Kʋkɑlʋɣʋ 32

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

¹Lupɛŋ nɑ Kɑtɩ pǝ yǝlɑɑ kɑ wɛnɑ kɑlǝkǝŋ sɔsɔɔŋ kɛ tuutuumɑ kɛ́. Ɩlɛnɑ pɑ́ cɛkǝnɑ sɩ Yɑsɛɛ tɛtʋ hɔɣɔlʋɣʋ, nɑ Kɑlɑɑtɩ tɛtʋ kɑ mʋnɑ tɔlɑ tɔɔʋ.

²Pǝ tɔɔ kɛ́ pɑ polɑɑ nɑ pɑ́ mɑɣɑnɑ Moisi nɑ kɔtʋlʋ Ɩlɑsɑɑ nɑ kpekɑ nyɔɔŋ nyǝ́mɑ nɑ pɑ́ heeli-wɛ sɩ:

³Atɑlɔtɩ, nɑ Tipɔŋ, nɑ Yɑsɛɛ, nɑ Nimlɑ, nɑ Hɛsǝpɔŋ, nɑ Ɩlɑle, nɑ Sepɑm, nɑ Nepo, nɑ Peyoŋ pǝ ɑcɑlɛɛ kɛ́

⁴Tɑcɑɑ sǝnɑ Ɩsɛɣɛlɩ nyǝ́mɑ nɑ pɑ́ mʋ tɛtʋ nti tɔ, tǝ nyǝ́mɑ kɛ́. Tɛtʋ ntɩ tǝ mʋnɑ tɔlɑ tǝtɔɔlɛ. Pǝ́cɔ́ tɑ́ mɑɣɑmɑɣɑ tǝ wɛnɑ kɑlǝkǝŋ.

⁵Ɩlɛnɑ pɑ́ sǝlǝmɩ Moisi sɩ ɩ hɑ-wɛɣɛ tɛtʋ ntɩ. Ɩ́ tɑɑ tɛsǝnɑ-wɛɣɛ Yɑɑtɑnɩ wɑɑlɩ tɔɔ.

⁶Mpʋɣʋlɛ Moisi pɔɔsɑ-wɛ sɩ: Ɩsǝnɑɣɑlɛ mpʋ? Mǝ tɛɛtʋnɑɑ nɑ́ puki yoou ntɛ́ nɑ mɩɩ cɑɣɑ cǝnɛ tǝpɑmm nɑ?

⁷Ye mɩɩ cɑɣɑnɑ cǝnɛ pɩɩ yɔɔlɩ pɛlɛ pɑ ɑpɑlʋtʋ, pɑ kɑɑ polo tɛtʋ nti Tɑcɑɑ hɑ-wɛ tɔ tǝ tɑɑ.

⁸Yɑɑsi kʋlʋm ɩnǝɣɩ mǝ cɑɑnɑɑ tɛmɑ lɑpʋ kɛ wɑɑtʋ wei mɑ kʋsɑ-wɛɣɛ Kɑtɛɛsɩ-Pɑɑneyɑ sɩ, pɑ́ polo pɑ feŋ Kɑnɑɑŋ tɛtʋ tɔ.

⁹Pɑ polɑ Ɩsǝkɔɔlɩ tɛtɛkǝlɛ tɑɑ nɑ pɑ́ cɔɔ-tɛ, nɑ pɑ́ mǝlɩ. Ɩlɛnɑ pɑ́ yɔɔlɩ Ɩsɛɣɛlɩ nyǝ́mɑ ɑpɑlʋtʋ sɩ, pɑ́ tɑɑ sʋʋ tɛtʋ nti Tɑcɑɑ kɑ hɑ-mɛɣɛ hɑtoo lɔŋ tɔ tǝ tɑɑ.

¹⁰Hɑlɩ Tɑcɑɑ mʋ pɑ́ɑ́nɑ́ kɛ kʋyɑkʋ ŋkʋ nɑ ɩ́ tuu sɩ:

¹¹Mǝ tǝnɑ mpɑ ɩ́ lɩɩ Icipiti nɑ ɩ́ wɛnɑ pɩɩsɩ hiu nɑ wɑɑlɩ tɔ, ɩ́ kɑɑ nɑ tɛtʋ nti mɑ sɩɩwɑ sɩ mɑ hɑɑkɩ Apǝlɑhɑm nɑ Ɩsɑɑkɑ nɑ Yɑkɔpʋ tɔ. Mpi tɔ, ɩ́ tɑ́ nɩɩnɑ-m teu.

¹²Ye pǝ tɑɣɑ Kenɑsɩ lʋlʋɣʋ tʋ Yefune pǝyɑlʋ Kɑlɛpʋ, nɑ Nuŋ pǝyɑlʋ Yosuwee pɑ tike pɑɑ sʋʋnɑ. Pǝ tɑɣɑ pʋlʋ, mpɛ ɩnɩ pɑ nɩɩnɑ-m teu kɛ́.

¹³Pǝ tɔɔ kɛ́ Tɑcɑɑ mʋ pɑ́ɑ́nɑ́ nɑ Ɩsɛɣɛlɩ nyǝ́mɑ nɑ pɑ́ tɔɣɔ pɩɩsɩ nɩɩlɛ tǝcu kɛ wʋlɑɣɑ tɛtʋ tɑɑ. Hɑlǝnɑ mpɑ ɩnɩ Ɩsɔ tɑɑ kpɑnɑ mpʋ tɔ, pɑ́ sɑɑlɩ yem kɛ́ tǝnɑ.

¹⁴Ɩlɛnɑ ɑsɑɣɑɑ mɛ, ɩ́ cɑɑ sɩ ɩ́ tǝŋ mǝ cɑɑnɑɑ ɩkpɑtɛ nɑ ɩ́ kʋsɩ Tɑcɑɑ pɑ́ɑ́nɑ́ kɛ mǝ tɔɔ.

¹⁵Ye Lupɛŋ nɑ Kɑtɩ nyǝ́mɑ mɛ, ɩ́ tɑ́ nɩɩnɑ Tɑcɑɑ, ɩ́lɛ́ ɩ yeki kɛ́ nɑ mǝ kʋyɛɛŋ tɑɣɑlɩ wʋlɑɣɑ tɛtʋ tɑɑ. Ɩlɛ ɩ́ wɑkǝlɑ Ɩsɛɣɛlɩ nyǝ́mɑ ntɛ́.

¹⁶Mpʋɣʋlɛ ɑpɑlɑɑ mpɛ pɑ kpǝtǝnɑ Moisi nɑ pɑ́ tɔ sɩ: Aɑɩ yoo, tɩɩ ŋmɑ́ tɑ́ kɑlǝkǝŋ kɛ tǝcɑɣɑlɛ, nɑ tɑ́ tɛɛsɩ nyǝ́mɑ kɛ koloosi ɑcɑlɛɛ.

¹⁷Ɩlɛnɑ tɑ́ yǝlɑɑ cɔɔsɩ tǝnɑ. Tɛtʋ nyǝ́mɑ ɩ́ tɑɑ pǝsɩ-wɛ. Pǝ wɑɑlɩ ɩlɛnɑ tǝ́ co tɑ́ yoou wontu tǝcɑʋ nɑ tǝ́ tɛɛ tɑ́ tɛɛtʋnɑɑ kɛ nɔɣɔ nɑ tǝ́ ponɑ-wɛɣɛ tɛtʋ nti pɑ hɑ-wɛ tɔ tǝ tɑɑ.

¹⁸Pɑɑ Ɩsɛɣɛlɩ tʋ wei ɩ kɑ́ cɑɣɑ ɩ tɛtʋ tɔɔ kɛ́ nɑ pǝ́cɔ́ tǝ mǝlɩ tɑ́ tɛ́.

¹⁹Ye tǝ hikɑ tɛtʋ nɑ pɔɣɔ nɑ cǝnɛ tɔɔ, pɑ́ tɑɑ tɑsɑ-tʋɣʋ tɛtʋ hɑʋ nɑ pɔɣɔ nɑ wɑɑlɩ tɔɔ.

²⁰Ntɛnɑ Moisi sɩ: Ye ɩ tɔkɑ ɩsɩɩ ɩ yɔɣɔtʋɣʋ tɔ, nɑ ɩ́ suu mǝ yoou wontu, nɑ ɩ́ tɛsɩ Yɑɑtɑnɩ nɑ ɩ́ polo mǝ kolontunɑɑ tɔɔ, nɑ Tɑcɑɑ tʋ-wɛɣɛ mǝ niŋ tɑɑ,

²¹ɩlɛ tɛtʋ tǝnɑ pǝsɩ mǝ nyǝntʋ. Wɑɑtʋ ɩnɩ Tɑcɑɑ yɑɑ mǝ tɛɛtʋnɑɑ tɑɑ kɑɑ kpɑnɑ-mɛ. Pǝyele Ɩsɔ kɑ́ yelinɑ-mɛɣɛ mǝ tɛtʋ tǝnɛ nɑ pɔɣɔ nɑ cǝnɛ tɔɔ.

²³Amɑ ye ɩ́ tɑ́ lɑ́ mpʋ, ɩ́ kɑ́ pǝntǝnɑ Tɑcɑɑ, nɑ pǝ́ mǝlɩ mǝ nyɔɔŋ tɑɑ.

²⁴Pǝ wɛ teu, ɩ́ ŋmɑ́ mǝ nyǝ́mɑ kɛ tɛɛsɩ nɑ mǝ tɔlɑ tǝtǝkǝlɛ. Amɑ ɩ́ tɑɑ sɔɔ nti mɑ yɔɣɔtɑɑ nɑ mɑ́ sɩɩ tɔɣɔ tɔkʋɣʋ kɛ́.

²⁵Mpʋɣʋlɛ Lupɛŋ nɑ Kɑtɩ pǝ nyǝ́mɑ cɔwɑ Moisi sɩ: Tɩɩ lɑ ɩsɩɩ n sɩɩʋ tɔ.

²⁶Tɩɩ yele tɑ́ ɑlɑɑ nɑ tɑ́ piyɑ nɑ tɑ́ kɑlǝkǝŋ kɛ Kɑlɑɑtɩ ɑcɑlɛɛ tɑɑ,

²⁷nɑ tǝ́ kpɑɣɑ tɑ́ wontu nɑ tǝ́ polo Tɑcɑɑ yoou, ɩsɩɩ n yɔɣɔtʋɣʋ tɔ.

²⁸Ḿpʋ́ɣʋ́ Moisi heelɑ pɑ tɔm kɛ kɔtʋlʋ Ɩlɑsɑɑ, nɑ Nuŋ pǝyɑlʋ Yosuwee, nɑ Ɩsɛɣɛlɩ kpekɑ nyɔɔŋ nyǝ́mɑ.

²⁹Ɩlɛnɑ ɩ́ tɔ-wɛ sɩ: Ye Kɑtɩ nɑ Lupɛŋ nyǝ́mɑ kpɑɣɑ yoou wontu, nɑ mǝ nɑ-wɛ ɩ́ tɛsɩ mǝ kolontunɑɑ wɑɑlɩ, ɩsɩɩ Tɑcɑɑ yɔɣɔtʋɣʋ tɔ, nɑ ɩ́ kǝlɩ-wɛ, ɩlɛ mɩɩ cɛlɛ-wɛɣɛ Kɑlɑɑtɩ tɛtʋ.

³⁰Amɑ ye pɑ kisɑ mpʋ ɩlɛ Kɑnɑɑŋ tɛtʋ kɛ mǝ tǝnɑ ɩ́ kɑ́ tɑlɑ.

³¹Ḿpʋ́ɣʋ́ Kɑtɩ nɑ Lupɛŋ pǝ nyǝ́mɑ tɑsɑ yɔɣɔtʋɣʋ sɩ: Tɩɩ lɑ nti Tɑcɑɑ heelɑ-tʋ tɔ.

³²Tɩɩ kpɑɣɑ tɑ́ wontu nɑ tǝ́ polo Tɑcɑɑ yoou, nɑ pɑ́ cɛlɛ-tʋɣʋ tɑ́ tɛtʋ nɑ Yɑɑtɑnɩ nɑ cǝnɛ tɔɔ.

³³Ḿpʋ́ɣʋ́ Moisi cɛlɑ Kɑtɩ nɑ Lupɛŋ pɑ kpekɑ nɑ Yosɛɛfʋ pǝyɑlʋ Mɑnɑsee nyǝntɛ hɔɣɔlʋɣʋ kɛ Amolii wulɑʋ Sihoŋ, nɑ Pɑsɑŋ nyǝŋ Oki pɑ tɛtʋ nɑ pɑ ɑcɑlɛɛ.

³⁴Ḿpʋ́ɣʋ́ Kɑtɩ nyǝ́mɑ ŋmɑwɑ koloosi kɛ Tipɔŋ nɑ Atɑlɔtɩ nɑ Alowɛɛ

³⁵nɑ Atǝlɔtɩ-Sofɑŋ nɑ Yɑsɛɛ nɑ Yokpɑhɑ

³⁶nɑ Pɛtɩ-Nimlɑ nɑ Pɛtɩ-Hɑlɑŋ pǝ ɑcɑlɛɛ. Nɑ pɑ́ ŋmɑ́ tɔtɔɣɔ pɑ tɔlɑ tǝtǝkǝlɛ.

³⁷Ɩlɛnɑ Lupɛŋ nyǝ́mɑ ŋmɑ Hɛsǝpɔŋ nɑ Ɩlɑle nɑ Kiliyɑtɑyim

³⁸nɑ Nepo nɑ Pɑɑlɩ-Meyɔŋ nɑ Sipǝmɑ nɑ pɑ́ hɑ-yɛɣɛ hǝlɑ.

³⁹Ḿpʋ́ɣʋ́ Mɑnɑsee pǝyɑlʋ Mɑkii nyǝ́mɑ nɑ́ yoonɑ Kɑlɑɑtɩ nyǝ́mɑ, nɑ pɑ́ tɔɣɔnɩ Amolii nyǝ́mɑ nɑ pɑ́ cɑɣɑ.

⁴⁰Pǝ tɔɔ kɛ́ Moisi nɑ́ yelinɑ-wɛɣɛ-tɩ.

⁴¹Ɩlɛnɑ Mɑnɑsee pǝyɑlʋ Yɑyii nyǝ́mɑ nɑ́ɑ́ lɛɛkɩ Amolii nyǝ́mɑ ɑcɑlɛɛ lɛnnɑ, nɑ pɑ́ hɑ-yɛ sɩ Yɑyii ɑcɑlɛɛ.

⁴²Pǝ wɑɑlɩ kɛ́ Nopɑ nɑ́ lɛɛkɑ Kenɑ ɩcɑtɛ nɑ pǝcɔlɔ nyǝnɑ, nɑ ɩ́ hɑ-yɛɣɛ ɩ hǝtɛ sɩ Nopɑ.