Hebreo 1

1

2

3

4

5

6

7

8

9

10

11

12

13

¹Tenhud a panahun ay nákpágguron en Diyos ten ninunu tam hidi ten iba-iba a pagkakataun sakay iba-iba a paraan ten pamamag-itan nen propeta hidi.

²Peru nadid a dimudyan a panahun, ay mákpágguron siya dikotam ten pamamag-itan nen Anak na a tagapagmana ten atanan a bagay. Sakay ten pamamag-itan na ay linalang nen Diyos i buuwiday a mundu sakay en atanan a ked háddi.

³En Anak en mángpeta ten kaluwalhatian nen Diyos sakay ten pagka-diyos nen Diyos, gapu ni ánya en Diyos ay kona bi haud en Anak. Siya en mangalaga ti buuwiday a mundu ten pamamag-itan nen upos na a makapangyariyan. Dikona matapos na kitam a linisán ten kasalanan tam, ay sinumoli siya dilanget, sakay nággetnud ten kawanan nen makapangyariyan a Diyos.

⁴Ni konya a kataasan en ngaran a inyatád nen Diyos ten Anak, ay kona bi haud a mas mataas siya ten anghel hidi.

⁵Gapu maski nikan ay awan kinagi nen Diyos ten deyaman a anghel a, “Siko en Anak ku! Sapul nadid ay sikán dán en magin Ama mu.” Ni awan na bi kinagi ten deyaman a anghel a, “Sikán ay magin Ama na, sakay siya ay magin Anak ku.”

⁶Sakay dikona paangayán dán nen Diyos en panganay a Anak na ti munduwiday ay kinagi na a, “Dapat siya a sambaán nen atanan a anghel nen Diyos.”

⁷Tungkul bi ten anghel hidi ay kinagi na a, “Kumán hidi a parás, sakay maggerab a apoy a magserbi dikona.”

⁸Peru tungkul ten Anak na ay kinagi na a, “En trono mu O Diyos, ay awan ti katapusan, en pághari mu ay tehud a katarungan.

⁹Kasayaan mu en pággamet ti matuwid, peru en pagkamasuwayin ay sasala mu. Kaya pinili ka nen Diyos a Diyos mu, sakay inátdenan na ka ti kasayaan a higit ten kaguman mu hidi.”

¹⁰Kinagi na pa a, “Siko Panginoon en nanglalang ti lutaiday ten sapul pa, sakay gamet nen lima mu en langet.

¹¹Mágkawan hidi iyád, peru siko ay awan mamawan. Magin ráppot hidi a atanan a kona ten damit;

¹²iduru mu hidi iyud a kona ten ráppot a damit, sakay mapalitan hidi. Peru siko ay awan magbabagu, awan ka tumanda oni matay.”

¹³Maski nikan ay awan kinagi nen Diyos ten deyaman a anghel a, “Mággetnud ka ti kawanan kuwidi, mentras a awan ku mapasuku dikomu en atanan nen kadima mu hidi.”

¹⁴Ni konahud, ay ánya en anghel hidi? Hidi ay ispiritu a magserbi ten Diyos, sakay paangayán na hidi a tumulung ten maligtas hidi.