1Le Dónbeenì yánkaa dĩ̀n ɓa ɲi-cúa fɛɛrowà wán á bíaráa lè wàn ɓùaawa. Le wó mu pɔ̃̀nna cɛ̀rɛ̀ɛ yi, á le bíoró làa ba mún sìíwà boo.
2Ɛ̀ɛ ká hã laà na kà wán hã pɔ̃̀nna vaa véeníi, á le dĩ̀n mí Za wán wee bíoráa làa wɛn. Lé le Za mu le dĩ̀n wán á léraráa mu bìo ɓúenɓúen. Lé orɛ́n le wã́a dó mu bìo ɓúenɓúen níi yi.
3Orɛ́n lé yìa le Dónbeenì cùkú beenì wee mi yi. Bìo á le Dónbeenì karáa lé bṹn ó orɛ́n mún karáa. O ɓuan mu bìowa ɓúenɓúen dĩ̀nía lè mí bíonì na pànká wi. Lé orɛ́n le Dónbeenì dĩ̀n wán á sɛ́raráa ɓa nùpua bè-kora día, á ɓa wee ce le yahó. Bṹn mɔ́n ó o yòó kará ho wáayi le Dónbeenì nín-tĩánì, dén na po mu bìo ɓúenɓúen.
4Làa bìo le Dónbeenì Za po poráa ho wáayi tonkarowà, lé kà síi á le yèni na le wee ve làa wo mún po poráa ɓa yèni.
5Le Dónbeenì dĩǹ yí bía làa wáayi tonkaro ɓúi le: «Fo lé ĩ Za. Ho zuia ɲii wán á ĩ lé mìn Maá.» Le mún dĩǹ yí bía bìo kà là a ɓúi: «Ĩnɛ́n á à wé ɓàn Maá, ó orɛ́n á à wé ĩ Za.»
6Ká pã̀ahṹ na le Dónbeenì tonkaa mí Za kĩ́nleso ho dĩ́míɲá yi, á le bía bìo kà: «Ho wáayi tonkarowà ɓúenɓúen ko ɓa wé ɓùaaní a.»
7À le ɓɛ̀n bía ho wáayi tonkarowà dã́ní yi le: «Le Dónbeenì wee wé à le tonkarowà kɛń lòn pinpiró, le wee wé à le ton-sáwá mu kɛń lòn dɔ̃hṹ dɛnní.»
8Ká le màhã́ bía bìo kà mí Za dã́ní yi: «Ũnɛ́n Dónbeenì, ũ bɛ́ɛnì díró ɲii máa fĩ̀ máa mi. Fo ò pa ũ nìpomu bìo lè ho térénló.
9Fo wa bìo térénna, fo ɲina mu bè-kora. Lé bṹn nɔn á ĩnɛ́n na lé ũ Dónbeenì á kúaa ho ɲiló ũ ɲúhṹ wán à zéení le ĩ tà ũ bìo. Lé bṹn wɛɛ́ra ũ sĩi. Ĩ dó ho cùkú foǹ á po mi ninzàwa na ká.»
10Le pá bĩnía bía bìo kà mí Za mu dã́ní yi: «Mu ɲúhṹ ɓúakáníi ká bìo ɓúi dĩǹ yí léra, á ũnɛ́n Ɲúhṹso lé fo léra ho tá, á lé fo mún léra ho wáayi.
11Bṹn bè-lénnia so ɓúenɓúen khíi vé, ká ũnɛ́n á à kɛń bĩ́n fɛ́ɛɛ. Ho wáayi lè ho tá wé è khè lòn sĩ̀-zĩ́nia.
12Fo ò bi mu lòn báká beenì á à bàrá, mu ù yèrèmá lòn sĩ̀-zĩ́nia, ká ũnɛ́n á à dĩ̀n làa bìo fo karáa, fo ò kɛń bĩ́n fɛ́ɛɛ.»
13Le Dónbeenì dĩǹ yí bía làa wáayi tonkaro ɓúi le: «Ɓuee kɛɛní ĩ nín-tĩánì, fúaa ká ĩ ɓúrá ũ zúkúsa ũ tá á ũ bò ũ zení wán.»
14Á ɓa tonkarowà na wee lé ho wáayi ɓɛ̀n lé ɓa yɛ́n? Ɓa lé le Dónbeenì ton-sáwá. Le wee tonka ɓa à ɓa ɓuee séení bìa á à yí ho kã̀níló le Dónbeenì cɔ̃́n.
