Hebre 1

1

2

3

4

5

6

7

8

9

10

11

12

13

¹Laî ló bê ipyat pé má, Garai Gasang gi, nga-nhûng é îchyí îwâ pé lé myiqhtoî pé dông alhîng lhîng eq adông dông mai dáng nyo wú bê nghut lhê.

²Nghut kôlhang, ló htâng é buinyì shí pé má, Yhang gi, Yhâng Zo dông mai nga-nhúng lé dang nyô bê nghut ri; Yhang gi, lhunglháng lé sîng sû dut râ matú haû Zo lé masat to mù, Zo dông mai, nyì mi-nyì, joq mijoq lé hpan to bê nghut ri.

³Haû Zo gi, Garai Gasâng é hpungwup shingkang duqbó é hkyô eq Yhâng é gunghkyâng isâm roq nghut nyi mù, lhunglháng lé Yhâng é a-tsam byíng é dâng èq zuî zing tô ri. Yhang gi, yubak mara lé lhoq sân-yúng é hkyô lé ban kut é htâng, mauhkûng htoq má Hkikhkam dik Sû Garai Gasâng é loqyo hkyam má zung to bê nghut ri.

⁴Haû mù luî, Yhang gi, maumang lagyô pê é myìng htoq gyaú é myìng lé wó sing yù bê nghut é eq rajung za, yhangmoq htoq je riyhang gyaú sû dut bê nghut ri.

⁵Hkâsu mù gâ le, Garai Gasang gi, "Nàng gi, Ngá Zo nghut ri. Hkû-nyí, Ngò gi, Náng Wa dut bê nghut lhê." ga le, dum, "Ngò gi, Yhâng Wa dut râ nghut mù, Yhang gi, Ngá Zo dut râ nghut lhê." ga le, maumang lagyo hká yuq lé hkâ-nhám wá taî wú é nghut lhê lhú?

⁶Dum, Garai Gasang gi, Yhâng é zomún lé mingkan shut nhang hâng kat é hkûn, "Ngá é maumang lagyô pé banshoq gi, Yhang lé noqkuq kó sháng gaq." ga taî ri.

⁷Maumâng pé eq séng luî Garai Gasang taî é má, "Yhang gi, Yhâng é maumang lagyô pé lé laì su dut nhâng mù, Yhâng é dui-nhâng zoshâng wuì lé, myishâm pé su dut nhang é nghut ri." gâ ri.

⁸Nghut kôlhang, haû Zo eq séng luî, Yhang gi, "Garai Gasang ê, Náng é hkohkâm-tanghkuq gi, pyat dedu ahtum abyuq gîng nyì mù, Náng é dingmán hkyô gi, Náng é mingdán lé uphkang é hkyô dut râ nghut lhê.

⁹Nàng gi, dingmán hkyô lé chyitdap bê nghut mù, agè ashop é hkyô lé a ngui byuq lô é nghut lhê. Haû mù luî, Garai Gasang, náng é Garai Gasang gi, Nang lé, gabú nhang é xû but byî é dông, Náng é luzúm wui htoq je lhoq gyaú to bê nghut ri." ga taî ri.

¹⁰Hau htoq agó, Yhang gi, "Yhumsîng ê, Nàng gi, a-nham sâng-hi má myidàm é apûn awang lé hi tô é nghut mù, mauhkûng pé gi, Náng é loqmú chyat nghut ri.

¹¹Haú pé gi, htên byoq byuq râ nghut lhê; nghut kôlhang, nàng gi, ru gîng nyì râ nghut lhê; haú pé banshoq gi, mebu su xau byuq râ nghut lhê.

¹²Nàng gi, haú pé lé, bumó lé su dîng yup râ nghut lhê; Nàng gi, haú pé lé, mebu su htaî pyám râ nghut lhê. Nghut kôlhang, Nàng gi, rajung za ru gîng nyì râ nghut mù, Náng é zanwut pé gi, hkâ-nhám le htûm râ a nghut." ga le taî ri.

¹³Garai Gasang gi, "Ngò, náng é gye pé lé, náng é hkyî nang tanghkuq kut pyám byî é hkyíng jé shoq, Ngá é loqyo hkyam shut zung nyì shi aq." ga maumang lagyo hká yuq lé hkâ-nhám wá taî wú é lhú?

¹⁴Maumâng pé banshoq gi, hkyi yù hkyô lé hkam yù râ nghut é bang lé dojaú râ matú, nhang kat huî é mû wùn woi-nyí pé chyat za nghut akô, a nghut kó lhú?