Text copied!
CopyCompare
An Maayo na Barita Hali sa Dios - Hebreo

Hebreo 1

Help us?
Click on verse(s) to share them!
1Mga kaigmanghudan sa pagtuod, kasadto na panahon, damo na beses kag sa manlain-lain na paagi nagsurmaton an Dios sa aton mga kalulululuhi paagi sa mga propeta,
2pero yana nagsurmaton naman siya sa aton paagi sa iya Anak na ginpalalang niya san kalibutan kag ginpairedar san tanan.
3Ini na Anak amo an kabanaagan san glorya san Dios kag pareho gayod san iya pagka-Dios. Ini man na Anak an nagaantabay kag nagasakop san bilog na kalibutan paagi san iya makagagahom na surmaton. Pakahimo niya sin paagi na malinisan an katawuhan san inda mga kasal-an, nag-ingkod siya sa langit sa tuo san Dios na pinakamakagagahom.
4Kaya nagin mas labaw pa siya niyan sa mga anghel pareho na an titulo na ginhatag sa iya san Dios dati mas labaw man gayod ki sana na ginhatag sa inda.
5Nasabi ko ini kay wara man sin anghel na ginsabihan san Dios na, “Ikaw an akon anak kag ako naman yana nagin ama mo,” kag wara man gihapon sin anghel na ginpamanungudan niya sugad sini, “Ako an magigin iya ama kag siya an magigin akon anak.”
6Usad pa, amo ini an ginsabi san Dios san ipapadara na niya sa kinab-an ini na iya bugtong na Anak na, “Kinahanglan sambahon siya san tanan na anghel san Dios.”
7Amo man ini an ginsabi san Dios manungod sa mga anghel, “Ginahimo san Dios na bagaʼn mga hangin an iya mga anghel kag bagaʼn mga siga san kalayo an iya mga suruguon.”
8Pero manungod sa anak, amo ini an nasurat sa Kasuratan, “O Dios, an imo kahadian mapirme hasta na lang kag may katanusan an pagkahadi mo.
9Katanusan an imo gusto kag an ginahabuan mo an karautan. Kaya naman ginpalabi ka san imo Dios kag gin-galangan ka na may kalipay na labaw sa ginhatag niya sa imo mga kaurupdanan.”
10Sabi pa san Dios na, “Sa katuna-tunai, ikaw, O Ginoo, an naglalang san kinab-an kag an naghimo san kalangitan.
11Pareho ini mawawara pero ikaw ada lang pirme. Madudunot man ini na tanan pareho san mga bado.
12Titipigon mo na bagaʼn alikboy kag babalyuhan mo na bagaʼn liwanan na bado. Pero ikaw dili magabag-o kag dili matatapos an imo kaedadon.”
13Wara gayod sin anghel na ginsabihan san Dios na, “Mag-ingkod ka sa may tuo ko hasta na himuon ko na tungtungan san imo mga tiil an mga kaaway mo.”
14Niyan, kay labaw man gayod an anak sa mga anghel, nano man gali sinda? Sinda an mga espirito na suruguon san Dios kag ginasugo lang niya para magbulig sa mga tawo na amo an masasalbar.