1Udu, iri lau solo-an solo-an labai, ari ndramak winiyan bandromwei bwe, iri ame atukum ta anya kanuhun Jises. Eme ma kon aso mara-ei, ma rayah adek bwele-e rayah. Tasah, kon ari soson bwe. Ya eme Jises asehek sahou ma mwena i toro lau tan anya, “Mada ado badeh, kaleu ta yis tiri Parasi. Kandriyen ta wasai tiri doh badeh, i buku yis; sese le winiyan ta edeu ili bolo jabi ramen buruwen kolek.
2Lakou mari ale aton kede-eh kameh asahan eme lewan, lau mari kameh anuhun ma atou na mada iri.
3Ma saba lakou ado asehek hawe saba lakou ado tone badeh kameh asahan eme lewan mada lau mari. Ma hawe saba lakou ado ohei le ta aliy, udu bolo asiu kameh, iri are bwele-e ndrahu tukum tiri lau kameh asehek i tinan ta lau mari kanuhun.
4“Jo kasehek ki tado kamwenen ado kawas tek, ado sanoh tiri lau ale winiyan adai bada ado na dah. Badeh, iri adai bada ado le, arile iri winiyan badai malawi ado bwe.
5Arile, jo anya kaleheya ado ta are handru kameh ado kanoh iy: Ado kanoh labai ta Kindrei, tasah iy winiyan idi ndramak imek, ano iy le tan boto-on udu aliy ta akeh ndramak doh, i bolo jih. Eme jo asehek tado dah badeh, ado kanoh iy.
6Ado badeh, ndratana ado, iri lau asih sirih nadu bwisik ma limeh na luk bororoh saraman la-uh (2t) le, neh? Arile, tama ado badeh, atondrok sirih doh udu mwasin labai. Kindrei bamani iri ari se bwe.
7Handru labai, Kindrei ale badeh, ndrandromwei lami batu ado mari, ya iy tanan ado mwasin labai. Ya, ado sanoh tiri lakou ndra-in iri lau anya kamekes kewek tado. Kindrei winiyan tondrokei ado handru. Ado kanuhun! Ereu budon ta Kindrei, iri sirih badeh, lakou laleyah, arile iy atondrok iri. Eme ya iy winiyan tondrokei ado areu mwasin labai ja.
8“Ya, jo kasehek tado kamwenen, are lau ale asehek ili tiri lau mwan ma badih buku none iy badeh badu hawek, jo Nadu Ndramak Awas ale kameh asehek tiri angelo ta Kindrei buku iy ndramak doh badu hawek handru.
9Arile, are lau asehek ta ndramak ari ja buku iy badu hawek bwe, jo ale kameh asehek i tiri angelo ta Kindrei buku iy lau doh badu hawek bwe ale.
10Ma are lau oro asehek sahou ndra-in i bada Nadu Ndramak Awas, Kindrei le kameh winiyan mani kandriyen ndra-in tan. Arile, are lau oro aluhe i bada nyara Malawin Ndrabun, Kindrei winiyan bamani kandriyen ndra-in tan doh bwe.
11“Ya, i buku none iri katehei ou ales are ta sahou, are bolo asiu ta atukum deh, iri katehei ou ales are mada iri lau ta atondrok kon, badeh, ou sabwerei ou, ta saba sahou kameh ou asehek ta aliy. Ado sabudon sandra-i, ndri-iy.
12Na le bolo len doh kameh Malawin Ndrabun kameh leheya ou ta sahou ou kameh asehek.”
13Eme ndramak ari udu bolo iri lau nane doh, tiye i ta Jises buku doh, “Ndramak ta leheya, ou tiye ki ta nadu tine badeh, kapwai lakou ta tama aru ki le winiya aru.”
14Eme Jises tiye i tan i buku doh, “Ou den, are lau tiye tam anya, jo kanuhun sahou ta apou lakou ta tama ah, ki ta ah nadu tinem?”
15Ano Jises tiye i tiri mwan ma badih, “Bale ado kudu tado! Mada ado kaleu tado, ta ado badeh, saseken lakou doh, lakou doh le, tasah koha ndramak badeh, winiyan bado luluwen na lakou solo-an doh, bwe. I buku tan lakou solo-an labai, arile iri lakou mari doh kameh winiyan basebenei koham ta udu le buku doh, bwe le.”
16Ano Jises asehek sahou sokek ari doh, i ndranye oro: “Bilin ta ndramak ari tan lakou solo-an badeh, ato-ou sali iri badeh, solo-an.
17Eme iy lomondra anya, ‘Idah kameh, barala buku sah bah? Jo ari kon ta adeu iri nyamon tek marakon ki aliy bwai.’
18“Ano iy anya, ‘Jo kamekes ki buku sah bah? Sebwe jo badeh, kamekes ki buku doh: Jo katokosei asiu ta nyamon ki-iu, ya jo katahiy ki tinan ja. Idoh kameh, winiya iri nyamon hawe iri lakou tek mwasin mari i bolon ai.’
19Ano iy le asehek nyalan anya, ‘Jo badeh, lakou tek solo-an labai, winiyan udu andrei jaha solo-an. Idah kameh, mesekei jo sekesek ma a-un gwa, tasah manyah tek ndramwenen kabwe.’
20“Arile, Kindrei tiye i tan anya, ‘Balem bwe, na ben dah kameh ou amak; ya lakou tam mari doh kameh ki tare bah?’
21“Lakou i buku doh kameh asahan i tare lau, i buku iy anya katukum lakou sola sola badu munyak; arile ta mada Kindrei badeh, lakou doh, bala mwasin ta madan bwe.”
22Ano Jises tiye i toro lau tan: “Ado sabwerei ta manyah tado, saba lakou kameh ado aimon, ma ta bada ado ale, saba lakou kameh ado kataliye.
23Koha ado sakalawi nyamon, ma bada ado sakalawi kalawi ado ale.
24Ado kanone kanyolom iri sirih se: Iri batah nyamon bwe, ma iri babwe-eh nyamon bwe. Ma hawe iri ari asiu ta asumwe nyamon bwe, arile Kindrei le badeh, anyohan iri. Udu budon ta Kindrei ja badeh, iy kameh atondrok ado udu mwasin labai ja tiri sirih!
25Buku ado abwerei ta iri lakou doh, idah kameh winiyan edeu ari len ja ili hawe len ta manyah tado, ta ado luluwen deh? Bwe!
26I buku none ado winiyan bamesekei lakou nadu bwisik doh bwe, ya i buku sah ado abwerei ta lakou mari?
27“Ado kanone kanyolom iri kanyeu ateh se. Ya iri babo gok bwe, ma iri bamekes kalawi iri bwe. Arile, jo katiye tado, bwena mene kabin Solomon asini iri awin tan mwasin mara-ei handru ano, arile nyasou tiri kanyeu ja sakalawi nyasou ta kabin Solomon.
28Idah Kindrei edeu nyasou ma awin ili tiri bwidiu badu lokei, iri bwidiu ado na len dah, ano na len bi-i akeh iri au ala bolo jih ta asun iu. I buku sah, sebwe Kindrei winiyan badeu kolau ma awin bawek tado bwe nadeh? Budon tado handru tinan bwe?
29Ya ado sabudon sandra-i ta saba nyamon kameh ado kaimon, hawe sabwerei ta saba gwa kameh ado ka-un, ndri-iy.
30Tasah, iri lau badu kon munyak tinan mara-ei aseken ma asilah iri lakou doh. Ado sala buku iri, tasah tama ado Kindrei iy tanan saba lakou ado aseken.
31Arile, ado kanyolom bwena kili ta tondrok ta Kindrei op. Ano ya iri lakou doh Kindrei kameh edeu ewek tado.
32“Ado marakou sanoh! Tama ado Kindrei badeh, sekesek tado labai, eme ado kameh atondrok lakou hawen.
33Eme lakou tado mari badeh, kasihinei ki-iu ta luk ya luk ta aliy badeh, ado kadeu ki tiri lau lakou bwe. Ado badeh, katakaleh tado kohei kohoya luk udu kandrah; lakou winiyan ta apus bwe, hawe winiyan ta amu-uk bwe, ma hawe iri lau ta bahana winiyan babene-ei bwe.
34Tasah, i buku none ou tam lakou solo-an udu bolo munyak dah, kameh mesekei ou abudon solo-an ta aliy.
35“Ado badeh, kanyasou, hawe kalokou ado, ma katelemei sun tado kudu le, koro-an lakou kasahan,
36ki buku none iri lohowan abe-en ndramak ta kati asiu udu ta molak eme hamon. Ya i buku none iy eme asumon, oro kameh sulu-i kou asak tan.
37Idah kameh, udu mwasin toro labai, tasah mada oro badeh, bamadin bwe, na len ndramak ta kati asiu asahan. Eme ya jo katiye tado kamwenen, idah kameh, iy asini awin ta lohowan tan, ano iy tiye oro manyah ado andri ano iy bwese nyamon i noro.
38Ma idah kameh, mwasin labai i toro lohowan, i buku none ndramak ta asiu eme anyolom oro badeh, abe-en. I buku none iy eme na ndrukulu ben deh, na boho len badeh, oro ndra abe-en iy le.
39“Arile, budon tado kaleu ta tanan doh: Buku none tama asiu i tanan saba mada an handru iri lau ta bahana kameh ame apou asiu tan, iy kameh atehei ndrokei, tasah iy winiyan bamukuni iri lau ame apou asiu tan bwe.
40Ya, buku none ado ale, ado kalokou ado na len mari. Tasah, Nadu Ndramak Awas kameh asahan na len ado batehei budon ta iy eme bwe.”
41Eme Pita anya, “Laban, ou tiye sahou sokek badeh, eme tahi mari deh, bwe, eme taso lau tam le?”
42Eme Jises tiye i hamon ja anya, “Are lau iy mwasin ta gok, ma iy budon mwasin? Iy don adeh, tinan tan kameh atehei iy ta atondrok iri lau tan ra-on ja an bahandran ta adeu niri nyamon na len ari, ari, iy le tanan.
43Sekesek handru in bwele-e ndramak doh, buku none tinan tan eme takalahi iy amekes gok tan mwasin.
44Jo tiye tado handru, tinan tan kameh atehei iy ta atondrok iri lakou tan mari.
45Arile, buku none iy lau ta gok tan nane katiye anya, ‘Ndramak ta asiu doh kameh winiyan bame suwi bwe,’ ya iy kameh a-um iri lau mwan ma badih ta gok. Ano iy aimon nyamon aimon aimon, ano iy a-un gwa boto-on a-un a-un, ma iy ibo lolo-ou.
46Ya, na len ari, tinan ta ndramak nane ta gok kameh eme hamon na len iy ndramak nane tanan bwe. Tinan tan kameh sani iy i lunah, ma mesekei iy akohok maha-an buku le iri lau ta tebelese mene.
47“Ya ki buku none ari lohowan tanan lahou ta tinan tan, ya iy bamesekei bwe, idah kameh, iy bwese maha-an tinan labai.
48Arile, i buku none ari lohowan bala tanan lahou ta tinan tan bwe, ya iy amekes lahou laleyah, idah kameh, adai iy udu, le udu. Ma i buku none are lau akohok lakou solo-an labai, badeh, iy kedeu solo-an ale, ki hamon; ma i buku none are lohowan katondrok lakou solo-an kudu bahan, iy badeh, kamekes lahou kirih le gwek.
49“Jo eme dah badeh, ta asun kon munyak. Ki jo aseken handru mene badeh, jih ndranya!
50Arile, jo kameh ilih bolo isi udu mwena tek eme, eme ya jo aseken keme suwi ya lokohak!
51Ado anya jo eme munyak dah, ta amekes mondrei? Bwe! Jo katiye tado kamwenen, jo eme kameh ta apou lau.
52Na dah kameh, oro limeh badu boho kamen ra-em le, arile idah kameh apou oro, taloh a bilisiu ya la-uh a bilisiu ma oro andra-i.
53Idah kameh, oro apou oro, taman kameh andres i la-u nadun mwan, ma nadun ale kameh andres i la-u taman. Ya tinen kameh andres i la-u nadun badih, ma nadun badih ale kameh andres i la-u tinen. Ya salahun uru kayon kameh andres uru, i le buku aliy.”
54Eme Jises tiye i tiri anya, “I buku none ado atou kon abakak udu loboho an i andri, idah kameh, ado tanan, ur kameh eme. Ma idah kameh asahan handru.
55Ya, i buku none ado atou jor lan atohou badeh, ado tanan, idah kameh lolan. Ma idah kameh asahan handru.
56Bale ado bwe! Ado atou kalem ere bolo kandrah ma munyak, ma tiye amwenen. Arile, buku sah ja ado winiyan batou ma baleheya bamwenen iri kalem ta len dah bwe?
57“Ya buku sah ado winiyan ta amekes budon ta kandriyen mwasin bwe?
58Ki buku none ari ndramak tan losen udu tam ya iy katehei ou a ta sahou, ya sahou kahis le, badeh, ou ala hawen ya ah kasehek ta aliy bwena. I buku none ou bala bwe badeh, iy kameh seheyani ou ala mine iri lau ta anuhun sahou. Ano iri lau ta anuhun sahou kameh tiye iri lulik atehei ou ala bolo asiu lulik.
59Jo katiye tado kamwenen, ado winiyan bame len bwe, winiya le ado sihinei labai na luk in hamon ta maha-an tado.”
