Kʋkɑlʋɣʋ 27

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

¹Ḿpʋ́ɣʋ́ Yosɛɛfʋ pǝyɑlʋ Mɑnɑsee, nɑ Mɑnɑsee pǝyɑlʋ Mɑkii, nɑ Mɑkii pǝyɑlʋ Kɑlɑɑtɩ nɑ Kɑlɑɑtɩ pǝyɑlʋ Hefɛɛ, nɑ Hefɛɛ pǝyɑlʋ Selofɑtɩ. Selofɑtɩ ɩnɩ ɩ pɛɛlɑɑ Mɑlɑ nɑ Nowɑ nɑ Hokǝlɑ nɑ Milikɑ nɑ Tiisɑ pɑ polǝnɑ

²Moisi nɑ kɔtʋlʋ Ɩlɑsɑɑ nɑ Ɩsɛɣɛlɩ kʋpɑɣɑlɑɑ tǝnɑ kiŋ kɛ Ɩsɔ cokǝle nɔnɔɣɔ nɑ pɑ́ tɔ sɩ:

³Tɑ́ cɑɑ sǝpɑ wʋlɑɣɑ tɛtʋ tɑɑ kɛ́ ɩ ɩsɑɣɑtʋ tɔɔ, ɩ tɑ yele ɑpɑlʋpǝyɑɣɑ. Amɑ ɩ fɛɩ Kolee nɑ ɩ wɑɑlɩ nyǝ́mɑ mpɑ pɑ kʋlɑ Tɑcɑɑ tɔɔ kɛ́ wʋlɑɣɑ tɛtʋ tɑɑ tɔ pɑ tɑɑ.

⁴Mpʋ tɔ, ɩ́ hɑ tɑ́ nɑ tɑ́ cɑɑ yǝlɑɑ kɛ tɛtʋ. Pǝ́ tɑɑ kɔɔ nɑ ɩ hǝtɛ sɑɑlɩ yem. Mpi tɔ, ɑlʋpiyɑ tike kɛ ɩ lʋlɑɑ.

⁵Ḿpʋ́ɣʋ́ Moisi hʋlɑ Tɑcɑɑ kɛ pɑ kʋsǝlǝmʋtʋ ntɩ.

⁶Nɑ ɩ́lɛ́ ɩ tɔ́ sɩ:

⁷Pɛɛlɑɑ mpɛ pɑ kʋsǝlǝmʋtʋ wɛ teu. Ɩ́ cɛlɛ-wɛɣɛ pɑ cɑɑ tɛtʋ kɛ ɩ́lɛ́ ɩ lʋlʋɣʋ nyǝ́mɑ nyǝntʋ kiŋ.

⁸Pǝ wɛɛ sɩ ń tɛlǝsɩ Ɩsɛɣɛlɩ nyǝ́mɑ sɩ ye ɑlʋpiyɑ tike kɛ yʋlʋ lʋlɑɑ nɑ ɩ́ sɩ, pɑ́ cɛlɛ-sǝɣɩ ɩ kpɑncoou.

⁹Ye ɩ fɛɩnɑ ɑlʋpǝyɑɣɑ, ɩlɛ pɑ cɛlɑ ɩ kpɑncoou kɛ ɩ neu yɑɑ ɩ tɑɑlʋ.

¹⁰Yɑɑ ye ɩ fɛɩnɑ neu yɑɑ tɑɑlʋ, ɩlɛ pɑ cɛlɑ ɩ kpɑncoou kɛ ɩ cɑɑ tɑɑlʋ yɑɑ ɩ neu.

¹¹Yɑɑ ye ɩ cɑɑ fɛɩnɑ tɑɑlʋ yɑɑ neu, ɩlɛ pɑ cɛlɑ ɩ kpɑncoou kɛ ɩ lʋlʋɣʋ nyǝ́mɑ tɑɑ wei ɩ kǝlɑ-ɩ kpǝtǝnɑʋ tɔ. Pǝ kɛ́ Ɩsɛɣɛlɩ nyǝ́mɑ kɛ kʋsǝsɩɩtʋ kɛ́ ɩsɩɩ mɑ kɛɛsʋɣʋ-wɛ tɔ.

¹²Ḿpʋ́ɣʋ́ Tɑcɑɑ tɔmɑ Moisi sɩ: Kpɑ Apɑlim pʋɣʋ tɔɔ nɑ ń loosi tɛtʋ nti mɑ hɑɑkɩ Ɩsɛɣɛlɩ nyǝ́mɑ tɔ.

¹³N kɑ́ nɑ-tɩ yɑɑ. Amɑ n kɑ́ sɩ teitei kɛ́ ɩsɩɩ nyɑ́ tɑɑlʋ Alɔŋ.

¹⁴Pǝ tɑɣɑ pʋlʋ, ɩ́ tɑ́ tɔkɩ mɑ tɔm kɛ Siŋ wʋlɑɣɑ tɛtʋ tɑɑ kɛ́ wɑɑtʋ wei sɑmɑɑ yookɑɣɑnɑ-m tɔ. Ɩ́ tɑ́ fɑɣɑsɩ-m nɑ mɑ mpɑɑ kɛ wɑɑtʋ wei ɩ́ sǝlǝmɑɣɑ lʋm tɔ. Yoou lʋm mpi pɑ yɑɑnɑ pɑ tɛ tɑɑ sɩ, Melipɑ kɛ Siŋ wʋlɑɣɑ tɛtʋ tɑɑ kɛ́ Kɑtɛɛsɩ tɔ pǝ tɔm kɛ ɩ yɔɣɔtǝɣɩ.

¹⁵Mpʋɣʋlɛ Moisi cɔwɑ Tɑcɑɑ sɩ:

¹⁶Hɑɩ, Ɩsɔ Tɑcɑɑ nyɑ́ wei n hɑɑkɩ weesuɣu tɔ, kpɑ yǝlɑɑ pɑnɛ pɑ nyʋɣʋ tʋ,

¹⁷wei ɩ kɑ pǝsɩ nɑ ɩ́ pɑɑsǝnɑ-wɛɣɛ pɑɑ wɑɑtʋ wei tɔ, nɑ pɑ́ tɑɑ wɛɛ ɩsɩɩ kɑlǝkʋ ŋku kʋ lɑŋɑ tiikilu tɔ.

¹⁸Mpʋɣʋlɛ Tɑcɑɑ tɔmɑ Moisi sɩ: Nuŋ pǝyɑlʋ Yosuwee kɛ́ yʋlʋ wei ɩ tɑɑ mɑ Feesuɣu hɑɣɑɑ tɔɣɔ. Yɑɑ-ɩ nɑ ń tʋ-ɩ tǝmlɛ ntɛ́.

¹⁹Ponɑ-ɩ kɔtʋlʋ Ɩlɑsɑɑ kiŋ kɛ Ɩsɛɣɛlɩ nyǝ́mɑ tǝnɑ ɩsɛntɑɑ, nɑ ń lɑpɩ-ɩ wei ɩ kɑ lɛɛtɩ nyɑ́ lonte tɑɑ tɔ.

²⁰Pɑsɑ-ɩ nyɑ́ sɔsɔɔntʋ hɔɣɔlʋɣʋ. Ɩlɛnɑ Ɩsɛɣɛlɩ nyǝ́mɑ nyɑnɑ-ɩ.

²¹Kɔtʋlʋ Ɩlɑsɑɑ kɑ́ pɛɛkǝɣǝnɑ-ɩ Tɑcɑɑ luɣu nyǝntʋ nɑ kɔtɑɣɑ wontu nti pɑ yɑɑ sɩ wulim nɑ tumim tɔ. Ɩlɛnɑ ɩnɩ nɑ Ɩsɛɣɛlɩ sɑmɑɑ pɑ́ tǝŋǝɣɩ-tɩ.

²²Ḿpʋ́ɣʋ́ Moisi mʋwɑ Tɑcɑɑ tɔm, nɑ ɩ́ yɑɑ Yosuwee kɛ kɔtʋlʋ Ɩlɑsɑɑ kiŋ kɛ Ɩsɛɣɛlɩ nyǝ́mɑ tǝnɑ ɩsɛntɑɑ.

²³Nɑ Moisi tǝnɩ niŋ kɛ Yosuwee tɔɔ, nɑ ɩ́ lɑpɩ-ɩ ɩ lonte tɑɑ lɛɛtʋlʋ ɩsɩɩ Tɑcɑɑ kɛɛsʋɣʋ-ɩ tɔ.