Hibru 1

1

2

3

4

5

6

7

8

9

10

11

12

13

¹Tetiamu, Hi tesepin mi avu nar xil melele xil holu e texo suse xil holu texo provet xil.

²E, e Melengien Kor xil xa radi en xiak, Hi tesepin mi xir texo Natneli xa tepeas kokot ni holesok xil xa ladi. E tehosei Natneli tengan iling holesok xil vus ak ihe hen.

³Xi nggoni Hi e rin xil vus, e di pisen minehinen te xeihen na Hi nggoni kilas tei xa di pisen minehinen te eai. Del xeihen te sepinien nan, Natneli di misak ni holesok xil vus xa tepeas ni mei di tak duxoh xosali nggusil nenemien nan. E melele xa Nat Hi tepol vuol ni holesok xil tengan vakas moten moletin xil mei lamese ra tesaen nae xil tengan Hi vaketeh vahos rilomun mi xil, xi teha tetotan e ut nesao e rin metu te von xeihen na Hi xa minehinen te xeihen nan eilep pupu.

⁴Hi tesak ni Natneli mei be eilep mak mu mili masxaxa xil. Vengan xa his xa Hi tesa ni mini be eilep mak mu mili hisexil.

⁵Ngan ak be reitin vengan xa Hi tenaviteni ti mi masxaxa tova tenavit, “Xouk obe Natuxoli, e xosali, inou mei nabe Tamom.” E mi masxaxa tova mun, Hi tenaviteni ti tenavit, “Inou nihe Tamen, e xi ihe Natuxoli.”

⁶Di, melele xa Hi tesil muimol nan temei e ut etan, tehiteni tehit, “Masxaxa xil vus na Hi ti limot mini.”

⁷E, e rin te masxaxa xil, tehiteni tehit, “Hi misak ni masxaxa xil labe rute xa di misil xil laba en nggoni ngan xa labe votiang xil. E labe moletin te polien nan xil xa di misa xeihen mi xil nggoni ngan xa labe upang xa di minggan.”

⁸E usil Natneli, Hi biteni bit, “Lelaxatien nam, O Hi, ita vehakut xa vehakut tang. Xouk di olaxat kuh moletin nam xil nggusil naha xa momal.

⁹Iem bei holesok xil xa momal e iem nggat sexien xil xa mikavui. Mak, ma inou, Hi nam, natehosei xouk tengan uhur merereen e sien xa ileli ngan xa ngan xil xa ladi visaluk latehuri.”

¹⁰E xi tehiteni mun tehit, “O Suv, tetiamu, otepeas ni ut etan, e otepol ni tilang hat tetel holesok xil xa ladi en.

¹¹Tave ti neta xa holesok xil ak likesae, e xouk uta vehakut. Holesok xil ak mei lihe neta metu e limerer lixoni talmusu xil.

¹²Reitin, xouk uso viton xil lixoni talmusu xil e uso xil liha. E uxoles xil ixoni labe eising xil tang e upol ni holesok xil vus mei lihe neta hu. E xouk utat imak tang vehakut, meulien nam navus ti vatova.”

¹³Hi tenaviteni ti mi masxaxa tova tenavit, “Xouk mei utotan e von xeihen inggak e riuk metu ituxoh melele xa niling ngan xil xa labe elu nam liti pe hem.”

¹⁴?Masxaxa xil labe naha? Xil labe ninin xil xa di lapol mi Hi. E xi di misil xil laba tengan latutou ni ngan xil xa xi tehosei xil tengan iteh meulien e xil.