Hebreos 1

1

2

3

4

5

6

7

8

9

10

11

12

13

¹Callari uras Yaya Diosca pai rimashcata pasachic runagunahuan ñucanchi huañuc apayayagunata rimashca, chasnallata ashca cutin ashca tunu rashcagunahuanbas rimashcami.

²Cunan puchucai punzhagunaibi paihua churita cachashcami pai ñuca rimashcagunata rimachun nisha. Paihuan churihuanmi Yaya Dios cai pachatas jahuapachatahuas huinda rashcami, cai tucuita pai rashcagunata mandachun nisha.

³Paihua ushaihuanllami tucui alita cuirasha mandaun. Paimi ricuchin Yaya Dios imasna actaga. Paihuas Yayacuintallatami yapa sumac an. Paimi ñucanchi juchata anchuchishcahuasha jahuapachaibi Diospa ali maqui partibi tiyarisha tucuita mandaun.

⁴Chasna acpimi Yaya Diosca paihua churitaga angelgunamandas yali ushaita cura. Chasnallata paihua churima tucui angelgunamanda mas yali balic shutita cura.

⁵Ricuichi. Yaya Diosca ima uraspas shuc angeltas Jesustashina mana casna rimashcachu, Canga ñuca churi mangui, cunanga camba yaya tucushcani nisha. Chasnallata mana ni shuc angeltahuas rimashcachu: Camba yaya tucusha can randiga ñuca churi tucungui nisha.

⁶Cai pachama paihua punda churita cachamuusha casna nira: Tucui ñuca angelguna ñuca churita balichinauchun.

⁷Randi angelgunamanda Dios casna rimara: Paigunaga huairacuinta, ninata júu sindichishcashina dsaslla ñucata sirbinauchun nisha rimara.

⁸Astahuanbas paihua churitami casna nira: Canga jatun amu asha huiñaigama mandac angui Dios. Canga runagunata sumactami mandaungui.

⁹Can ali ranagunallata munac ashami jiridsa rashcagunataga mana imatas gustanguichu. Chiraicumi ñuca camba Dios asha canda japisha tucuigunamanda mas yali jatun cushita curani yali ali tucuchun nisha.

¹⁰Chasnallata nishcami: Jatun mandac Dios, callari urasmanda cai mundutahuas chasnallata cielotahuas camba maquihuan rashcangui.

¹¹Allpahuas cielohuas shuc llachapa ismushcacuinta tucuricpihuas astahuanbas canga huiñaigama causanguimi.

¹²Shuc llachapata pillusha jichusha mushuc llachapahuan cambiashcacuinta cai mundutas cielotas cambianguimi. Randi canga mana cambiasha huiñaigama chasnallata anguimi.

¹³Yaya Dios mana ni shuc angeltahuas mana casna rimarachu, Can jatun mandac tucusha ñuca ali maqui partima tiyarisha chapai tucui canda piñac runagunata ñuca binsinagama.

¹⁴Astahuan tucui Diospa angelgunami mana ricuibac ashallata Yaya Dios rimashcata pactachiuc anaun. Chasna acpi Dios paigunata cachanmi quiringarauc runagunata yanapangahua.