Iburu 1

1

2

3

4

5

6

7

8

9

10

11

12

13

¹Atu ŋgoinna kɨdrɨkar wɨtapa, tɨpemb kirarir wɨt puŋga Raraŋ Aetaniaca aina nicar ŋgamrirmo, kambmo rambca morina ramtaɨrta para tɨkca mina mbopatna.

²Na mandeacna mɨn mbuŋ, reik mamaina raipaik, Raraŋ Aetaniaca ma kammo ndona Nuocna para tɨkca aimo mboprinan. Na ma reikmo muruŋcamiŋa aŋgɨna moca, ma an Nuocmo ma larapacatna. Na Raraŋ Aetaniacapa, mana Nuocna par mbuŋa gan tiacarpaikapa, riac motocmo moca laruatna.

³Na an Nuoca ma Raraŋ Aetaniacna memetacna tac aniac wandacrinan. Na ma ndo ŋgoinna Raraŋ Aetaniacna kirar toc. Na mana kamma ma gargarap, na an kam mbuŋa ma reikmo muruŋcamiŋa moca, mina gagraca eacrenan. Na ma meikramtaɨrta tɨpemb ŋgorikta makukarmo, moa kecarica minmo ratta mona, na ma ndona aiŋa moa korwirinan. Ri, ma taŋga par umbaina Gagrirta Ramoot Paŋanna mbiracrena auŋ tamuŋna taupca mbiracrinan.

⁴Na Aetta ma ndona Nuocmo an i neaŋrinan, an ia anna ma laŋ ŋgoin, na ma mbaiŋna aiŋa morena ŋerŋgaurta irembmo kunda tamuŋ ŋgoin ndeacrena. Ainda moca ma an Nuocmo, Kacoot ŋgacatna, na mina mana kaŋgauk ndeacrena.

⁵Na atua Raraŋ Aetaniaca ma ndona Nuocmo gaindopatna, “U aukna Nuoc. Na mandeaca aku una Aet ndarurina.” Ri, ma gaind mac mambopat, “Na aku mana Aet ndeacraŋnandet, na ma aukna Nuoc ndeacraŋnandet.” Ainda moca Raraŋ Aetaniaca titocna mbaiŋna aiŋa morena ŋeroŋ ianmo aintocna kam ndopatna? Wanaiŋ ŋgoin.

⁶Na an mɨnna ma ndona guina Nuocmo gan tiacarpaik naaŋgɨa kɨprinanna, Raraŋ Aetaniaca ma gaindopatna, “Raraŋ Aetaniacna mbaiŋna aiŋa morena ŋerŋgaura muruŋcamiŋa manmo tutpemb rɨmbɨtca mana imo aŋgɨ ŋgep.”

⁷Na Raraŋ Aetaniaca ma an mbaiŋna aiŋa morena ŋerŋgaurta moca ma minmo gaind malamŋiat, na ma kammo gaind mambopat, “Ma ndona mbaiŋna aiŋa morena ŋerŋgaurmo watna kirar toca moca mina aintan toco ndarurina. Na ma ndona aiŋa morena ramtaɨrmo tacna mimna kirar toca moca larurenan.”

⁸Na ma Nuocmo gaindopatna, “Raraŋ Aetaniac, u gagrirta ramoot, u memetmbaca iarwara eacraŋnandet. Na u ndona meikramtaɨrmo tɨpemb kirarir wandoik laiŋ tiŋgik mbuŋa bubuocrenan.

⁹Na u tɨpemb kirarir wandoik laiŋ tiŋgikca toŋgorenan, na tɨpemb kirarir ŋgorikmo, u mba toŋgorenan ŋgoin. Aintik una Raraŋ Aetaniaca ma ndo una paŋanmo tabaɨrmo ruŋkirinan, na unmo ma larapacatna, moca u irembapna ramootna kirar toc ndaruatna. Na anna ndo unmo moca u toŋtoŋ ŋgoin. Na una aikora mina un toŋgorena mɨnna mba toŋgoitndai.”

¹⁰Na ma Nuocmo gaind mac mambopat, “Kacoot, atu ŋgoinna u gan tiacarpaikca moca ma eacrenan. Na una par mbuŋ ŋgoinna, u tamuŋna auŋna reikapa riacmo u moatnan.

¹¹Na gan tiacarpaikapa riaca mainandet, na u memetmbaca eacraŋnandet. Na maniŋa raraŋit bagarna kirar toc ndaruca mumutacarinande.

¹²Na u maniŋmo racaep toco rukumnandet. Na u maniŋmo ramootta tik ŋgapaoc toc ŋgetrikirena kirar toc. Na u aind niŋgik ndeacraŋnandet, u mba ŋgetrikirenan. Na u mba menacitndait.”

¹³Na atua Raraŋ Aetaniaca mana Nuocmo gaindopatna, “U aukna par umbaia mbirac te, aku una puŋnaŋgepmo una kaŋgaukca tɨknande.” Na Raraŋ Aetaniaca titocna mbaiŋna aiŋa morena ŋerŋgaurta ianmo an kam ndoprinan? Wanaiŋ ŋgoin.

¹⁴Na mbaiŋna aiŋa morena ŋerŋgaura, mina ŋerŋgaur tiŋgik, na mina Raraŋ Aetaniacna aiŋa morenan. Na ma minmo mandaca mina taŋga an meikramtaɨra, ma minmo nda aŋgɨnanmo otacrenan.