1Eriu uze'eg wi kury.
2Pe ma'e ikwaw katu har pe, ma'e tetea'u rehe uzemu'e ma'e pe, Penu katu heremimume'u ràm nehe kury.
3Teko wenu amo ze'eg ikatu haw henu mehe wà. Ukwaw amo temi'u hete haw i'u mehe wà no.
4Nezewegatete zame'egatu putar Izo heko awer rehe zane nehe kury. Xixak ikatu haw nehe. Xixak ikatu 'ymaw nehe no.
5— Naiko kwaw ikatu 'ym ma'e iapo har romo ihe, i'i Izo iko. — Tupàn na'ipurumur wer kwaw hekatu haw hekuzar rehe ihewe, i'i iko.
6Upuranu iko nezewe a'e. — Aiko ikatu ma'e romo. Nezewe rehe we, — Hemu'em ma'e, i'i teko ihewe wà. Nazapo pixik kwaw ikatu 'ym ma'e ihe. Nezewe rehe we hema'eahy iteko ihe. Naheta kwaw hemukatu haw, i'i Izo iko.
7Naheta kwaw Izo zàwenugar ko ywy rehe wà. 'Y kanek por i'u haw nazawaiw kwaw izupe. Nezewegatete Tupàn rehe ize'eg uryweteahy haw nazawaiw kwaw izupe no.
8Wata awa ikatu 'ym ma'e wanehe we. Uzemono'og teko iaiw ma'e wanehe we no.
9— Màràzàwe tuwe azeagaw putar Tupàn imurywete kar pà nehe. Nuzapo kwaw ikatu ma'e ihewe a'e, i'i.
10Pe ma'e kwaw katu haw hereko har pe, pezeapyaka katu heze'eg rehe nehe kury. Aipo Tupàn uzawy amo ma'e iapo mehe. Aipo uzapo amo ikatu 'ym ma'e amo teko pe.
11Umekuzar zaneremiapo kwer zanewe. Aze ikatu nehe, umur putar ikatu ma'e zanewe nehe no. Aze na'ikatu kwaw nehe, umur putar ikatu 'ym ma'e zanewe no.
12Azeharomoete Tupàn upuner wera'u ma'e nuzapo kwaw ikatu 'ym ma'e a'e. Nuzapo kwaw ikatu 'ym ma'e teko wanupe.
13Mo omono ipuner haw Tupàn pe wà. Mo umuigo kar Tupàn ywy rehe har paw wanuwihawete romo wà. Mo umuigo kar ywak rehe har paw wanuwihawete romo wà.
14Aze mo Tupàn uputar, Upuner mo zanepytuhemaw imuzewyr kar haw rehe uzeupe.
15Nezewe mehe mo teko paw umàno mo uzemono'og pà wà, pitài 'ar mehe mo wà. Uzewyr mo ywy imuku'i pyrer romo wà.
16Izo, aze ereiko ma'e kwaw katu har romo, ezeapyaka katu heze'eg rehe nehe. Ezekaiw katu herehe nehe no.
17Aze mo Tupàn na'iakatuwawahy iwer mo teko wanereko katu haw rehe, nupuner iwer mo teko ywy rehe har wanuwihawete romo wiko haw rehe. Aipo neporomono kar wer teko ikatu ma'e wanehe zepykaw pe. Aipo neporomono kar wer upuner ma'e wanehe zepykaw pe.
18Tupàn omono kar tuwihawete uzepykaw pe wà, amo tuwihaw wamono kar pà uzepykaw pe wà no, Aze na'ikatu kwaw wà, aze iaiw wà.
19Aze teko wiko tuwihaw romo wà, Tupàn nuzapo wera'u kwaw ikatu ma'e a'e teko wanupe. Nuzapo kwaw ikatu ma'e xo hemetarer katu ma'e wanupe zo a'e, hemetarer 'ym ma'e waneityk pà a'e. Ta'e uzapo a'e teko paw rupi katete a'e wà xe.
20Màno haw upuner ur haw rehe na'arewahy a'e, pyhaw a'e. Ma'eahy haw iaiw ma'e uhem amo pe izuka pà tàrityka'i. Aze Tupàn ipuruzuka wer upuner ma'e wanehe, — Hepytywà pe wazuka mehe nehe, ni'i kwaw amo pe.
21Ukwaw zaneremiapo upaw rupi a'e. Wexak zaneata haw paw rupi no.
22Aze ikatu 'ym ma'e iapo har izeàmim wer Tupàn wi, wekar wyzài ipytunahy haw. Nezewe rehe we nupuner kwaw uzeàmimaw rehe izuwi.
23— Amume'u putar neremiapo kwer nehe. Ma'e 'ar mehe erezur putar herenataromo nehe, heremimume'u ràm henu pà nehe, ni'i kwaw Tupàn teko wanupe.
24Aze ipurumumaw wer amo upuner ma'e wanehe, aze iporomono wer amo tuwihaw wanehe a'e tuwihaw wanekuzaromo nehe, Nume'egatu kwaw waneko haw rehe wamumaw 'ym mehe we. Umumaw 'ar wemimutar mehe wà.
25Ta'e Tupàn ukwaw wanemiapo kwer a'e xe. Pyhaw weityk wazuka pà wà.
26Katu pe teko wanenataromo, Tupàn uzepyk wanehe a'e, imunar ma'e romo wiko ma'e ài a'e.
27Ta'e utyryk izuwi wà xe. Na'ipureruzar wer kwaw ni pitài hemiapo kar rehe wà.
28A'e teko upuraraw kar ma'erahy hemetarer 'ym ma'e wanupe wà, wamuhapukaz kar pà wà. Imunar teko wama'e rehe wà no. Umuzeupir kar wanehapukaz haw Tupàn pe wà. Tupàn wenu a'e.
29Nezewe rehe we, aze Tupàn nuze'eg kwaw nehe, ni amo nupuner kwaw hemiapo kwer ikatu 'ymaw imume'u haw rehe wà. Aze umim uwa nehe, naheta kwaw teko wapyro àwàm. Naheta kwaw ywy nànànar wapyro àwàm.
30Nupuner kwaw ma'e iapo haw rehe uzepyro pà awa ikatu 'ym ma'e wanuwi wà nehe. A'e awa ikatu 'ym ma'e wiko putar wanuwihaw romo wà nehe, imunar putar wama'e rehe wà nehe no.
31Izo, — Azapo ikatu 'ym ma'e ihe, aipo ere Tupàn henataromo. — Apuraraw ma'erahy tetea'u, ta'e ikatu 'ym ma'e iapo har romo aiko ihe xe, aipo ere izupe. — Nazapo wi kwaw nehe, aipo ere izupe.
32— Exak kar hekatu 'ymaw ihewe nehe, aipo ere izupe. — Apytu'u putar ikatu 'ym ma'e iapo re nehe kury, aipo ere izupe.
33Aze Tupàn hemiapo na'ikatu kwaw newe, Màràzàwe tuwe erezapo kar neremimutar izupe. Ne ewazar nehe. Ihe nawazar kwaw nehe. Emume'u nema'enukwaw paw urewe nehe.
34Teko ma'e kwaw katu har herenu har a'e wà, Teko ikatu ma'e iapo haw ikwaw par wà no, nezewe i'i putar wà nehe.
35— Izo nukwaw kwaw uze'eg awer a'e. Uze'eg iko he'o ma'e ài.
36Aze amo ume'egatu ize'eg awer rehe wà nehe, Wexak putar heko haw wà nehe. Iaiw ma'e romo hekon a'e.
37Izo wiko ikatu 'ym ma'e iapo har romo. Ikatu 'ym ma'e iapo har Tupàn heruzar 'ymar romo hekon a'e. Uze'eg urywahyahy Tupàn rehe zanerenataromo. Nupytu'u kwaw hehe uze'eg zemueteahy re, i'i putar izupe wà nehe.
