Kʋkɑlʋɣʋ 17

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

¹Ḿpʋ́ɣʋ́ Tɑcɑɑ tɔmɑ Moisi sɩ:

²Tɛlǝsɩ Alɔŋ pǝyɑlʋ kɔtʋlʋ Ɩlɑsɑɑ sɩ, lǝsɩ cofolonɑɑ kɛ kɔkɔ tɑɑ nɑ ń yɑsɩ mɑmɑlɑ. Pɑ kɛ́ mɑ nyǝm kɛ́.

³Cofolonɑɑ mpɛ pɑ kɛ́ Ɩsɔ nyǝ́mɑ kɛ́. Mpi tɔ, pɑ tɛmɑ-m-wɛɣɛ kɔtɑɣɑ lɑpǝnɑʋ. Amɑ mpɑ pɑ tɩ-wɛ tɔ pɑ sǝpɑ pɑ ɩsɑɣɑtʋ tɔɔ. Pǝ tɔɔ tɔ, pǝ wɛɛ sɩ pɑ́ hɛɛ-wɛ nɑ pɑ́ wɑɑsɩ kɔtɑɣɑ tǝlɑtɛ tɔɔ. Ɩlɛnɑ pɑ́ pǝsɩ Ɩsɛɣɛlɩ nyǝ́mɑ kɛ pʋlʋ kʋyʋsʋm.

⁴Ḿpʋ́ɣʋ́ kɔtʋlʋ Ɩlɑsɑɑ kpɑɣɑ yǝlɑɑ mpɑ kɔkɔ nyɑɣɑ mpʋ tɔ, pɑ nyǝɣǝlʋɣʋ kʋsɛɛmʋɣʋ cofolonɑɑ. Nɑ ɩ́ lu-wɛ nɑ ɩ́ wɑɑsɩ kɔtɑɣɑ tǝlɑtɛ.

⁵Mpʋ pǝ hʋlǝɣǝnɑ Ɩsɛɣɛlɩ nyǝ́mɑ sɩ, Alɔŋ lʋlʋɣʋ nyǝmɑ pɑɑsi kpɑɩ tʋ nɔɣɔlʋ ɩ fɛɩnɑ mpɑɑʋ sɩ ɩ́ tɑsɑ Tɑcɑɑ kɛ tulɑɑlʋ wɔpʋ. Ye wei ɩ́ lɑpɑ mpʋ, sǝm mpi Kolee nɑ ɩ wɑɑlɩ nyǝ́mɑ pɑ sǝpɑ tɔ, mpɩ pɩɩ kʋnɑ-ɩ. Ɩsɩɩ Tɑcɑɑ kɑ kpɑɑlʋɣʋ Alɔŋ nɑ Moisi nɔɣɔ tɔ.

⁶Tɛʋ femɑ ɩlɛnɑ Ɩsɛɣɛlɩ nyǝ́mɑ tǝnɑ nɑɑlɩ Alɔŋ nɑ Moisi kɛ cɑɣɑnɑʋ sɩ: Ɩ́ kʋwɑ Tɑcɑɑ yǝlɑɑ.

⁷Ḿpʋ́ɣʋ́ sɑmɑɑ kotinɑ Moisi nɑ Alɔŋ. Sɑɑ wei pɑ nyǝnnɑ Ɩsɔ cokǝle tɔɔ, ɩlɛnɑ pɑ́ nɑ́ nyɔɔsɩ nyɑlɑ timpi Tɑcɑɑ teeli nɑɑkɩ tɔ.

⁸Ɩlɛnɑ Moisi nɑ Alɔŋ pɑ́ polo tǝ ɩsɛntɑɑ.

⁹Ɩlɛnɑ Tɑcɑɑ tɔ Moisi sɩ:

¹⁰Hɑtǝlǝnɑ yǝlɑɑ mpɛ, nɑ mɑ́ kpiisi-wɛɣɛ tɔm kʋlʋm. Tǝnɑɣɑ Moisi nɑ Alɔŋ pɑ hotɑ pɑ ɩsɛntɔɔ.

¹¹Nɑ Moisi tɔ ɩ tɑɑlʋ sɩ: Polo tǝcɑʋ nɑ ń kpɑɣɑ nyɑ́ cofolo nɑ ń hee kɔtɑɣɑ tǝlɑtɛ tɔɔ kɔkɔ. Tʋ́ tulɑɑlʋ kɛ́ pǝ tɔɔ, nɑ ń lɑ sɑmɑɑ kɛ ɩsɑɣɑtʋ hɩɩsʋɣʋ kɔtɑɣɑ. Mpi tɔ, Tɑcɑɑ mʋ pɑ́ɑ́nɑ́ kɛ́ hɑlɩ ɩ tɛmɑ niŋ tʋɣʋ.

¹²Ḿpʋ́ɣʋ́ Alɔŋ kpɑɣɑ cofolo, ɩsɩɩ Moisi heeluɣu-ɩ tɔ. Ɩlɛnɑ ɩ́ cɔɔ sɑmɑɑ tɑɑ, nɑ ɩ́ nɑ́ sɩ pɑ tɔŋnɑ sǝpʋ. Ɩlɛnɑ ɩ́ wɔ tulɑɑlʋ, nɑ ɩ́ lɑ-wɛɣɛ ɩsɑɣɑtʋ hɩɩsʋɣʋ kɔtɑɣɑ.

¹³Ḿpʋ́ɣʋ́ ɩ sǝŋɑ mpɑ pɑ tɛmɑ sǝpʋ tɔ, nɑ ɩsɛ nyǝ́mɑ pɑ hɛkʋ tɑɑ. Ɩlɛnɑ sǝm hɛɛ.

¹⁴Kolee wɑɑlɩ nyǝ́mɑ mpɑ pɑ sǝpɑ lɔŋ tɔ pɑ pɑɑsi yǝlɑɑ iyisi nɑɑnʋwɑ nɑ liɣiti nɑ nɑsǝtoso nɑ nɩɩnʋwɑ (14.700) sǝpǝnɑ tɔtɔ.

¹⁵Ntɛnɑ Alɔŋ mǝlɩ Moisi kiŋ kɛ Ɩsɔ cokǝle nɔnɔɣɔ kɛ sɑɑ wei sǝm hɛɛwɑ tɔ.

¹⁶Ḿpʋ́ɣʋ́ Tɑcɑɑ tɔmɑ Moisi sɩ:

¹⁷Heeli Ɩsɛɣɛlɩ kpekɑ nyɔɔŋ nyǝ́mɑ sɩ pɑɑ wei ɩ́ kɔnɑ kpɑ́tʋ́ɣʋ́. Pǝ kpɛntǝɣɩ kpɑtǝŋ nɑɑnʋwɑ nɑ nɑɑlɛ kɛlɛ. Ɩlɛnɑ ɩ́ ŋmɑɑ pɑɑ mpɑ pɑ kpekǝle hǝtɛ kɛ pɑ nyǝŋkʋ tɔɔ.

¹⁸Amɑ Alɔŋ hǝtɛ kɛ ɩ́ kɑ́ ŋmɑɑ Lefii nyǝ́mɑ nyǝŋkʋ tɔɔ. Ɩlɛnɑ pɑɑ kpekǝle tʋ wei ɩ́ wɛɛnɑ ɩ nyǝŋkʋ.

¹⁹Ɩlɛnɑ Tɑcɑɑ sɩ: Moisi sɩɩ kpɑtǝŋ ɩnǝɣɩ Ɩsɔ cokǝle tɑɑ kɛ́ ɑtɑkɑɑ kiŋ, kɛ timpi mɑ́ nɑ-mɛ tǝ suliɣi tɔ.

²⁰Nɑ mɑ́ lǝsɑ wei, ɩ́lɛ́ ɩ kpɑ́tʋ́ɣʋ́ nɛɣɛtǝɣǝnɑ ntɛ́. Ɩlɛnɑ mɑ́ sɩɩ tǝnɑɣɑ kɛ kʋntǝnɑʋ mpi Ɩsɛɣɛlɩ nyǝ́mɑ kʋntǝɣǝnɑ-mɛ tɔ.

²¹Mpʋɣʋlɛ Moisi tɛlǝsɑ Ɩsɛɣɛlɩ nyǝ́mɑ kɛ tɔm ntɩ. Nɑ kpekɑ nyɔɔŋ nyǝ́mɑ kɔnɑ-ɩ pɑ kpɑtǝŋ nɑ Alɔŋ nyǝŋkʋ kɑ wɛ hɛkʋ tɑɑ. Ɩlɛnɑ pǝ́ lɩɩ kpɑtǝŋ nɑɑnʋwɑ nɑ nɑɑlɛ.

²²Ɩlɛnɑ Moisi sɩɩ kpɑtǝŋ ɩnǝɣɩ Ɩsɔ cokǝle tɑɑ kɛ́ ɑtɑkɑɑ ɩsɛntɑɑ.

²³Tɛʋ femɑ, nɑ Moisi sʋʋ tǝ tɑɑ, ɩlɛ ɩ mɑɣɑnɑ Lefii kpekǝle tʋ Alɔŋ kpɑ́tʋ́ɣʋ́ nɛɣɛtɑɑ kɛlɛ. Nɑ kʋ́ tʋ́ hɛtʋ. Hɑlǝnɑ kʋ́ lʋlɩ pee nɑ ɑ́ pɩɩwɑ.

²⁴Ḿpʋ́ɣʋ́ Moisi kuu kpɑtǝŋ tǝnɑ, nɑ ɩ́ ponɑ Ɩsɛɣɛlɩ nyǝ́mɑ nɑ pɑɑ wei ɩ́ nɑ. Ɩlɛnɑ pɑɑ nyʋɣʋ tʋ wei ɩ́ kpɑɣɑ ɩ nyǝŋkʋ.

²⁵Ntɛnɑ Tɑcɑɑ tɑsɑ Moisi kɛ heeluɣu sɩ: Polo ń sɩɩ Alɔŋ kpɑ́tʋ́ɣʋ́ kɛ ɑtɑkɑɑ kiŋ, nɑ pǝ́ tɔɔsɩ Ɩsɛɣɛlɩ nyǝ́mɑ kɛ pɑ kɑɑnɩɩtʋ. Ɩlɛnɑ pɑ kʋntʋɣʋ sɩɩ tǝnɑɣɑ. Ɩlɛ pɑ kɑɑ tɑsɑ sǝm.

²⁶Ḿpʋ́ɣʋ́ Moisi lɑpɑ teitei kɛ́ mpʋ.

²⁷Ḿpʋ́ɣʋ́ Ɩsɛɣɛlɩ nyǝ́mɑ tɔmɑ Moisi sɩ: Nyǝnɩ ɩsǝnɑ tɑ tǝnɑ tǝ sǝkɩ nɑ tǝ́ tɛŋ tɔ.

²⁸Tɑ́ tɑɑ wei ɩ́ kpǝtǝnɑ Ɩsɔ tǝcɑɣɑlɛ, ɩ́lɛ́ ɩ sɩ. Tɑ́ tǝnɑ tɩɩ sǝnɑ ntɛ́?