1Gebii, pineokit te menge telekeliwat te kagi te Timanem se peg-ikagi din diyà te menge kemonaan tadon Judiyo. Mekedita se peg-ikagi diyà kandan, aw medita se kinemoloan te peokit te peg-ikagi din kandan.
2Meneng songkani, sebad den se ininang te Timanem, so pineokit te Batà din si Jesu Cristo se peg-ikagi din kenitadon. Pineokit heman ki Jesu Cristo se peg-inang te Timanem te keneyonan. Sikandin heman se pinemallì te Timanem amon menig-apò te kedita.
3Pineokit heman kandin, ipegpekità se kelangkaw te Timanem, aw sikandin se egkitaan tadon te ketanem te Timanem. Sikandin se egbayà-bayà te kedita te neinang dini te keneyonan pineokit te kagi din metolos. Pegkepenga din te miglinis kenitadon lekat te salà, minolì sikandin doton te langit, aw minonsad sikandin kidoen te tangkil te Timanem Melangkaw amon lomowan doma din.
4Pineokit kenyan, impetaga-taga te Timanem te labi pa melangkaw si Jesu Cristo diyà te kedita te anghil. Labi pa heman melangkaw se inggulal din kandin diyà te kedita te anghil.
5Wedad palos anghil inikegiyan te Timanem iling te inikagi din diyà ki Cristo, “Sikona se Batà ko, aw ipetaga-taga ko den te siaken se Amay nikaw.” Si Cristo olò heman se inikegiyan te Timanem kani, “Siak se Amay din, aw sikandin se Batà ko.”
6Te agpet isogò te Timanem se ontò melangkaw Batà din dini te keneyonan, minikagi heman se Timanem, “Simbahen sikandin te kedita te anghil te Timanem.”
7Seini se inikagi te Timanem tepad te pegkesawol te menge anghil, “Mepakay aw inangen te Timanem se menge anghil iling te kelamag aw apoy, aw yan se ibeg din.”
8Meneng kenà onawa se inikagi te Timanem tepad te Batà din, so minikagi sikandin, “Sikona Timanem se lomowan te wedad temanan. Metòlid se peglowan nikaw.
9Egkeibeg ka te metòlid. Eked ka keibeg te medaet. Yan se doun te siaken Timanem nikaw se mig-inang kamno labi pa melangkaw diyà te kedita, aw nemegay a kamno te ontò keluba.”
10Doen heman sebad kagi te Timanem diyà te Batà din, “Te keteboan, sikona Pengolo se mig-inang te tanà. Sikona heman se mig-inang te kedita doton te langit.
11Pengkey megkewedad se kedakel niyan, meneng wedad temanan nikaw. Megketapay se tanà aw langit, iling te pepidit megkedaet.
12Penga niyan, iling te peglepì te tapay saol, selilinan no se langit aw tanà. Meneng sikona se eked palos keselilini, so wedad palos temanan nikaw.”
13Wedad palos anghil inikegiyan te Timanem iling te inikagi din diyà ki Cristo, “Onsad ka dini te tangkil ko lamig dàgen ko se menge poon no aw ipetolò ko dan kamno.”
14Nayan, netegahan tadon den ini. Se menge anghil, yan olò se egsogò-sogoen te Timanem. Pengkey eked dan kitai te otaw, meneng ipegsogò dan te Timanem amon megtabang dan te kedita tadon ipelowà din.
