Hebreos 1

1

2

3

4

5

6

7

8

9

10

11

12

13

¹Rojertan ri Dios ukꞌiyal laj xuqꞌalajisaj Rutzij chike ri qatiꞌ-qamam kuma ri qꞌalajisanelabꞌ, yey ri qꞌalajisanelabꞌ ukꞌiyal uwach ri qꞌalajisanik xkiꞌan chikiwach ri tinamit.

²Chupa kꞌu wa kꞌisbꞌal qꞌij oj kꞌo wi, ri Dios xuqꞌalajisaj ribꞌ ruma Rukꞌajol. Yey ruma Rukꞌajol xuꞌan ronoje taq ri kꞌolik, puqꞌabꞌ Rukꞌajol uyaꞌom wi ronoje

³y che Rukꞌajol kilitaj wi runimal uwach uqꞌij ri Dios. Jekꞌuriꞌlaꞌ, rukꞌuꞌx ri Dios e junam rukꞌ rukꞌuꞌx Rukꞌajol, ri Jun chapayom re ronoje taq ri kꞌolik rukꞌ ruchuqꞌabꞌ Ruchꞌaꞌtem. Ekꞌuchiriꞌ uchꞌajom chi ri qamak, xeꞌtzꞌula puwikiqꞌabꞌ ri Dios chilaꞌ chikaj.

⁴Rukꞌajol ri Dios más kꞌo uwach chikiwa ri ángeles, ma che Rire xyaꞌiꞌ wi jun bꞌiꞌaj más kꞌo uwach chwa ri bꞌiꞌaj ke ri ángeles.

⁵Yey ri Dios na xubꞌiꞌij ta kꞌana waꞌ che juna ángel: Riꞌat at Nukꞌajol yey Riꞌin in Aqaw; waqꞌij kꞌu riꞌ kanqꞌalajisaj waꞌ. Yey na jewaꞌ tane xubꞌiꞌij puwi juna ángel: Riꞌin kinuꞌan in Uqaw Rire yey Rire kuꞌan Nukꞌajol Riꞌin.

⁶Yey ri Dios echiriꞌ xutaq lo Rukꞌajol che ruwachulew, jewaꞌ xubꞌiꞌij: «Konoje ri ángeles re ri Dios kiloqꞌnimaj uqꞌij Rire» xchaꞌ.

⁷Paqatzij wi ri Dios jewaꞌ kubꞌiꞌij pakiwi ri ángeles: Rire kuꞌan chike ru ángeles e aj chakibꞌ re Rire, e pachaꞌ tew kawelelik y pachaꞌ urepebꞌal aqꞌ kachaꞌ.

⁸Noꞌj kꞌu chwi Rukꞌajol jewaꞌ kubꞌiꞌij: Rilal, Lal Dios yey ri taqanik la na jinta utaqexik y ri qꞌatbꞌal tzij e la, lik jusukꞌ.

⁹E lik kukꞌul kꞌuꞌx la ri lik jusukꞌ yey lik tzel kil la ri mak. E uwariꞌche ri Dios, ri Dios e la, xuchaꞌ lo la y xuya unimal kiꞌkotemal cheꞌla; ekꞌu más nim ri kiꞌkotemal xyaꞌ cheꞌla chwa ri kiꞌkotemal xyaꞌ chike ri jujun chik kachaꞌ.

¹⁰Yey je tanchi waꞌ kubꞌiꞌij: Rilal, Lal Qajawal, che ri jeqebꞌal loq Lal xyijbꞌan re ruwachulew; y Lal ꞌanayom re ruwa kaj rukꞌ ri qꞌabꞌ la.

¹¹Ronoje waꞌ, xa kakꞌisik, noꞌj Rilal na jinta ukꞌisik ri kꞌaslemal la. Ri kaj y ruwachulew xa kajarik jelaꞌ pachaꞌ kuꞌan ri qaqꞌuꞌ.

¹²Yey Rilal kajalkꞌatij la ri kaj y ruwachulew, jelaꞌ pachaꞌ kuꞌan junoq echiriꞌ kujal ruqꞌuꞌ: karesaj ruqꞌuꞌ qꞌeꞌl, kubꞌusu y kukoj ri kꞌasaq. Noꞌj Rilal na kajalkꞌatitaj ta wach la y na jinta utaqexik ri qꞌij la kachaꞌ.

¹³Ekꞌu ri Dios na xubꞌiꞌij ta kꞌana waꞌ che juna ángel: Chat-tzꞌula pa nuwikiqꞌabꞌ, y chawoyeꞌej na ri qꞌij echiriꞌ kebꞌenuya ri tzel kebꞌilow awe chuxeꞌ rawaqan.

¹⁴¿Saꞌ kꞌu riꞌ ri kiwach taq ri ángeles? E aj chakibꞌ kakiloqꞌnimaj ri Dios yey etaqom lo che kitoꞌik ri kekꞌuluw ri kolobꞌetajik re ri Dios.