Jó 30

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Ko 'ar rehe awa ihewi ipyahu wera'u ma'e upuka herehe wà. Wanu na'ikatu kwaw wà. Namono kwaw a'e teko ni hereimaw zawar wainuromo ihe wà, zawar àràpuhàràn wamono'ogar wainuromo ihe wà.

²Wazywa ikàgaw na'ikatu kwaw ihewe. Awa iagaiwahy ma'e romo wanekon wà.

³Na'ikàg kwaw ta'e umumaw 'ar tetea'u umai'u 'ym pà wà, ma'e hereko 'ym pà wà. Pyhaw ywyxiguhu rehe muite teko wanuwi, uxi'u ma'e hapo uxinig ma'e i'u pà wà.

⁴Upyhyk ka'akyr wà, ywyra pekwer wà no, U'u ma'e hapo ikatu 'ym ma'e wà.

⁵Teko omono kar a'e awa umyter wi wà. Uhapukaz wanupe wamuhem kar pà imunar ma'e zàwenugar ài wà.

⁶Upyta yrykaw typawer pe wà. Wiko itakwaruhu pupe wà, ita inuromo wà.

⁷Uze'eg miar ài ka'akyr inuromo wà. Uzemono'og xu iwy pe wà.

⁸Teko ikatu 'ym ma'e wà. Teko her 'ym ma'e wà. Teko omono kar uiwy wi wà.

⁹Ko 'ar rehe a'e teko ur herehe uze'eg urywahyahy pà wà. Upuka herehe wà.

¹⁰Ihuhuk wer herehe ume'e mehe wà. Te uzenymon heruwa rehe wà.

¹¹Tupàn wenuhem hekàgaw ihewi. Ikàg 'ym ma'e romo heapo. A'e rupi a'e teko wikwahy ihewe wà, ikatu 'ym ma'e iapo pà ihewe wà.

¹²A'e teko iaiw ma'e heàmàtyry'ym wà. Hemuzàn kar wà, uzeagaw hemumaw pà wà.

¹³Nahemuhem kar kwaw uzewi wà. Uzeagaw hemumaw pà wà. Ni amo numupytu'u kar kwaw wazeagaw ire wà.

¹⁴Wixe pàrirogawtàtà ikwar rupi wà. Tàpuz heityk pyrer myter pe uzemomor pà hekutyr wà.

¹⁵Akyzeahy tuwe ihe. Ywytuhu weraha ka'akyr uxinig ma'e muite a'e. Nezewegatete weraha hekàgaw muite ihewi wà no. Ywàkun ukàzym na'arewahy. Nezewegatete heremetarer upaw ihewi no.

¹⁶Naherekuwe wer kwaw ihe kury. Ikatu ma'e hàro 'ymaw uzeapo hezar romo no.

¹⁷Pyhaw hekagwer hahy tetea'u ihewe. Herahy haw nupaw kwaw ihewi.

¹⁸Tupàn hepyhykahy he'az rehe. Wenuhem hekamir ihewi hepyhyk mehe.

¹⁹Hereityk to'om pupe. Nazawy kwaw ywy imuku'i pyrer. Aiko tanimuk ài.

²⁰O Tupàn, aze'eg newe hepytywà àwàm henoz pà newe. Nerewazar kwaw heze'eg ihewe ne. Aze'eg newe. Nerezekaiw kwaw herehe.

²¹Erepuraraw kar e ma'erahy ihewe. Paw rupi nekàgaw pupe heàmàtyry'ym pe ne.

²²Hereraha kar pe ywytu pe. Ywytuaiw pupe hemomor pe ko rupi, kwe rupi no.

²³Hereraha pe iko umàno ma'e kwer wapyta haw pe ne. Akwaw neremiapo. Wikuwe ma'e paw uzeàwàxi putar a'e pe amo 'ar mehe wà nehe.

²⁴Awa imumaw pyrer romo aiko ihe. Màràzàwe tuwe heàmàtyry'ym pe ne. Napuner kwaw ma'e iapo haw rehe. Xo hepuhareko àwàm henoz taw rehe zo apuner.

²⁵Aipo nazai'o kwaw amo teko wanehe we ma'erahy ipuraraw mehe ihe. Aipo napuhareko kwaw hemetarer 'ym ma'e ihe wà.

²⁶Àro herurywete àwàm. Ur iaiw haw ihewe. Àro tatainy. Ur ipytunahy haw ihewe.

²⁷Hepy'a nahurywete kwaw. Nupytu'u kwaw. Amumaw 'ar tetea'u ma'erahy ipuraraw pà.

²⁸Aiko hezemumikahy pà. Hereko haw nuzawy kwaw 'ar kwarahy hereko 'ymar. Apu'àm teko paw wanenataromo hepytywà àwàm henoz pà.

²⁹Heze'egaw nuzawy kwaw hekuhemaw hezemumikahy haw hexak kar haw. Nuzawy kwaw awarahu ize'egaw. Nuzawy kwaw wiranu ize'egaw no.

³⁰Hepir ipihun kury. Heretekwer ukaz taku haw rehe.

³¹Kwehe mehe tuweharupi ainu wioràwiràn imupu mehe, ainu xi'àm ipy mehe no. Ko 'ar rehe xo teko zo ainu wazai'o mehe ihe wà kury, wazozok mehe ihe wà no.