Jó 3

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Iahykaw rehe Izo uze'eg kury. Omono uze'egaiw 'ar uzexak kar awer rehe. Na'aw Izo ize'eg awer xe.

³Tuwe Tupàn omono ze'egaiw hezexak kar awer 'ar rehe nehe. Tuwe Tupàn omono ze'egaiw a'e ipytunaw rehe nehe. — Uzexak kar a'e, i'i a'e 'ar mehe wà. — Awa a'e, i'i wà.

⁴Tuwe a'e 'ar uzeapo ipytunahy haw romo nehe. Tuwe Tupàn ywate har nuzekaiw kwaw a'e 'ar rehe nehe. Tuwe tatainy nuhyape pixik kwaw a'e 'ar rehe nehe.

⁵Tuwe ipytunahy haw wiko izar romo nehe. Tuwe ywàkun upyk nehe. Tuwe ywàkun umuwew kwarahy heny haw a'e 'ar rehe har nehe.

⁶Tuwe a'e ipytunaw ipytunahy tuweharupi nehe. Tuwe ukàzym 'ar ipapar haw wi nehe.

⁷Tuwe a'e ipytunaw upyta umyrypar 'ym romo nehe, uzemumikahy ma'e romo nehe. Tuwe ni amo nuenu kwaw amo urywete haw rehe wanehapukaz mehe wà nehe.

⁸Amo paze ma'e ikàg wera'u àzàg Erewiàtà her ma'e wi wà. Tuwe a'e paze ma'e omono uze'egaiw a'e ipytunaw rehe wà nehe.

⁹Tuwe zahytata izi'itahy har a'e ipytunaw rehe har uwew wà nehe. Tuwe uwàro tatainy nehe. Tuwe tatainy nur kwaw izupe nehe. Tuwe na'iku'em pixik kwaw nehe.

¹⁰Ta'e hemuzexak kar hehy pe a'e xe. Nahemunyryk kwaw ko ma'erahy wi.

¹¹Màràzàwe tuwe nazexak kar kwaw umàno ma'e kwer romo. Màràzàwe tuwe namàno kwaw hezexak kar mehe.

¹²Màràzàwe tuwe hehy hepyhyk u'uwaromo a'e. Màràzàwe tuwe umur ukàm ihewe hemukamu kar pà ipupe.

¹³Aze mo àmàno a'e 'ar mehe we, Aker mo ko 'ar rehe. Apytu'u mo ma'erahy ipuraraw 'ym pà.

¹⁴Aiko mo tuwihawete wanehe we. Aiko mo tuwihaw upuner ma'e wanehe we. A'e tuwihaw uzapo wi wàpuzuhu kwehe arer wà.

¹⁵Aiko mo tuwihaw wanehe we. A'e tuwihaw umynehem wàpuz or pupe wà, parat pupe wà no.

¹⁶Aze mo hehy hezuka zemim hezexak kar 'ym mehe we a'e. Naikuwe iwer mo ihe. Aiko mo kwarer 'ar hexak 'ymar ài.

¹⁷Tywypaw pe upaw ikatu 'ym ma'e wanemimutar. Ikene'o ma'e upytu'u a'e pe wà.

¹⁸Imunehew pyrer upytu'u a'e pe uzeinuinuromo wà. Nuenu kwaw uwihaw hehapukaz haw a'e pe wà.

¹⁹Upuner ma'e wiko a'e pe wà. Upuner 'ym ma'e wiko a'e pe wà no. Uma'ereko e ma'e kwer utyryk uzarer wanuwi wà no.

²⁰Màràzàwe tuwe uzemumikahy ma'e wexak wiwi tatainy wà. Màràzàwe tuwe teko nuzuka kwaw upy'a pupe uzemumikahy ma'e wà.

²¹Uwàro umàno àwàm waiko wà. Nur kwaw a'e. Uputar umàno àwàm temetarer tetea'u wi wà. Nezewe rehe we nur kwaw wanupe.

²²Uzetymaw pupe uwezyw mehe hurywete wà. Hurywete azeharomoete wà.

²³Tupàn umuata kar hehàpyhà 'ym ma'e zàwe wà. Umàmàn waiwyr paw rupi wà.

²⁴Namai'u kwaw ihe. Azai'o. Hekuhemaw uzeakook 'y ài.

²⁵Akyze amo ma'e uzeapo ma'e ràm wi ihe. Uzeapo tuwe a'e ma'e. Akyze tuwe amo ma'e wi. A'e ma'e nuzawy kwaw tuwe hemugaz taw a'e.

²⁶Naiko kwaw zeàmàtyry'ymaw rehe. Naheta kwaw hepytu'u haw ihewe. Naheawoawotahy kwaw zote ihe.