1Izo uze'eg putar a'e nehe kury.
2Agwer ma'e ainu kwehe mehe ihe. Nahemurywete kar kwaw pe. Hemuzemumikahy kar pe.
3Aipo ko peze'eg ywytu zàwenugar nupaw pixik kwaw nehe. Màràzàwe tuwe napepytu'u kwaw heputupyk ire.
4Aze mo pepuraraw ma'erahy peiko hezàwe, Apuner mo peze'egaw imume'u haw rehe. Azeàkàgmuawawak mo ma'e kwaw katu har ài. Apukamikamik mo heze'eg tetea'u pupe no.
5Apuner mo ze'eg purumurywete kar ma'e imume'u haw rehe. Nezewe mehe mo ma'erahy rehe napezemumikahy iwer mo nezewe.
6Aze aze'eg, herahy haw noho kwaw ihewi. Aze apytu'u heze'eg ire, heremipuraraw nupaw kwaw no.
7Ne o Tupàn ne, herezar pe kwez ikàg 'ym ma'e romo ne. Eremumaw heànàm paw ne wà.
8Hemono pe zemunehew paw zàwenugar pupe. A'e rupi 'aw awa umume'u heremiapo kwer ikatu 'ym ma'e wà. Xo hepir zo heta ihewe kury. Xo hekagwer zo no. A'e rupi, — Ikatu 'ym ma'e iapo har romo ereiko, i'i amogwer ihewe wà.
9Wikwahy mehe Tupàn hereityk azeharomoete a'e. Na'iakatuwawahy kwaw herehe ume'e mehe. Nuzawy kwaw miar ipuruzukaiwahy ma'e. Ur heraikweromo hezuka àwàm imume'u pà.
10Upaw rupi umume'u ikatu 'ym ma'e ihewe wemiapo ràm wà. Uwàpytymawok uzuru herehe uze'eg urywahyahy pà wà. Ukwaukwar herehe ikàg 'ym ma'e romo hemuigo kar pà wà.
11Tupàn hemono awa iaiw ma'e wanupe. Hemu'ar kar teko ikatu 'ym ma'e wapo pe.
12Aiko zeàmàtyry'ym 'ymaw rehe kwehe mehe. Nezewe rehe we hekamik a'e. Hepyhyk he'az pe hezuhaw pà. — Azywà putar a'e awa ihe nehe, i'i ihewe.
13Umàmàn u'yw pupe heywyr hezywàzywà pà. U'yw ukutuk heku'azarer. Waxaw oho. Nahepuhareko kwaw. Nuzemumikahy kwaw herehe. Hepy'a rupi arer uwyryk ywy rehe no.
14Tupàn ur hekutyr zauxiapekwer ài. Werekoahy heretekwer ukwaukwar pà herehe.
15Amunehew ma'eryru pàn iànàm ma'e ma'eryru iapo pyrer, hezemumikahy haw hexak kar pà. Ikàg 'ym ma'e romo aiko. A'e rupi ywyku'i kwer rehe apyk.
16Azai'o tetea'u. A'e rupi heruwa nuzawy kwaw ukaz ma'e kwer. Hereha iàpyàpyzahy. Ipihupihun izywyr no.
17Nezewe rehe we naiko pixik kwaw puruzuka ma'e romo ihe. Aze'eg Tupàn pe tuweharupi heremu'em 'ym pà.
18O ywy, ezumim zo ikatu 'ym ma'e ihewe iapo pyrer nehe. Ahapukaz hemukatu àwàm henoz pà. Ezupyk kar zo heze'eg nehe.
19Heta hekatu haw imume'u har ywak rehe. Akwaw heta haw. Tupàn pe herekuzaromo uze'eg ma'e wiko a'e pe a'e.
20Hemyrypar uze'eg urywahyahy herehe wà. Azewyr Tupàn pe herehay hereko pà.
21Awa umume'u umyrypar ikatu haw tàmuz wanenataromo a'e. Nezewegatete aputar hekatu haw Tupàn henataromo imume'u àràm ihe no.
22Amumaw putar amo kwarahy hereko pà nehe. Tupàn upapar a'e hekwarahy a'e. Aha putar iteko pe rupi ihe. Ni amo nuzewyr kwaw a'e pe rupi wà.
