Hebrewsma 1

1

2

3

4

5

6

7

8

9

10

11

12

13

¹Fosten Gado ben meki den profeiti taigi den afo fu wi san A ben abi fu taki. A ben du disi furu leisi èn na difrenti fasi.

²Ma now ini den laste dei disi, A meki En Manpikin taigi wi san A abi fu taki. Gado poti En fu kisi ala sani èn nanga En Gado ben meki ala sani san de.

³A Manpikin e brenki nanga a glori fu Gado, èn na En wi e si fa Gado de. Den wortu fu En abi krakti èn den e meki tak' ala sani de leki fa den mus de. Baka di A krin wi fu sondu, A go na heimel go sidon na a let'anu sei fu a Bigi Gado.

⁴So A kon moro hei leki den engel, leki fa a nen di A kisi hei moro di fu den engel.

⁵Bika noiti Gado taigi wan engel taki: Yu na Mi Manpikin. Tide Mi meki Yu kisi libi. Noso: Mi sa de En P'pa, èn En sa de Mi Manpikin.

⁶Moro fara, di Gado meki En fosi Manpikin kon na grontapu, A taki: Ala den engel fu Gado mus anbegi En.

⁷Fu den engel Gado taki: A e meki den engel fu En leki a winti, èn den dinari fu En leki fayatongo.

⁸Ma fu a Manpikin A taki: Gado, fu têgo èn ala ten Yu o rigeri, tapu wan leti fasi Yu o rigeri.

⁹Yu lobi en te sma e du bun, ma Yu no man srefsrefi nanga en te den e du kruktu. Fu dat'ede Gado, Yu Gado, teki Yu prefu den mati fu Yu, dan A poti Yu leki kownu fu Yu kan breiti.

¹⁰A taki moro fara taki: Masra, na Yu meki grontapu na a bigin èn na Yu meki heimel nanga Yu anu.

¹¹Den no sa de moro wan dei, ma Yu e tan fu têgo. Den alamala sa kon owru, leki fa krosi e kon owru.

¹²Leki wan dyakti Yu o fow den. Leki wan krosi Yu o kenki den. Ma Yu e tan a srefi èn Yu no e kon owru.

¹³Ma noiti Gado taigi wan engel taki: Kon sidon na Mi let'anu sei, te leki Mi meki den feyanti fu Yu tron Yu futubangi.

¹⁴Bika ala den engel na yeye di e wroko gi Gado, èn di Gado e seni fu yepi den sma di A o ferlusu.