Hibru 1

1

2

3

4

5

6

7

8

9

10

11

12

13

¹Anutu meni gita porofetere ge eure-taureta ebata susu giti awa tugata wasai nukare apipie nasokaire tugata inoise noisowa.

²Ata tepo waira be zeme emire nu Mai nuso senu nakai ge tugata wenua. Mai nu nena dapikarago amira mama wero nuaise senua. Gita Mama meni senu Mai ami nena dapikarago tamuro tepo wenua.

³Mai meni asisi ine wero Anutura simai zasimaire awa nasokai nana potitinowia. Nu Mama dawai, are ge putoure nuso meni nena dapikarago soga wawi itewera. Nune pasina disai bua wero pesuniro Tua Anutura nana wana mera witiro putoure arumuro itewia awa.

⁴Zazo bowire nuso meni angelora zazo bowire dainitinowia, da ago ine nune angelo dapikarago dainiro nowia.

⁵Anutu meni angelo zo are ego tugata wenu? Ni awa Mai naso. Na zeme Mama niso inona. Agoro zo ego ewa, Na Mama nuso wero nuamunona. Nune Mai naso wero nuaise. Anutu meni ge awa angelo zore kota, Mai nusore senua.

⁶Noko mua Mai nuso zebura iyetamu sero ge ego senu gaewa awa, Anutura angelo dubu nukare zazo nuso de ike narise.

⁷Angelo numorekare ego sai awa, Nu angelo dubu nusore sawi benau nusokare kapeteniro bisi ine inowera awa. Ata soumai dubu nusore sawi benau kapeteniro niao ine inowera awa.

⁸Ata Maire awa ego sai awa, O Anutu, Tua wero nuai niso awa zewai-zawai itai gege itamunoya. Dubu niso dia inoise potai ge ewanana gege potitinowesa.

⁹Ni tani saramaire wamu yaba inowesa, ata tani wayare awa azu inowesa. Are Tua, awa Tua niso, nune ni gawa inoise yawa sara wai bamubake niso nana kei awaise nima pumuro gawi nimore gutenua. Awa otao mamai niso zazore amira gutai te awa dainiro nimore gutenua.

¹⁰Ge zo numore ego sai awa, O Tua, ni zebu tamusa ata noko utu awa wana niso meni wesa.

¹¹Are uture zebure sisamunorato, ata nine meni awa nuai gege nuamunosa. Tama woi aso inowera da ago ine uture zebure aso wamunorato.

¹²Tama woi aso ine warato nine winamunosa awa. Uture zebure ewe wamunorato, ata nine meni awa ewe oko wamunosa. Nowesa da ago nuamunosa awa. Nuai niso oko tepo wamunoya.

¹³Anutu nu angelo zo are ego tugata wenu? Ni muro wana me nasora arumuro itasa na iwo dubu niso awa benau nisora potana isimamunosa. Ge awa angelo zore kota Mai nusore senua.

¹⁴Angelo nukare nena neni? Nukare Anutura soumai dubu gege. Ema Anutu meni soero pumamu senua awa soga warise iyetitinowia awa.