Luk 22

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹Kabwai, mirihik ta len ta nyamon tinan, ta jabi ramen yis bolon bwe asahan ai, iri aloh Pasoba.

²Eme iri lau tinan tiri pris, hawe iri lau ta leheya kandriyen tiri Juwis anya kadi Jises ki san ta bahana le. Tasah, iri badeh, anoh iri lau solo-an ado aliy.

³Eme Satan badeh, i bolo ndramak ari badu bolo oro lau ma ronoh la-uh ta Jises, nyaran Judas Iskariyot.

⁴Eme iy ili edeu sa-oh i tiri lau tinan tiri pris, ma hawe iri lau tinan ta ndrokei ta atondrok asiu tinan ta Kindrei, ma oro asehek nyala aliy; ta Judas kameh edeu Jises ki mine oro ki buku sah handru.

⁵Eme oro sekesek ta aliy, ma sekesek ta asih Judas na luk.

⁶Eme Judas sekesek ta aliy, ma iy ili takaleh madasan ta kadeu Jises ki san ta bahana le, ya iri lau sala tanan ta aliy labai.

⁷Ano, len ta nyamon tinan ta jabi ramen yis bolon bwe badeh, asahan. Len doh, iri aloh Pasoba. Idoh badeh, iri pris adai sipsip kasen ta aimon ta Pasoba.

⁸Eme Jises suni Pita uru Jon kala Jerusalem ma tiye turu anya, “Ah kala bwena kalowosa lakou ta to ta aimon na len ta Pasoba.”

⁹Eme uru anya, “Ou aseken aru kala heh, kalowosa na to nyamon?”

¹⁰Eme Jises tiye turu anya, “Ah kanuhun. Ah kadek kala bolo kon tinan badeh, ya idah kameh, ah atou ndramak ari bwese-ei gwa in bolo sabok kameh ndruni ah. Eme ah ka-en hamon tan kala asiu iy ili aliy,

¹¹ma ah katiye ki ta ndramak ta asiu anya, ‘Ndramak ta leheya anya, asiu tan ndraheh? Ya idah kameh oro lau tan ma iy kameh aimon nyamon ta Pasoba a-en aliy.’

¹²Idah kameh, iy leheyani ah ta bolo asiu ari udu loken badeh, ndralowosani le. Eme ah kala aliy kamekes nyamon kudu le tato ai.”

¹³Eme uru ala amwenen le, i buku boho Jises ndratiye turu nane. Eme oro lowosani nyamon ta Pasoba ma asiu buku le aliy.

¹⁴Eme mada an ta aimon nyamon asahan badeh, Jises hawe oro lau tan manyah ado andri ndrahu nyamon.

¹⁵Ano iy tiye i toro anya, “Jo badeh, aseken handru ta aimon nyamon ta Pasoba dah hawe ado, tasah len hamon eme kameh, jo kameh bwese sisi-in tinan labai.

¹⁶Eme jo katiye tado kamwenen, jo kameh winiyan baimon nyamon na len ta Pasoba ja bwai; winiya le barasahan handru i san ta imek tek i nyara Pasoba, ma tondrok ta Kindrei winiya udu le buku doh.”

¹⁷Ano, Jises kuhi bwiniu ma iy edeu wurah, ma edeu salom, ma tiye anya, “Ado ka-un waen dah, a sese le ki winiya ado.

¹⁸Jo katiye tado kamwenen, jo kameh winiyan ba-un ndraye buwa waen dah ja bwai, winiya le tondrok ta Kindrei barasahan.”

¹⁹Ano Jises kuhi jabi ramen, iy edeu wurah i ta aliy, ano iy boso-ei i noro ma iy anya, “Idah odak amwenen. Jo edeu ta aseben ado. Ado kamekes kandriyen ki le buku doh ta abudon jo.”

²⁰Ano i le buku aliy, nyamon ano badeh, iy kuhi bwiniu waen, ma iy anya, “Bwiniu waen dah, kalem ta sahou randra le ha-un ja, ta ndrayek amou ewek ta aseben ado mari.

²¹Arile, ndramak ta edeu sa-oh tek hawe ta edeu jo i mine iri lau ndra-in badeh, manyah udu ndrahu nyamon hawek kada-ah.

²²Nadu Ndramak Awas kameh imek, ya sahou ta aliy bwai. Idoh in hamon ta seken ta Kindrei le. Arile sisi-in laba tinan kameh i bwele-e ndramak iy ale atehei iy ili mine iri lau ndra-in.”

²³Eme oro ndremenya oro ari ari ta are lau handru badu bolo oro doh kameh amekes lakou doh.

²⁴Ma hawe oro ale andres oro ta are handru kameh kudu bwele-en toro.

²⁵Eme Jises tiye i toro anya, “Iri kabin tiri lau badu leheleh badeh, atondrok iri lau tiri, ya oro aseken iri lau doh badeh, kaloh oro kawas toro ta aseben oro.

²⁶Arile, ado badeh, sala buku doh, ndri-iy labai. Are tado nyaran udu loken badeh, katehei iy keme andri ki buku nah bwisik. Ya are tado udu bwena badeh, iy kasahan lau ta gok kereu ndrokowa ado.

²⁷Are lau handru udu bwele-en? Ndramak ta asiu aimon nyamon deh, bwe, iy lohowan ta atiye nyamon? Sebwe iy ndramak ta asiu dah, nadeh? Arile, jo udu ndrokowa ado badeh, i buku lohowan ta aseben le ado.

²⁸Ado le badeh, baruwani jo bwe, ado an hawek na len mari jo bwese maha-an.

²⁹I buku none tama le edeu boto-on dah, eme tek ta atondrok, ya na dah jo kameh edeu ewek tado atondrok i le buku aliy.

³⁰Eme ya ado kameh aimon nyamon, ma a-un gwa ado bolo tondrok tek, ma ado kameh manyah ado koyeu hawek anuhun sahou toro boho kamen ma ronoh la-uh badu Isra-el.

³¹“Ou ndranuhun Saimon! Tama Balik Satan badeh, ndrasumon ta none ado mari ta anya kapou ado, i buku ndramak ta bilin aleben buwa wit i len, ya munyahun i len.

³²Arile, Saimon, jo badeh, ndrasolom ta budon handru tam sataku. Ya, i buku none ou taku, ou badeh, tubuni ndrinem ma ou aseben budon toro kirih ja.”

³³Arile, Pita tiye i ta Jises anya, “Laban, i buku none ou ala bolo kou kameh jo ewek hawem ale. Ya, i buku none ou amak kameh jo imek hawem ale.”

³⁴Eme Jises tiye i tan anya, “Pita, jo katiye tam kamwenen. Na ben kameh, kakaro baden bwe le, ou kameh besebes anya ou tanam jo bwe san tulusin.”

³⁵Ano Jises ndremenya oro anya, “Jo mene suni ado ala laleyah, ari kohoya ado bwe, ya ari kohei ndrahu luk tado bwe, ma hawe ari ku-i kati ado bwe. Eme ado andriliu ta ari lakou deh bwe?” Eme oro anya, “Bo-oh, aso bandriliu ta ari lakou bo-oh.”

³⁶Ya eme iy tiye i toro, “Arile, na dah kameh i buku none ado ari kohei ta kohoya luk bwe, hawe i buku none ado ari kohoya ado ari kohei ta ndrahu lakou bwe badeh, ado kasilah tado ai. Ma i buku none ado ari samen ta bahun bwe, badeh, ado katehei lakou tado ki ta sisih ya ado kasih samen ta bahun ki tado.

³⁷Sahou mene ndratorowenei anya; ‘Iri lau badeh, ondrek jo ale udu mada sahou, hawe iri lau ndra-in.’ Ya eme, jo katiye tado kamwenen, lakou doh kameh asahan handru eme badak. Handru labai sahou mene ndratorowenei asehek ta nyalak, ndrame bakep handru.”

³⁸Eme oro lau tan anya, “Laban, ou anyolom samen ta bahun la-uh asah idah.” Eme Jises anya, “Badeh, ka-iy ai.”

³⁹Ya eme, i buku none Jises mene ndramekes ndra-au ndra-au badeh, iy hawe oro lau tan ala bwili ndrondro-ou Olip.

⁴⁰Oro asos badeh, Jises tiye i toro anya, “Ado kasolom ki ta Kindrei ta ado, sataku sala bolo kandriyen ndra-in.”

⁴¹Ano iy ili bwena sese, reu i buku none ndramak korou bek kili kisos aliy en. Eme iy atehei bwili ndru-un i andri ma iy asolom anya,

⁴²“Tama, na seken tam le, i buku none ou aseken badeh, ou andrei bwiniu ta isi udu hawek ki-iu. Arile idoh budon tek le, ou amekes ta seken tam le kasahan ki handru.”

⁴³Eme angelo ari badu kandrah eme edeu boto-on i tan. Eme ya Jises atona maha-an laba tinan labai, ma iy asolom irih le gwek; ma sa-ar tan atekeu i buku none ndra i andri bada munyak.

⁴⁵Ano iy suri iy eme loke edek ili hawe oro lau tan atou oro ndramadin ta tikisiy.

⁴⁶Eme iy anya, “Ado amadin ta sasah? Ado kamak kasolom ki ta Kindrei ta ado sataku sala bolo kandriyen ndra-in.”

⁴⁷Ya eme iy asehek sahou kahis le, Judas, iy badu hawe oro lau ma ronoh la-uh nane, in mwena ma hawe lau rayah an hamon tan, ame. Iy edek eme hawe Jises anya kedeu bohon ki boho Jises.

⁴⁸Arile, Jises lelen iy anya, “Judas, ou kameh adeu bohom eme bohok ma leheya Nadu Ndramak Awas i mine iri lau ai?”

⁴⁹Eme oro lau ta Jises anyolom teheya lakou asahan badeh, oro tiye i ta Jises anya, “Laban, aso amundroh oro na samen ai?”

⁵⁰Eme ari toro badeh, mwetehei ndranye bonyo-ou ta tinan tiri pris ari, salin iu.

⁵¹Eme Jises eme anya, “Ka-iy ai!” Eme Jises atehei minen i ndranye bonyo-ou dah, ma ndranyen amwenen ja.

⁵²Ano Jises tiye i tiri tinan tiri pris, ma i tiri tinan ta atondrok asiu tinan ta Kindrei, ma hawe i tiri lau batun tiri Juwis nane, ame ta ateu iy dah anya, “Buku sah ya ado ame ma samen hawe kei? Jo ari lau ta amekes ramwes deh?

⁵³Jo badeh, udu hawe ado na len mari udu asiu tinan ta Kindrei, eme ya ado bateu jo bwe. Arile, na ben dah, ben tado ta amekes ai, tasah boto-on ta balik badeh, ndratondrok kon ai.”

⁵⁴Iri tawi Jises ma andrei iy ili asiu ta tinan tiri pris. Ya Pita badeh, edek udu hamon tiri amunum le, udu ndra len eme.

⁵⁵Ya iri badeh, tabani jih udu lohalak ta bolo kowah ta mada asiu doh, ma iri manyah anyan jih. Pita ili badeh, manyah udu hawe iri.

⁵⁶Eme badih ari ta lohowan atou Pita udu lomada jih. Eme iy anyolom Pita amwenen badeh, iy anya, “Iy ndramak kede-eh mene, ari badu hawen adeh.”

⁵⁷Eme Pita besebes anya, “Ou badih den, jo tanan iy ndramak kede-eh bo-oh.”

⁵⁸Ano udu ja badeh, ndramak ari atou iy ja anya, “Ou kede-eh, ari badu hawe oro adeh.” Eme Pita anya, “Aden, jo bwe!”

⁵⁹Ano udu luluwen badeh, ndramak ari ja anyolom Pita ili ili, ya iy seleyani Pita ma iy anya, “Iy ndramak kede-eh, badu hawen handru ma iy badu Galili.”

⁶⁰Eme Pita anya, “Aden, jo maliye sahou ou asehek badeh!” Pita asehek udu ndra bohon le badeh, kakaro eden.

⁶¹Eme ya Jises tubuni iy, ma anyolom amwenen eme ta Pita. Eme Pita bwetenei sahou ta Laban mene asehek i tan i buku doh: “Na ben dah kameh kakaro baden bwe le, ou kameh besebes anya ou tanam jo bwe san tulusin.”

⁶²Eme iy iu ili len, ma iy eden andra-i labai.

⁶³Ya eme oro lau ta ndrokei atondrok Jises badeh, bobose iy ma a-um iy.

⁶⁴Eme oro sawei madan na kolau ma oro andrek iy anya, “Abo, buku none ou propet, ou none tiye se, are lau a-um ou doh?”

⁶⁵Ma hawe oro asehek sahou ndra-in solo-an i badan.

⁶⁶Kon aleu badeh, iri lau tinan atukum ame hawe iri tinan tiri pris, hawe iri lau ta leheya kandriyen tiri Juwis atukum iri ase. Ano iri lau tiyani Jises ili ales udu mada iri.

⁶⁷Eme iri anya, “Abo, ou tiye taso! Ou kede-eh Krais deh?” Eme Jises anya, “I buku none jo katiye tado kameh, ado anya jo wasai.

⁶⁸Ma i buku none jo kandremenya ado ale kameh, ado winiyan basumon bohok bwe.

⁶⁹Arile, na dah ma na len eme kameh Nadu Ndramak Awas kameh manyah udu loboho lim salin ta Kindrei iy boto-on labai.”

⁷⁰Eme iri ndremenya iy anya, “Sebwe, ou kede-eh Nadu Kindrei ai?” Eme iy tiye i hamon i toro anya, “Ehe, ado tiye badeh, amwenen handru!”

⁷¹Ano iri anya, “To anya kanuhun bohon ja ta sasah? To ndranuhun amwenen udu bohon kede-eh!”