Jó 28

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Teko uhàwykàz amo ywy rehe parat henuhem pà wà. Teko umupyràn itazu or ikatu 'ymaw henuhem pà izuwi wà.

²Wenuhem ita per ywy wi wà no. Umupyràn ita itazu komiri henuhem pà izuwi wà no.

³Ihàwykàz mehe weraha tatainy ywy kwar pupe wà. Wekar ita hekuzar katu ma'e ywykwar ohoete ma'e pupe wà no. Ipytunahy haw pupe wekar ita wà.

⁴Muite tawhu wi wanekon wà. Ni amo noho kwaw a'e pe wà. Uhàwykàz ywy ita hekuzar katu ma'e hekar pà wà. A'e zutyka'i uma'ereko a'e pe wà. Uzaiko a'e pe uwauwak pà wà, ko rupi wà, kwe rupi wà.

⁵Wa'aromo arozràn hezuz ywy rehe. Iwy pe ywy uzekazeka uzemu'imu'i pà.

⁶Heta ita hekuzar katu ma'e xapir her ma'e a'e itahu pupe. Teko wexak or ywyku'i inuinuromo wà no.

⁷Wiràhu nuexak kwaw pe ywykwar piar wà. Kàkà nukwaw kwaw wà no.

⁸Zàwàruhu iriàw wà, amo miar ipuruzukaiwahy ma'e wà no, Nuwezyw pixik kwaw a'e pe rupi wà.

⁹Awa uhàwykàz ita tàtàahy ma'e wà. Uzaikaw ywytyruhu ywy rehe imumew pà wà.

¹⁰Uhàwykàz itakwar iapo pà wà. Wekar wyzài ita hekuzar katu ma'e ihàwykàz mehe wà.

¹¹Uhàwykàz oho wiko wà, te uhem ytyzuzàmaw yryhu kutyr uwyryk ma'e pe wà. Werur a'e imim pyrer tatainy haw pe wà.

¹²Nezewe rehe we nuexak kwaw ma'e kwaw katu haw wà. Ma'e pe wexak putar wà nehe. Ma'e pe ma'e kwaw paw hekon a'e.

¹³Teko nukwaw kwaw ma'e kwaw katu haw ikatu haw wà. Nuexak kwaw ko ywy rehe wà.

¹⁴Yryhu uhua'u ma'e uze'eg nezewe a'e. — Nuiko kwaw xe a'e, i'i a'e. Yryhu uze'eg nezewe a'e no. — Nuiko kwaw xe a'e, i'i a'e no.

¹⁵Ikatu wera'u or wi a'e. Teko numekuzar kwaw parat hekuzarer rehe wà nehe.

¹⁶Aze teko omono'og or ikatu wera'u ma'e wà, nezewe rehe we nupuner kwaw ma'e kwaw katu haw ime'eg kar haw rehe wà. Aze omono'og ita hekuzar katu ma'e wà: agata her ma'e, xapir her ma'e, nezewe rehe we nupuner kwaw ime'eg kar haw rehe wà.

¹⁷Ikatu wera'u or wi. Ikatu wera'u ita hekuzar ma'e wi no. Teko nupuner kwaw ime'eg kar haw rehe ita hekuzar katu ma'e pupe wà, ni or ikatuahy ma'e wà.

¹⁸Ita koraw her ma'e nahekuzar katu kwaw. Ita kiritaw nahekuzar katu kwaw no. Teko nupuner kwaw ma'e kwaw katu haw ime'eg kar haw rehe a'e ita pupe wà. Ikatu wera'u ita perura her ma'e wi.

¹⁹Ikatu wera'u ita topaz her ma'e Exio ywy rehe har wi. Ikatu wera'u or ikatuahy wera'u ma'e wi no.

²⁰Ma'e kwaw katu haw a'e, ma'e wi tur a'e. Ma'e pe hekon.

²¹Ni amo wikuwe ma'e nupuner kwaw hexakaw rehe wà. Ni wiràmiri ywak rehe uwewe ma'e wà.

²²Purumumaw paw a'e, màno haw a'e no, Nezewe uze'eg izupe wà. — Nuruexak kwaw ure. Xo imume'u haw zo uruenu, i'i wà.

²³Xo Tupàn zo ukwaw izupe uhemaw. Xo a'e zo ukwaw ipyta haw.

²⁴Ta'e wexak ywy muite wera'u har a'e xe. Wexak ma'e ko ywy rehe uzeapo ma'e paw rupi katete a'e no.

²⁵Tupàn omono wakàgaw ywytu wanupe. Omono uhua'u haw yryhu pe no.

²⁶Umume'u àmàn ikyr àwàm. Wexak kar ywytu àmàn inuromo har iho àwàm izupe no.

²⁷A'e 'ar mehe wexak ma'e kwaw katu haw a'e. Ikatu izupe.

²⁸Na'e uze'eg teko wanupe. — Aze peneko wer ma'e kwaw katu har romo nehe, pekyze pezar wi nehe. Aze pepurukwaw katu wer ma'e rehe nehe, petyryk ikatu 'ymaw wi nehe no, i'i wanupe.