Ibraawe 1

1

2

3

4

5

6

7

8

9

10

11

12

13

¹Xoossay beni wode, nu aawotuu nabatuwaa bagganna dumma dumma ogiyaaninne daro wodiyaan haasayeedda.

²Shin ha wurssetha wodiyaan, ubbabaa A laatissiide, yeletaa A bagganna medhdheedda bare Na7aa bagganna nuussi haasayeedda.

³Na7ay Xoossaa bonchcho poo7uwaa phoolee; qassi kumentha Xoossaa eeshshaa akkiide, bare wolqqaama qaalaan ha sa7aa naagee; yaatiide asaa nagaraappe geeshshiide, Ubbaappe Bolla Xoossaappe ushechcha bagganna saluwan utteedda.

⁴Xoossay aw immeedda sunthatethay kiitanchchatuwaappe dhoqqa gidiyaawadankka, unttunttuppe A loythi dhoqqu ootheedda.

⁵Ayissi gooppe, Xoossay bare kiitanchchatuwappe oona, “Neeni ta Na7aa; taani hachche new aawuwaa gidaaddi” geeddee? Woy qassi oona, “Taani aw aawuwaa gidana; ikka taw na7a gidana” geeddee?

⁶Qassi Xoossay bare bayra Na7aa ha sa7aa yeddana haniidde, “Ta kiitanchchatuwaa ubbatuukka aw goyinnino” yaageedda.

⁷Xoossay kiitanchchatuwaabaa haasayiidde, “Taani ta kiitanchchatuwaa carkkuwaa kessay; qassi ta oosanchchatuwaakka tamaa lacuwaa kessay” yaagee.

⁸Shin bare Na7aawaa haasayiidde, “Xoossaw, ne kawutethaa oydii medhi medhinaw de7ee. Ne kawutethaa xillotethaan ahasaa.

⁹Neeni xillotethaa siiqaade; naaquwaa ixxaadda. Xoossay, ne Xoossay neena ne laggetuwaappe aathiide, nashechchaan ililissiyaa zaytiyaa okkeeddawe hawaassa” yaagee.

¹⁰Xoossay hawaadan yaagee; “Godaw, koyro neeni sa7aa medhdhaadda; saluwaakka ne kushiyan medhdhaadda.

¹¹Hewanttu ubbay dhayana; shin neeni de7ana. Unttunttu ubbaykka afilaadan wurana.

¹²Neeni unttuntta gaabiyaadan dakkoyana; qassi unttunttu afilaadan laamettanawantta. Shin neeni neenakka; ne laythay ubbaakka wurenna” yaagee.

¹³Shin Xoossay bare kiitanchchatuwappe ittuwaanne, “Taani ne morkketuwaa neeni gediyan yedhdhiyaawaa oothana gakkanaw, hawaan taappe ushechcha baggan utta” gibeenna.

¹⁴Kiitanchchatuu ubbay Xoossaw oothanawunne atotethaa demmana asatuwaa maaddanaw Xoossay kiitteedda ayyaanatuwa gidikkinooyee?