Ibrupipol 1

1

2

3

4

5

6

7

8

9

10

11

12

13

¹God i bin spik prapa longtaim de pas, tru dem spesilmesizman, plentitaim lo diprenwei po ol ate blo yumpla.

²Nau lo dem lasdei, God i tok po yumpla tru Boi blo em. Ane em i bin promis ebriting po Boi blo em. Em i bos blo ebriting. Ane tru Boi blo em, God i bin meke da wold ane ebriting wea i stap insaid.

³Da Boi i sain prom dat seim sainilait, da truglori blo God, ane ebriting baut da Boi i seimkain wase God. Dem prapa nadakain strongwod blo em meke da wold ran stret. Dem strongwod blo em i kipe ebriting tugeda. Apta wen em bin ded po meke yumpla pri prom sin, em bin go antap eben ane em sidaun lo da raitansaid blo da prapa nadakain big God blo eben.

⁴Diswan i soem da Boi blo God, em i mo mina big den dem einzel. Seimkain po da neim wea God i bin gibem, i mo mina big den dem neim blo dempla.

⁵God i no bin spik dem tok po dem einzel wanem em bin spik po Zizas diskain: ‘Yu Boi blo mi. Tidei ai PapaGod blo yu.’ Ane God i kip tok da seim tok gen: ‘Ai gobi PapaGod blo em, ane em i gobi Boi blo mi.’

⁶God i bin soe da pasbon Boi blo em uda kare lo. Den em bin sanem kamdaun po da wold ane em bin spik: ‘Lete ebridem einzel blo God wosip em.’

⁷God i bin singaut ol einzel blo em ane spik po dempla: ‘Yupla i gobi ol mesinza blo mi, yupla gobi wase da win i blou ane yupla gobi wase pleim blo paia.’

⁸Bat po da Boi blo em, God i spik diskain: ‘Yu God, ane yu gobi king poeba ane eba, ane yu gobi bos blo ebribodi, ane go zaze ebribodi lo da raitwei.

⁹Yu no labe samting wea i rong, bat wea i mata rait, daswai God i God blo yu, ane em i bin anoint yu, kapsaid plenti oil antap lo yu, oil blo glad, moglad den eni nada man bin gedem.’

¹⁰Ane God i kip spik: ‘BosLod, de prapa longtaim pas, yu bin meke da ert. Wea oun an blo yu, yu bin meke da skai ane ebriting de.

¹¹Demting i go pinis, bat BosLod, yu nogo pinis. Yu go mata stap poeba. Demting i go kam wase oul klos wea i brok ane sakwei.

¹²Yu go rolemap demting wase mat. Demting i go wase klos wea i luze kala blo em. Ol go sakwei. Bat yu go mata stap da seim. Yu nogo kam oulman.’

¹³God i no bin tok demkain po ol einzel wase em bin tok diskain po da Boi blo em: ‘Sidaun ya lo raitansaid blo mi, da ples blo ona, antil ai go bite ol enami blo yu, ane meke dempla leidaun plat prant wea put blo yu.’

¹⁴Bat dem einzel i mata ol sebant blo God. Dempla i ol spirit wea God i sanem po lugaut dem pipol uda God i go seibem.