Hebiraio 1

1

2

3

4

5

6

7

8

9

10

11

12

13

¹Anutu e mârâc jaha porofete ejareme jaŋe mimiŋnefâc‐nâŋec dâŋ hawarine fuŋne fuŋne â hatane fuŋne fuŋne jaza warekuhapie

²ine ʒâhec tataranao, dameŋ ʒira hâcne, Ŋokâ ecneme dâŋ nâzâwec. Ŋokâ e wiac sasawa irec rune juocte mucnewec, ehec hâcne wiac bâfua‐fârepic.

³Anutu eri tatamac‐ticnere qâreŋ erao fuawec fokacte â juju‐ticnere sâc juekacte tâpiri dâŋticnezi wiac sasawa dope siŋsiŋ ecneha foekac. Eki sâqocne ʒure bataniŋ gie bafârerâ faic fekicne sâko ere fâreo fewec ŋekac.

⁴Aŋelo hucjopa‐fârewec jukac, irec sâcko aŋelo ʒâŋe siricke‐fârehuc ʒâŋe fekicne hotâckewec.

⁵Anutuzi mo aŋelo mo kecʒiŋuc moc âzâcnewec: “Go hâcne Ŋokâ‐nane, no miŋecgac bâfuacgukopac”? Me kecʒiŋuc: “Noni Mamac ecnerâ jupemu â eki Ŋokâ enarerâ juzejec”?

⁶Moc ine juku mârâc fufua e mâreŋko râeme wahaocmu irec dâŋ ʒiŋuc muwec: “Anuture aŋelofâc jaŋe dieŋzi hecne‐fârenʒepieŋ.”

⁷Aŋelo jaŋere kecʒiŋuc mukicne: “E aŋelofâcne hawari‐jeŋic bâtikieme mâŋâŋ eeŋgopieŋ, â kiŋaŋ qaqafâcne hawari‐jeŋic bâtikieme ʒocbâruŋ eeŋgopieŋ.”

⁸Ŋokâre ine ʒiŋuc mukicne: “Anutu go ŋicwofuŋ ŋeŋege i ŋeŋe sanaŋ ŋeraʒihuc juocmu, â ŋicwofuŋ gunuge i bâbâtiŋ gunu biaŋ.

⁹Go tiŋnere egareekac â hehesic ine râsi ecneekic. Irec Anutu, gore Anutu, eki ʒeri wokemaŋ rua‐garewec, i âgofâcge jaŋere sâc jâuruhuc rua‐garewec.”

¹⁰Moc ʒiŋuc mucnekicne: “Wofuŋ go fufuŋkenao mâreŋte hobeteŋ râemeŋ, â sambâŋne sambâŋne jaŋe megere qâreŋ.

¹¹Jaŋe siroweniŋmu, go ine jusanaŋkekic, jaŋe ŋaqi iŋucne raŋɋaŋkeniŋmu.

¹²Ŋaqi iŋucne epie goki bataforiec‐jopacmu, eme jaŋe hawari moc eniŋmu. Goki ine juekic ijaha juekic, â jara dameŋge i moc mi taraocmu.”

¹³Anutu e mo aŋelo mo ʒiŋuc moc âzâcnewec: “Ware fâre‐naneo ŋehaŋtec râsifâcge guruc‐jopape kikegere ââtesiŋ enʒepieŋ”?

¹⁴Aŋelo sasawa jaŋe mârozi kiŋaŋ qaqa, ŋic bâbâpiaŋ rauckeniŋte mukicne jaŋe bafic‐jopaniŋte sorec‐jopakicne.