungainia na ano ana 'abamu talamu, ma 'oe saungainia na mamanga.

¹¹Ma sui boroi 'ana ru nai ki kai sui, 'oe mauri toto firi. Kera kai ta'a dia ta maku 'ua.

¹²Ma 'oe lumida dia ta wane be lumia ta maku 'ua. 'Oe rokisida dia ta maku. Boroi ma 'oe ne, nao 'oe si rokisi, ma na maurilamu nao si sui.”

¹³Aia, ma God ka fata 'uri lau fuana Wele nia, “'Oe gouru 'i bali 'o'olo aku, ma 'oe gwaungai fai nau, makwalia kada nau kai alua malimae 'oe ki farana gwaungaie 'oe.” Boroi ma God nao si fata go 'urinai fuana ta 'ainsel.

¹⁴Aia, na te ne na 'ainsel ki? 'Ainsel ki kera ne anoeru ne kera rao fuana God. God odua na 'ainsel ki fuana kwai'adomie ana wane ne nia famaurida ki.