Hebreo 1

1

2

3

4

5

6

7

8

9

10

11

12

13

¹Anay pa sa, gambal Dyos an naan ta alinan ta na mga kaapuan paagi ta lain-lain na mga prupita ta tama na bisis daw ta lain-lain na mga paagi.

²Anduni, naan ta katapusan i na timpo gambal kanen an ki kiten paagi ta iya na Bata. Iya na Bata pabuat din na manunubli ta tanan na mga betang daw paagi man ta iya na Bata pabuat din kalibutan i daw kalangitan daw tanan na anen don.

³Paagi ki kanen na Bata Ta Dyos, makita ta daw kino gid Dyos an tenged daw ino naan ta Dyos naan man ki kanen. Gabeet kanen ta tanan na naan ta kalibutan i daw kalangitan paagi ta iya na pag-ambal tenged kanen an makagagaem. Pagtapos din ta pagbuat ta paagi ya na mga ittaw malimpyuan ta iran na mga sala, gapungko kanen naan tengnged ta Makagagaem Na Dyos naan dapit ta tuo naan ta langit.

⁴Pabuat an ta Bata Ta Dyos na gapungko kanen an naan tengnged ta Dyos pamatuod na mas datas iya na katengdanan kaysa ta katengdanan ta mga angil tenged papakala na kanen an Bata Ta Dyos. Mga angil an mga manugsirbi ta Dyos, piro kanen an a Bata Ta Dyos.

⁵Parti ta mga angil, nlaman ta na Dyos an ula gid gambal naan ta bisan isya ki danen ta iling ti, “Kaon ake na Bata. Anduni, gapamatuod a na yaken imo na Amay.” Ula man gambal Dyos an ta bisan kino na angil, “Kiten i mag-amay.”

⁶Ta timpo na dleen ta Dyos naan ta kalibutan iya an na Bata para ipakala din naan ta tanan na iya an na Bata may katengdanan na datas gid ta tanan paryo ta isya na panganay, ambal din parti ta iya na Bata, “Kyo tanan na mga angil ta Dyos, simbaen nyo kanen an!”

⁷Na gambal Dyos parti ta mga angil, ambal din, “Mga manugsirbi ko na mga angil mabuat ko na dasig paryo ta angin daw mabuat ko man na danen an may biskeg na gaem paryo ta gadaba-daba na apoy.”

⁸Piro, ambal din parti ta iya na Bata, “O Dyos, imo na pag-ari ula katapusan. Matareng imo na pagdumala naan ta mga ittaw.

⁹Nalipay ka na nakita no mga ittaw na gabuat ta miad, piro nalainan ka na nakita no mga ittaw na gabuat ta malain. Yon na yaken i na imo na Dyos gapili ki kaon na tagan ta kaw ta katengdanan daw kalipay na mas pa ta katengdanan daw kalipay ta tanan na duma ki kaon.”

¹⁰Ambal din pa, “Ginuo, kaon gabuat ta kalibutan i daw kalangitan naan ta una na timpo na ula pa bisan ino.

¹¹Tanan na mga pabuat no mawasak daw marwad piro kaon yan a, magpadayon ta ula katapusan. Tanan na pabuat no magdaan paryo na mga bayo gadaan

¹²daw silian no man ta bag-o paryo na mga pang-isleb na bayo palukot tenged dili en gamiten. Piro kaon yan a, ula gid gaisab, daw imo na kabui ula man katapusan.”

¹³Ula man gambal Dyos an naan ta bisan isya ta mga angil din, “Mungko ka di naan dapit ta ake i na tuo asta na mapirdi ko imo na mga kuntra na danen an paryo ta tungtungan ta imo na mga batiis.”

¹⁴Tenged iling tan ambal ta Dyos parti ta iya na Bata, basi may mambal, “Ino mga angil an daw ino tuyo ta Dyos parti ki danen?” Sabat ko na mga angil an manugsirbi na mga ispiritu na pailing ta Dyos na magtabang ta mga maluwas alin ta silot ta iran na mga sala.