1To diya una, ko meyduon igpasabut to Diyus to mgo minuna, igpabaja din to diya mgo otow no kibali ba-ba din. Pigbalik-balik din sikan duon to yain-yain no paagi.
2Di kuntoon no madanid on to katapusan, impabaja din ki Jesus no Anak din to mgo kagi din ita. Impabaja din isab to sikan Anak din to diya paghinang din to seini kalibutan, aw sikandin to tahan on pigbootan no ogpamanduon to tibo.
3Duon ki Jesus ogkaaha to kasilow to pagkagamhanan to Diyus su iyan da no kinaiya dan. Sikandin to migtagon to pasak dow yangit pinaagi to gamhanan no kagi din. Tapus din hugasa to mgo sae ta, migpauli sikandin diya to yangit aw ingkud duon to kalintuu no takidingan to Diyus no iyan yabow to tibo pagpakiyaya to dongog dow katongod din.
4Duon to sikan, impakita to Diyus no yabow si Jesus to mgo anghil su Anak man yagboy sikandin to Diyus, kona no angod to mgo anghil no mgo suguonon din puli.
5Su wada inggad sobuuk no anghil no pig-ikagihan to Diyus no, “Anak ku sikuna, aw kuntoon igmaan ku no siakon to Amoy nu.” Wada isab anghil no ognangonon to Diyus no, “Ogkaamoy a din aw ogkaanak ku sikandin.”
6Di si Jesus no Anak din ogpasidonggan yagboy, su no madani on sikandin ogpaandinihon to kalibutan, mig-iling to Diyus, “Kinahangyan no simbahon sikandin to tibo mgo anghil.”
7To mgo anghil yahi to katongdanan su seini to pig-ikagi to Diyus bahin kandan, “To mgo anghil ku ogkaangod to kaemag dow yogdog to kaeju no ogtuman to mgo sugu ku.”
8Di si Jesus pig-ikagihan to Diyus, “Sikuna Diyus to oghari to wada katapusan to matarong no pagmandu.
9Pighigugma nu to katarong aw pigkuntra nu to inggad nokoy no madoot. Kaling siak no Diyus nu migpasidongog ikow aw miglipay ikow yabow to tibo mgo duma.”
10Meyduon pad pig-ikagi to Diyus ki Jesus no pig-iling, “Duon to sinugdanan Ginuu, sikuna yagboy to mighinang to pasak dow yangit.
11Ogboyongon da sikan tibo, di sikuna oghangtod. Ogkagobuk to yangit dow pasak angod to tahan no kabo no ogyupion aw ilisi. Di sikuna, kona ka ogkaisab. Wada katapusan to kinabuhi nu.”
13Di to mgo anghil, wada yagboy pigpasidonggan kandan to Diyus angod to pagpasidongog din ki Jesus. Su wada sikandan ilingi, “Ingkud ka kani to kalintuu no takidingan ku kotob no daogon ku yagboy to mgo kuntra nu aw makayuhud duon to atubangan nu.”
14Na, nokoy man naan to katongdanan to mgo anghil? Mgo ispiritu sikandan no ogsuguon to Diyus to pagtabang to kaotawan no ogyuwason din.
