Jó 7

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Zanereko haw ko ywy rehe har zawaiw katu zanewe. Nuzawy kwaw zauxiapekwer ài zanereko haw. Zane zama'erekoahy zaiko paw rupi.

²Zaiko uma'ereko e ma'e i'àgaw pe upytu'u wer ma'e ài. Zaiko uma'ereko ma'e uma'ereko awer hekuzar hàro har ài no.

³Amumaw zahy tetea'u ikatu ma'e hàro e pà. Pyhaw hereko haw tynehem ma'erahy pupe no.

⁴Ipytunaw ipukua'u a'e. Awawak tetea'u heker haw rehe pyhaw. Te iahykaw rehe heku'em. Apuranu wiwi hezehe. — Aipo uhem hepu'àmaw 'ar kury, a'e hezeupe.

⁵Merua'yr upyk heretekwer wà. Heperew ike'e haw hepyk a'e wà no. Hepir oxorok. Uhem ipewer izuwi.

⁶He'ar upaw na'arewahy. Nuzawy kwaw pàn ipyahaw. Na'arew uzàn oho. He'ar uhem oho ihewi ma'eràro katu haw hezar 'ym pà. Hereko haw nuzawy kwaw ywytu.

⁷Nema'enukwaw herehe nehe, o Tupàn. Hereha nuexak pixik kwaw herurywete haw nehe.

⁸Herexak pe ko 'ar rehe. Ko 'ar pawire naherexak kwaw pe nehe. Ereme'e putar herehe nehe. Akàzym putar nehe. Naherexak kwaw pe nehe.

⁹Umàno ma'e kwer wapyta haw pe wezyw ma'e kwer nuzewyr pixik kwaw nehe. Nuzawy kwaw ywàkun. Ukwaw ko rupi. Nuzewyr pixik kwaw nehe.

¹⁰Nuzewyr kwaw weko haw pe nehe. Ni amo na'ima'enukwaw pixik kwaw hehe wà.

¹¹A'e rupi napuner kwaw hepyta haw rehe xe heze'eg 'ym pà ihe. Apuraraw ma'erahy teko. Heze'eg wer. Hepurumume'u wer ikatu 'ym ma'e ihewe uzeapo ma'e kwer rehe. Ta'e hepy'a tynehem iro haw pupe a'e xe.

¹²Aipo aiko àzàg yryhu pe har romo. Màràzàwe tuwe ereme'e iko herehe.

¹³— Apytu'u putar heker haw rehe nehe, a'e zepe hezeupe. Heker haw umumaw putar herahy haw ihewi nehe, a'e zepe hezeupe.

¹⁴A'e ma'e rehe heze'eg ire hemukuhem kar pe puahu pupe ne. Puahu iaiw ma'e pupe hemukyze kar pe ne.

¹⁵Aze mo amo hezuka he'azuwyk pà nehe, ikatu mo ihewe. Hemàno haw ikatu wera'u ko heretekwer pupe hereko haw wi.

¹⁶Hereko haw iro ihewe. Nahereko wiwi wer kwaw. Herezar pe nehe. Naheta kwaw ikatu haw hereko haw rehe.

¹⁷Ma'e romo uruiko. Màràzàwe tuwe urekatu newe. Màràzàwe tuwe erezekaiw urerehe.

¹⁸Màràzàwe tuwe ereme'e urerehe tuweharupi. Màràzàwe tuwe ureragaw pe tuweharupi.

¹⁹Màràn mehe erepytu'u putar herehe neme'e re nehe. Màràn mehe apuner hepytu'u haw rehe nehe.

²⁰Ma'e ikatu 'ym ma'e azapo, o teko wanehe ume'egatu ma'e. Màràzàwe tuwe hemuigo kar pe u'yw pupe neremizywà kwer romo, Aipo hepuhuz katu tuwe newe nezewe.

²¹Màràzàwe tuwe nereharaz ikatu 'ym ma'e heremiapo kwer wi. Màràzàwe tuwe neremunàn kwaw hekatu 'ymaw. Nan kwehe tete aiko putar hetym àwàm pupe ihe nehe. Herekar putar pe nehe. Naikuwe kwaw nehe.