Hebreo 1

1

2

3

4

5

6

7

8

9

10

11

12

13

¹Ñawpa Yaya Dioska kacharka paypa yachayninwa yachachikkunata, yaya rukunchi wañukunata achka kuti yachachinankunapa chikan chikan yachachinakunawa.

²Ashwan kunan kay allpa tukurihushkan punchakunapi Wawan Jesukristutami kacharka yuyarishkanta ñukanchita riksichinanpa. Manara nima ima tiyahushpanrami Yaya Dioska Wawanwa pakta tukuy tiyashkata rurarka. Chaymanta payta churarka tukuyta kamachik kananpa.

³Jesukristumi ñukanchita riksichin Yayan Dios chuyahlla punchashina yapa ali, chaymantapas atun yachayyu kananta. Pay tukuy kananwa rikuchishkanwa riksichin imashnami Yaya Dioska. Payka yapa yachayyu rimashkanllawa tukuy ima tiyakkunata kuyran. Paymi kay allpama shamushpan ñukanchiranti wañushpan uchanchikunamanta picharka. Chaywashami siluma rishpan tukuymanta pasa atun yachayyu Yayan Diospa kuskan partima tiyarirka paywa pakta tukuyta kamachinanpa.

⁴Yaya Dios Jesukristuta churarka tukuy angelkunamanta ashwan yachayyu kananpa. Payta Wawayni nishpan tukuy angelkunamanta pasa kananta rikuchirka.

⁵Nima shuk angelta rimarkachu: Kanka kikin wawaynimi kanki, kunan kanta wawata rurashkaynirayku nishpa. Chaymantapas nima shuk angelta rimarkachu: Ñukaka yayaykimi kani, kanka kikin wawaynimi kanki nishpa. Ashwan Kristullatami chasna rimarka.

⁶Chaymanta Yaya Dioska shuklla Wawanta kay allpama kachahushpan tukuy paypa angelkunata rimarka: Chay wawaynita kushichiychi nishpa.

⁷Chay angelkunamantaka kasna rimarka: Paykunataka wayratashinami, nina sintihuktashinami kachani munashkaynita ruranankunapa nishpa.

⁸Wawantakaranti kasnami rimarka: Kanka Dios kashpaykimi kamachinki wiñayparayku. Kuska alillatami kamachinki.

⁹Kanka alillata munakmi kanki, chikninkimi millaypa ruranakunata. Chayraykumi ñuka Yayayki Dioska kanta akllashkani kamachinaykipa. Tukuy runa masikikunamanta kantaka ashwantami kushillayachisha nishpa.

¹⁰Chaymantapas Wawanta rimarka: Kan Dios kashpaykimi nima ima tiyashpanra allpata silutapas rurashkanki.

¹¹Tukuy chaykunaka chinkarinkakunami, ashwan kanka chasnalla wiñaypa kawsanki. Tukuy chaykunaka churarinashinami mawkayashpan liki liki tukunkakuna.

¹²Chasna tukushpankuna shuk mawka churarinatashinami wichunki. Shuk mawka churarinata mushuwa kampyahukshina chay mawka allpata, mawka siluta wichushpa mushutana ruranki. Tukuy allpa silu tukurishpankunapas kanka tukuy uras chasnallami kanki, wiñaypata kawsanki nishpa.

¹³Yaya Dioska Wawan Jesukristullatami rimarka: Kuskayni parti tiyariy kamachinaykipa ñukawa pakta, kanta chiknik runakunata winsinaynikama kanta kasunankunapana nishpa. Manami nima shuk paypa angelkunata chasna rimarkachu.

¹⁴Angelkunaka Yaya Diostami alita kasuk kanahun. Chasna kasuk kashpankunami Yaya Dioska paykunataka kachan, tukuy maykankunami kishpina kankakuna, chaykunata yanapanankunapa.