1Ure uruiko ikàg 'ym ma'e romo urezexak kar mehe arer we paw rupi ure. Urereko haw iaikwera'i. Ikatu 'ym ma'e tetea'u uzeapo urewe urereko mehe no.
2Teko nuzawy kwaw ma'eputyr uzaw ire na'arewahy uxinig ma'e wà. Nuzawy kwaw i'àgaw wà no. Ukwaw ko rupi na'arewahy. Na'arewahy ukàzym no.
3Nuruiko kwaw ikàg ma'e romo. Màràzàwe tuwe erezekaiw urerehe. Naiko kwaw upuner ma'e romo. Màràzàwe tuwe hereraha pe nerenataromo.
4Teko iaiw ma'e Nuzapo pixik kwaw ikatu ma'e a'e wà.
5Eremume'u ure'ar heta àwàm urewe paw rupi ne. Upyta imume'u katu pyrer romo. Ni amo nupuner kwaw imunànaw rehe amo ae ure'ar imume'u pà wà.
6Epytu'u urerehe neme'e re nehe. Tuwe urupyta ure zutyka'i nehe. Tuwe ure zutyka'i urumumaw ure'ar nehe. Uma'ereko ma'e umumaw u'ar uma'ereko pà. Nezewegatete urumumaw ure'ar.
7Heta ma'e hàrogatu haw ywyra pe. Aze ximonohok nehe, hezuz wi putar nehe. Itua'u wi putar nehe.
8Aze hapo izemàner nehe, Aze izypy kwer umàno ywy pupe nehe,
9Nezewe rehe we aze ximono 'y pixik hehe nehe, hezuz wi putar nehe. Hàkà wi putar ywyra ipyahu ma'e ài nehe.
10Teko nuiko kwaw ywyra ài wà. Umàno mehe upaw wà. Wekwe imono re, ma'e pe oho putar wà nehe.
11'Ypaw typaw upaw rupi. Yrykawhu upytu'u uwyryk ire no.
12Nezewegatete aze heta we ywak nehe, Urumàno putar upaw rupi katete ure nehe. Uruzapo putar ureker haw zàwenugar uremàno pà nehe. Nurupu'àm pixik kwaw a'e re nehe.
13A, aze mo hemono pe umàno ma'e kwer wapyta haw pe, Aze mo hemim pe a'e pe nekwahy mehe, Aze mo a'e re eremume'u he'ar, — Hema'enukwaw putar nerehe a'e 'ar mehe nehe, aze mo ere ihewe, ikatu wera'u mo ihewe.
14Aipo amo wikuwe wi putar umàno re wà nehe. Ihe àro putar 'ar ikatu wera'u ma'e ihe nehe. Heremipuraraw ipaw ire apytu'u putar hàro re nehe.
15Na'e herenoz putar pe nehe. Awazar putar neze'eg newe nehe. Nerurywete putar herehe nehe. Ta'e heapo pe ne xe.
16Erezekaiw putar herehe iawy haw iapo kar 'ym pà ihewe nehe. Nereiko kwaw herehe neme'e pà heremiapo ikatu 'ym ma'e hekar pà nehe.
17Nereharaz putar heremiapo kwer ikatu 'ym ma'e wi nehe. Eremunàn putar heremiawy kwer nehe no.
18Ywytyruhu uzekazeka waiko u'au'ar pà wà. Itahu uhem uwenaw wi wà no.
19'Y u'ar ita rehe imukwamukwar pà. 'y ywy rehe uwyrykahy ma'e weraha ywy uzeinuinuromo. Nezewegatete eremumaw teko wama'eràrogatu haw wanuwi ne.
20Ereityk teko ne wà. A'e rupi oho tuwe wà. Amo ae hexakaw eremono wanupe ko ywy wi waho mehe ne wà.
21Aze amo uze'egatu ta'yr wanehe wà, wanu nuenu kwaw wà. Aze ta'yr u'ar iaiw paw pupe wà, Ni amo numume'u kwaw wanu pe wà.
22Xo wetekwer rehe hahy haw zo ukwaw a'e. Xo uzemumikahy haw upy'a pe har zo ukwaw.
