Epireeyɛ 1

1

2

3

4

5

6

7

8

9

10

11

12

13

¹Uléécɑɑ yɛ pɛɛ hɑ́i mɛkɛɛ-mɛ nɛ ɑntepuyɛ ritikilɛ uú nɛ mɛ́wee mpehẽ mpehẽ kɛ́mɛɛ nsímɛ́ pirɔ́sɑ́ɑyɑhɑ mɛsɛ́rɛ símisi.

²Ukɛpipi kuú nɛ siyɑ́ɑ tɔrɔɔ nsí kɛ́mɛɛ ritiki uú nɛ rɔ́ símisi. Uyɛ̃ kuu kɔ nɛ ritiki uú nɛ ḿpɑ́ yo wɑi. Lɛ̃ nnyɑ kuu kɔ u wɛ́ɛ uu ḿpɑ́ yo uɑnipɛ-i wɑi rɛ ukɛ́ n te.

³Uléécɑɑ Kɛpipi kɛ́mɛɛ́ kɛ Uléécɑɑ mɛyɔɔpi ɑmɛ léemɛlɛ̃ lin tɛ́lu. Kɛkɛɛ mɛyíkíyiki lɛ̃ kɛ Uléécɑɑ uu ń we nyísɛlɛ̃. Kɛkɛɛ kɛnsímɛ́ mɛɛ ńnɑŋɛ m mɑ́ nɛ kɛtẽ nnɛ́í múílɛ̃ ḿpɑ́ yo lin nɛ mɛsɛ́rɛ we. Kɑkɛ pisoi ɑkópɛ pihɛɛrɛ ḿ mɑsí, ɑkɛ pɛɛ́ hɑ kɛyómɛcɑɑ-pɔ uyɛɛ n-yɔ́ɔpinɑŋɛ píimɑ m mɑ́ kulukɛ-lukɛ-mɛ̃ kɛ́yukɔɔ́tonɛ-i tonɛ.

⁴Uléécɑɑ Kɛpipi yɛ piléécɑɑtumɛ nnɛ́í ríyu felɛ. Lɛ̃ nnyɑ kuu rinyíri tɛɛ pinnɛ́í ɑkɔ́ mɛyɑ̃́ n fe kɛ hɛ.

⁵Pikɛcɔpɛ úye kuu kɛtumɛ mɑɑlɛ̃ tɛ: Pɔ Kɛnɛ́pipi lɛ, kɑí nɛ nɛni n kpísi, nɛ́ɛ pɔ́ mɑ́ri? Pikɛcɔpɛ úye kuu kɛtumɛ símɑɑlɛ̃ uú nɛ mɑɑ rɛ: Nɛ́ɛ yɛ́ hɑ Uusɑɑ uyɛ̃ ukɛ́ kɔ Kɛnɛ́pipi?

⁶Amɑ́ kumúŋɛ́ kpɛ-i kɛ Uléécɑɑ uú pɛɛ Ukɛpipi foí kɛtẽ kɛcɑ́ɑ́ ń tummɛ, u pɛɛ́ mɑɑ rɛ: Piléécɑɑtumɛ nnɛ́í pikɛ́ riwulɑ pikɛ́ kɛ yɑ́ɑ́si.

⁷U pɛɛ piléécɑɑtumɛ pɔ̃́ nkɔ́ mɑɑ rɛ: Uléécɑɑ yɛ piléécɑɑtumɛ pɑnsɛsɛlɛ kuyɔ uu upikɛikɔ́ wɑisɛ yɑrɛ inɑlempi.

⁸Amɑ́ u Ukɛpipi pɔ̃́ nkɔ́ mɑɑ rɛ: Hói Uléécɑɑ, tipɔ́yɔ́ɔpitũ nɛ welɛ nɛ ḿpɑ́ píyei-pɔ. Pɔ ɑsei pɑnsɛsɛlɛ kupɔ́yɔ́ɔpinɑɑpi.

⁹Pɔ lɛlɛɛ ɑsei m mɑ́ lɑlɛ, pɔn mɛwɑi kópɛ kɛsu. Hói Uléécɑɑ, lɛ̃ nnyɑ kɛ nɛ̃́ Upɔ́léécɑɑ ɑm pɔ́ wɛ́ɛ ɑm mpɔ́ɔnɑrɛ mɛkpɔ ripɔ́yu kɛcɑ́ɑ́ kɔɔni ɑm kɔ pipɔ́sɑ́cɔ kɛcɔpɛ pɔ́ wɛ́ɛ.

¹⁰Uu kɔ kpɑ́ rɛ: Pɔ̃́ Upíimɑ, pɔ́ɔ hɑ́i kɛ́korɑɑnɛ-mɛ kɛtẽ wɑ ɑɑ kɔ nɛ ɑpɔ́nípɛ cirɛ kɛyómɛcɑɑ yóóni.

¹¹Lɛ̃ nnɛ́í yɛ tɛnɛnɛ tɔkɛ́ li pɑɑ. Amɑ́ mɛsɛ́rɛ kɛ pɔ́ɔ yɛ́ n we. Kɛtẽ nɛ kɛyómɛcɑɑ yɛ kpuruninɛ kɔ́ti-kɔ́ti yɑrɛ mɛlɑpɛ.

¹²Pɔ́ kɑm ɑɑ li pílɛsi yɑrɛ kɑpi yɛ kutúkɑnkɑ cɑɑcɑɑ m pílɛsi mɛcɔ. Pɔ́ kɑm ɑɑ pi consɛ yɑrɛ kɑpi yɛ kɛtúkɑnkɑ n consɛ mɛcɔ. Amɑ́ mɛsɛ́rɛ kɛ pɔ́ɔ yɛ́ mɛsɛ mmɛ́ n we. Mpɔ́fɑ́ɑ ɑŋmɛ̃ ɑ́ɑ yɛ́ kutɛnɛ wɑ.

¹³Uléécɑɑtumɛ úye kɛcirɛ kuu kɛtumɛ mɑɑlɛ̃ tɛ: A kunɛ́lukɛ-lukɛ-mɛ̃ kɛ́yukɔɔ́tonɛ-i tonɛ. Likɛ́ hɑ nɛ tu pɛɛ́ uyɛ-i kɑm yɛ́ pipɔ́lɑ́ɑrɔ kɛpɔ́nyɑ́lɛ-i rinwúlɑsɛ.

¹⁴Piléécɑɑtumɛ yɛ yo lɛ? Pi ifɑ́ɑ inyinɛ lɛ yɛɛ Uléécɑɑ pikɛi n wɑi. U pi tummɛlɛ rɛ pikɛ́ pɛ̃ ɑyu kɑi yɛ́ ń lɔ lɛ̃́.