Hebreos 1

1

2

3

4

5

6

7

8

9

10

11

12

13

¹Bab Dummad, dikasurgus na E-gaya-burba-berbemaladba anmar-babganga sunmakdanikid, akar-akargus sunmakdanibalid.

²Emiskwasaardi, na E-Machiba Bab Dummad anmarga sunmaksad. Bab Dummad bela ibmar na E-Machigadga guega imaksad, degine, na E-Machiba bela napneg-naid, degine, nibneg-naid nasiksabalid.

³Bab-Dummad-yeer-dakleged-gandik-gaedi, E-Machi deyob nikmogad, degine, bela Bab Dummadga guedi, E-Machi deyob gumogad. Degine, Bab-Dummad-Machi na e-gaya-burba-sunmaked gandik-nikadba, bela agi ibmar semaid. Bab-Dummad-Machi anmar-iskued anmarga uruknonigu, nibneggi Bab-Dummad-olo-gana argan-nuedsik sigdapsunnad.

⁴Bab-Dummad-Machi angermarba bur dule-dummadga gunonikid, ar ade gusgu angermarba bur nug-dummarba nika danikid.

⁵Ar ade bipisaale Bab Dummad anger-wargwenga gwen weyob sogsasulid: Be an-machi, emi-ibagi an be-babga gunonikid. Sal. 2:7 Deginbali, Bab Dummad anger-wargwenaga gwen sogsasurbalid: Ani an e-babga guoed, e, an-machiga gumogoed.

⁶Bab Dummad na E-Machi-wargwennaa-gued we-napnegse odenonigu, a-nikdi sogsa-gusad: Bela Bab-Dummad-angermar igi Bab Dummadse gormala e-nug-odummogegar, deyob we-dule-nug odummomarmosun.

⁷Angermargindi Bab Dummad sogsa-gusad: Bab Dummad na E-angermar burwayob imaked, degine, e-maigandi soo-gwabunye-gwichiyob imakbalid.

⁸Bab Dummad na E-Machi-nikdi soged: Bedi Baba, be-neg-dakmaid degi-na-sadegu guoed. Igar-napiragwadbarbi be neg-dakmaid.

⁹Igar-inikigwad-bina bur be soged, igar-iskanadi istar be daksad. Degisoggu, Bab Dummad a-ular be-susad, be-Bab-Dummad, be-sordamarba dule-dummadga be-nug-imaksad, degine, weligwar itogega be-imaksabalid.

¹⁰Degine, Bab Dummad E-Machi-nik sogbalid: Be, Dule-Dummadid, we-napneg-naid gebesailaunni be nasiksad. Deginbali, nibneg-naid be-argangi be nasiksabalid.

¹¹Nibneg, degi, napneg, amardi berguoed, bedi degi-sadeguoed. Bela nibneg, degi, napnegdi sergudmaloed, igi mormar sergud daedyob.

¹²Dule mor-nunud midedyob, bedi we-napneg, degi, nibneg metoed. Degine, dule mor-baid yoedyobi, be we-napneg, degi, nibneg be ogwamogoed. Ar bedi gwen gwagmaisulid, Degine, be birgamardi gwen berguosulid.

¹³Ar bipisaale Bab Dummad anger-wargwenga gwen weyob sogsasulid: An argan-nuedsik be sige, be-istarmaladgi bela egi be nakwedse an be-imakoed.

¹⁴Bela angermala Bab-Dummadga-arbamalad burbaled gumalad. Bab Dummad a-angermar-barmialid, adi dulemar-abonolemaloed-bendakega, aga barmilearmalad.