Hibru 1

1

2

3

4

5

6

7

8

9

10

11

12

13

¹En avong mulamu, Ahi selus min avu keil orer avong houlu ka en sise houlu ka en provet keil.

²Ka en avong ekor keil ekek, kei selus min ir ka en Natnali. Kei rie lat Natnali keke voum rohtoh en tounah vasi keil koa mul, ka vat kati keke hesan tounah vasi keil mini.

³Suvalien kati onen Ahi mul ien, ka kei mul rie lat hetetamenien onen Ahi suval kilas tai mul rie lat titinien ten meteiai. Ral min keihoen ten selusien onen, mul sakin tounah vasi koa mumoni val vousil rendemien onen. Ka navong mum vasin tounah keke vakas motein meatin keil ran tisaen keil one keke methos onen Ahi kilea val en keil, kei va rondan en usite matu ten vulin ten keihoen onen Ahi en out nesa koa titinien ten hetetamenien ka keihoen onen mariso mok.

⁴Ahi sakin Natnali vi hetetamen imok lohlin angelo keil. Veni eis koa Ahi sani mini hetetamen imok mulin eis one.

⁵Koanek anatin veni Ahi rovitentei min etai angelo keil vahit, “Keik kovi Natkuli, ka kosa, numai navi Tata onom.” Ka usil etai angelo, Ahi rovitentei vahit, “Inau nihi Tata onen, ka kei hehi Natkuli.”

⁶Evus, navong Ahi vit vasila moeite onen vamai en out netan, viteni vit, “Angelo vasi keil onen Ahi iha netan mini.”

⁷Ka en usite onen angelo keil, kei viteni vit, “Ahi sakin angelo keil amum mini suval avi eang keil. Ka avi meatin toumien keil onen koa amum mini suval avi ahang koa vilhili.”

⁸Ka usil Natnali, kei viteni vit, “Losilkatien onom, O Ahi, hel lisenges ka lisenges. Keik kolei kat revi meatin keil onom musil asa koa mal.

⁹Em vat tounah koa mal ka tinom kat sakkalkalien keil. Sakini Ahi, Ahi onom, rie latuk keke kovakur houhouen ka sien valin koakeil aro ral minuk.”

¹⁰Ka kei viteni mun vit, “O Asuv, en avong mulamu, keik komumon out netan, ka komumon teilang ka tounah koa mul ien.

¹¹Avaseini keke tounah keil enek ivupuol, keik kitos. Tounah keil enek imatu ka imande hesuval eisin keil.

¹²Anatin, keik kilum lat keil hesuval avi musmus ka kisoni heha. Ka kikekes eni hesuval avi eisin keil ka kumon tounah keil ihi heite hau. Ka keik kil vatte hetas lisenges, moulien onom sakras vavus.”

¹³Ahi rovitentei min etai angelo keil onen vahit, “Keik kitondan en vulin ten keihoen ekek en usite matu hetokol avong koa niling koakeil avi vativieh onom il en hem.”

¹⁴?Angelo keil avi asa? Keil avi ninin keil koa amum min Ahi. Ka kei mul sila keil avaha avakataun koakeil rie lat keil keke voutut moulien one.