Ibra 1

1

2

3

4

5

6

7

8

9

10

11

12

13

¹Barjo ena wodanka waana waana goytika Barjokala qansayse eenna giyaynaka wosa eykenana thoothi wodana giydine.

²Taaki macchin wodan koka yer wulsa toydi maataa yisa Naasaka wona giydine. Barjoar yer wulam kinin pijoono Naasa yintea goynkane.

³Kidi yinti Barjo gobshinsa shaakane; kidi yisa dantanka Barjo Imbaabesana kalaane. Yisa kantan upsinka pijadhin wulam keedhayse ki yedade. Eenaamaar kesa seesora yinin gazinsonsa budonte cecinte wuldara gobshinka sagi maataa Barjosa mizaqimbar ki dooqade.

⁴Barjo Naasana imbhoono naabeno Barjo gaananasa naabendara kattsi sagine; ogodettsi kidi kedara sagine.

⁵Harrna hambhidianna, Barjo yisa gaananasa kalaana “Ya isa Naasine; inta haam kina adhidine” pir, “Inta kisa Imba ida maate; kidiar isa Naasi kida maate” hamayse kinin giyaa hayne?

⁶Pir Barjo biraa Naasa yinteam peendar yinin nittsenka, “Barjosa gaanana wul kumpurdhayse kina ke goodime” ki hamade.

⁷Barjo yisa gaananaka “Isa gaananaam wuradettsi ida haye; ina waadimaynaamaar nuusa laabhinadettsi ida haye” ki hamade.

⁸Yisa Naasaka ko hanna, “Barjo, hasa bitamon borkotono rooro wul lay koda dee; hasa eenaam tipamoka hada wottse.

⁹Tipamon waadimanam nashayse siyon waadimanam ha jibbade. Ogo goynka hasa Barjoa haam kamayse hasa aanammadara kattsi sagi hayayse haam wozisen zaytinka ki qadhade” ki hamade.

¹⁰Yin pir, “Imbo, ya ena birayse peenam ha pijade; cecinoar hasa aanin waadimanone.

¹¹Igina kaya ke kaye; ya rooro wul daada dee. Kedi wul apaladettsi keda gecche;

¹²apaladettsiar keam hada umbhuse; apaladettsiar ookaada ooke. Yaar rooro wul lay ookimattane; hasa levensa macchi qolehe” ki hamade.

¹³Barjo gaananasa kalaana “Haam jibbaynaam hasa hayamon demente inin hayenka yekka isa mizaqinte dooqaa” hamayse kinin giyaa hayne?

¹⁴Ta keeda gaanana wul Barjoyn dhacchaynaam kenin kelshoadettsi nittsadhayna Barjona waadadhayna manpasinatayu?