Hiburu 1

1

2

3

4

5

6

7

8

9

10

11

12

13

¹Pukerane si hoke zama sa Tamasa koari na tiatamada pa votivotiki siraṉa, pa korapa zinama na tinavete tadi na poropita d,

²ba koari na totoso mumudi hire si garunia Sa sa Tuna pude zama koa gita. Asa tugo sa Tuna pu kuri nia Sa sa doduru kasia popoa pukerane. Asa tugo si vizatia Tamasa pude tagoi sari doduru likakalae.

³Sa Tuna si na kalalasana sa ṉinedala te Tamasa, meke sa kinehana soti sa tinoa te Tamasa meke Asa tugo si tuqena sa tinoa tadi doduru likakalae koasa ṉiniraṉirana sa Nana zinama. Sipu ele vulasa pani Sa sari na sinea tadi doduru tie, si la habotu si Asa pa kali mataona sa Tamasa, sa Baṉara tolavaena, pa Maṉauru.

⁴Gua asa ke sa Tuna si ululu hola koari na mateana, kekeṉoṉo gua tugo sapu sa pozapoza “Tuna Tamasa” sapu ta poni nia Sa si arilaena hola ni sapu tadi na mateana.

⁵Ura loke totoso si zama nia Tamasa koa keke Nana mateana gua sapu zama nia Sa koasa Tuna pa Kinubekubere Hope, sapu guahe: “Na Tuqu soti si Agoi, ṉinoroi si ta evaṉae na Tamamu Goi si Arau,” gua. Meke loke totoso tugo si zama guahe sa Tamasa koa keke mateana: “Arau si kaqu na Tamana Sa, meke kaqu na Tuqu koreo Rau si Asa,” gua.

⁶Totoso hiva garunu gore mae nia Tamasa pa kasia popoa sa Tuna kenuna, si zama gua pule hie si Asa: “Madi vahesia ri doduru mateana si Asa,” gua.

⁷Koasa guguadi rina mateana, si guahe si zama nia sa Tamasa: “Va evaṉa guni Sa na givusu sari mateana, meke sari Nana nabulu si gua rina hinuruṉu nika,” gua.

⁸Ba koa sa Tuna si zama guahe si Asa: “Tamasa, sa Mua habotuana Baṉara si kaqu koa hola ninae rane ka rane, Koa totoli ni Goi sari na Mua tinoni pa tinoṉoto koasa Mua butubutu binaṉara.

⁹Tataru nia Goi sa tinoṉoto, ba kukiti nia Goi sa kinaleana. Gua asa, ke vizatigo meke va madigo sa Baṉara sa Mua Tamasa si Goi pude poni nigo sa qinetuqetu nomana, hola ni sari doduru turaṉamu,” gua.

¹⁰Meke zama gua tugo he si Asa: “Baṉara, Agoi tugo si kurina sa kasia popoa pa pinodalaena. Sari doduru vinapodaka pa maṉauru si ta tavete pa limamu soti Goi.

¹¹Kote murimuri palae si arini, ba Agoi si kote koa hola ninae rane. Kote ṉoreṉore guana poko si arini,

¹²meke kote molomoloe ni goi si arini, guana poko koana si kote ta hobe. Ba Agoi si koa kekeṉoṉo mo ninae rane, meke loke kokoina sa Mua tinoa,” gua.

¹³Ura loke totoso si zama nia Tamasa koa keke ri Nana mateana gua sapu zama nia Sa koasa Tuna, sapu guahe: “Mu habotu pa kali Mataoqu, osolae vekoi Rau sari Mua kana pa kauru Nenemu,” gua.

¹⁴Ba sari na mateana si na maqomaqo, pu nabulu nia sa Tamasa, meke ta garunu koa Sa, pude toka ni sari Nana tie pu kote vagia sa tinaharupu.