Hebreos 1

1

2

3

4

5

6

7

8

9

10

11

12

13

¹Uncheeꞌ aatz oꞌtene, yolon u Tioxh titziꞌ qꞌu alol tetz viyolbꞌal. Jatpajul koꞌxh iqꞌila qꞌu kukꞌuy kumam. Utz kam koꞌxh txumbꞌal itxakunsa tiꞌ iqꞌilaleꞌ.

²Pek aatz cheel, nipajiqꞌilaꞌoꞌ. ViKꞌaol niqꞌilanoꞌ taqꞌo. Ayaꞌ viKꞌaol vaꞌl tiqꞌaqꞌal kuꞌen cheenaj qꞌu kam tu u vatz amlika txꞌavaꞌ tzaꞌ. Utz tetz qꞌu kam kajayil aqꞌel tu u Tioxh.

³Tan aatz viKꞌaol u Tioxh, aꞌ nikꞌucheꞌ abꞌil u Tioxh utz, jankꞌal chit vitechalil. Tan tiira ech itxumbꞌal aꞌ u Tioxh tzixeꞌ. Utz viyol viKꞌaol u Tioxh niatinsan qꞌu kam kajayil. Utz aatz maꞌtich taqꞌtu tibꞌ tiꞌ itxꞌaal el qꞌu kupaav, bꞌenjeꞌ tu Amlika. Utz kꞌujlel tisebꞌal u Tioxh tu u mam tijleꞌm.

⁴Tan tiira sibꞌ paalchu viKꞌaol u Tioxh vatz qꞌu aanjel. Tiira sibꞌ paalchu u tijleꞌm vaꞌl aqꞌaxyu, vatz u tijleꞌm qꞌu aanjel.

⁵Tan aatz u Tioxh, yeꞌxhjatu tal koj tu maꞌj aanjel ech tzaꞌ: —Axh unKꞌaol; vetvitzꞌpixsaꞌaxh cheel.— Texh koj te. Utz nikoꞌxh tal koj majte aas: —In iTat utz; unKꞌaol.— Chi koj tiꞌ.

⁶Utz yolon paj u Tioxh tiꞌ viKꞌaol vaꞌl aa yol tiꞌ qꞌu kam tu u vatz amlika txꞌavaꞌ tzaꞌ, vaꞌl ichajuꞌl. Tal tiꞌ ech tzaꞌ: —Kajay qꞌu aanjel saoksan iqꞌii.— Texh tiꞌ.

⁷Pek ech koꞌn nital u Yolbꞌal Tioxh tiꞌ qꞌul iaanjel tzaꞌ: —Nitaqꞌ bꞌens aanxel qꞌul iaanjel. Utz nitaqꞌ bꞌens echaꞌ taqꞌ xamal qꞌul ichaj.— Chia.

⁸Pek ech nital tiꞌ viKꞌaol tzaꞌ: —Yeꞌk iyaꞌebꞌal val iijleꞌm saꞌaneꞌ, techalla Tioxh. Tiira ijikomal vixeꞌal vaQꞌesalail. Echaꞌ bꞌaara; techlal ijleꞌm.

⁹Tan aꞌ chit vatz akꞌuꞌl ibꞌanax qꞌu kam ijikomal. Pek tiira onkonil saatz u yeꞌxtxoj. Echtzixeꞌt axh vetitxaaꞌaxh u Tioxh, ayaꞌ vaTioxh. Utz tuchꞌ txuqꞌtxunchil vettaqꞌ jeꞌ aseite taviꞌ, tiira paalchu vetiꞌan see vatz tereꞌn.— Chia.

¹⁰Utz nipajtal u Yolbꞌal Tioxh tiꞌ majte aas: —UnBꞌaal, axh bꞌanon u txꞌavaꞌ koꞌxtene tixeꞌtebꞌal qꞌu kam. Utz axh bꞌanon u amlika vaꞌl nikꞌuch val aaqꞌonibꞌal.

¹¹Utz sakoꞌnpaal qꞌu kam atziꞌ. Sakoꞌnqꞌaꞌlbꞌi, echaꞌ iqꞌaꞌlbꞌu oksaꞌm. Pek aatz axh tan, ech koꞌxh aatin bꞌenamen tziꞌ.

¹²Sakoꞌnpajabꞌus qꞌu kam atziꞌ, echaꞌ ibꞌusax oksaꞌm. Utz sachꞌexu atziꞌ, echaꞌ ichꞌexul oksaꞌm. Pek aatz axh tan, saꞌkojchꞌexpꞌaxh; saꞌkojmotx val aatineꞌ.— Chia.

¹³Utz yeꞌxhjatu tal u Tioxh tu maꞌj aanjel ech tzaꞌ: —Kꞌujach tunsebꞌal, voksa nal qꞌul akoontra satzeqꞌlebꞌal.— Chi koj te.

¹⁴Tan jolol koꞌn aanxel ichaj Tioxh kajay qꞌu aanjel atziꞌ. Utz nichajax ul tiꞌ ilochax qꞌuꞌl saetzan tiꞌ u chitpichil tu paav vatz Tioxh.