1Varekana čirla o Del vakerelas ke amare dada buterval the but sposobenca prekal o proroka,
2ale akana andre kala posledna dživesa prevakerďa prekal peskero Čhavo, saveha stvorinďa sa, so hin pro ňebos the pre phuv, a ačhaďa les sar ďeďičos savoreske.
3Le Devleskeri slava avel avri le Čhastar a hino ipen ajso sar o Del. Ov savoro ľikerel peskere zorale laveha. Sar dokerďa oda, hoj obžužarďa le manušen le binendar, bešľa peske andro ňebos pal e čači (pravo) sera le Nekzoraledere Devleske.
4Ov ačhiľa bareder sar o aňjela, avke sar o nav, so les o Dad diňa, hin bareder sar lengero.
5Se o Del šoha (ňikda) na phenďa ňisave peskere aňjeloske: “Tu sal miro Čhavo, adadžives ačhiľom tiro Dad.” A na phenďa lenge: “Me avava leskero Dad a ov ela miro Čhavo.”
6A sar o Del bičhaďa andro svetos peskere jekhore Čhas, phenďa: “Savore aňjela mušinen anglal leste te banďol.”
7Pal o aňjela o Del phenel: “Ov kerel peskere aňjelendar balvaja a peskere služobňikendar jagale jaga.”
8Ale pal o Čhavo phenďa: “Tiro tronos, ó, Devla, hino furt pro furt a kraľineha čačipnaskere žezloha!
9Zakamľal tut andro čačipen a našťi avri ačhes o nalačhipen, vašoda tut o Del, tiro Del, pomakhľa le olejoha pro radišagos buter sar olen, ko hine tuha.”
10Ov the phenďa: “Tu, Rajeja, anglal savoreste kerďal e phuv a tire vastenca kerďal o ňebos.
11On našľona a sa phurona sar o uraviben, ale tu aveha furt.
12Tu len zapačareha sar o plašťos a čerinena pes sar o gada, ale tu sal furt jekh a tire berša šoha na preačhena.”
13Se o Del na phenďa ňisave aňjeloske: “Beš tuke pal miri čači (pravo) sera, medik tuke na thovava tire ňeprijaťeľen tel o pindre.”
14Akor ko hine o aňjela? On savore hine o duchi, save služinen, a hine bičhade le Devlestar te služinel le manušenge, save prilena o spaseňje.
